"AzerGold" QSC özünün sosial-ekoloji tədbirləri ilə də seçilir
Mədənlər bəzən təkcə yerin dərinliklərində gizlənən sərvətləri üzə çıxarmır, həm də ölkənin iqtisadi gücünü, texnoloji imkanlarını və gələcəyə baxışını nümayiş etdirir.
Azərbaycanın qeyri-neft sektorunun inkişafında mühüm rol oynayan "AzerGold" Qapalı Səhmdar Cəmiyyəti ötən 10 ildə məhz belə bir inkişaf yolu keçərək müasir dağ-mədən sənayesinin aparıcı şirkətlərindən birinə çevrilib.
İyulun 27-29-da təşkil olunan mediatur çərçivəsində Göygöl və Daşkəsən rayonlarında səfərdə olan jurnalistlər "AzerGold" QSC-nin 10 illik fəaliyyəti dövründə həyata keçirdiyi layihələr, əldə etdiyi nəticələr və gələcək planları barədə geniş məlumat aldılar. Səfərin ən yaddaqalan məqamlarından biri isə Daşkəsən rayonunda yerləşən Çovdar qızıl yatağına baş çəkmək oldu. Æurnalistlər bu qiymətli metalın mədəndən çıxarılması, emal mərhələləri və müasir istehsal prosesləri ilə yaxından tanış olmaq imkanı əldə etdilər.
Şirkətin əldə etdiyi nailiyyətlərin əsasında dövlətin qeyri-neft sektorunun inkişafına, təbii sərvətlərin səmərəli idarə olunmasına və iqtisadiyyatın şaxələndirilməsinə yönəlmiş strateji siyasəti barədə jurnalistlərə geniş məlumat verildi. Öyrəndik ki, 2016-cı ildə fəaliyyətə başlayan şirkət qısa müddətdə geoloji kəşfiyyatdan hasilata, emaldan sənaye xidmətlərinə və qiymətli metalların satışına qədər geniş fəaliyyət zənciri formalaşdırıb. Ötən 10 il ərzində 2 yeni qızıl yatağı kəşf edilib, 4 qızıl mədəni və regional sənaye kompleksi istifadəyə verilib.
Şirkətin ilk böyük layihəsi olan Çovdar qızıl yatağında aparılan işlər xüsusi diqqət çəkir. Əlavə kəşfiyyat və optimallaşdırma tədbirləri nəticəsində yatağın ehtiyatları əhəmiyyətli dərəcədə artıb. Çovdar, "Mərəh", "Ağyoxuş" və "Tülallar" yataqlarının vahid istehsal mərkəzi çərçivəsində idarə olunması məqsədilə yaradılan Çovdar İnteqrəolunmuş Regional Emal Sahəsi (ÇİRES) istehsalın səmərəliliyini artırmağa imkan verib.
Bu günədək "AzerGold" tərəfindən istismar olunan mədənlərdən 558 min unsiyadan çox qızıl, 1 milyon unsiyadan artıq gümüş hasil edilib. Şirkət qiymətli metalların satışı nəticəsində 2,2 milyard manatdan çox gəlir əldə edib, dövlət büdcəsinə vergi və sosial ödənişlər vasitəsilə 295,3 milyon manat vəsait yönəldib.
Şirkətin qarşıdakı illər üçün əsas prioritetlərindən biri yeni yataqların istismara hazırlanmasıdır. Kəlbəcərdə yerləşən Söyüdlü (Zod) qızıl yatağı, Balakəndəki Filizçay polimetal yatağı və Naxçıvandakı Ortakənd qızıl yatağı Azərbaycanın dağ-mədən sənayesinin gələcək inkişafında mühüm rol oynaya biləcək strateji layihələr sırasında yer alır. Daşkəsən dəmir filizi layihəsi isə ölkənin metallurgiya sənayesi üçün xüsusi əhəmiyyət daşıyır. Layihənin tam icrası nəticəsində yeni sənaye zəncirinin yaradılması, ixrac imkanlarının artırılması və regionlarda minlərlə yeni iş yerinin açılması nəzərdə tutulur.
Mediatur zamanı diqqətçəkən məqamlardan biri də "AzerGold"un fəaliyyətində yerli kadrlara verilən üstünlük oldu. Hazırda şirkət 2640 nəfəri daimi işlə təmin edir. Onların təxminən 80 faizi region sakinləridir. Bu, xüsusən Gəncə-Daşkəsən iqtisadi rayonunda məşğulluğun təminatına mühüm töhfə verir.
Şirkətin insan kapitalının inkişafına yönəlmiş yeni təşəbbüsləri sırasında Daşkəsən məktəbliləri üçün hazırlıq kurslarının təşkili xüsusi əhəmiyyət daşıyır. Etibarlı və peşəkar kadr potensialının formalaşdırılmasını strateji hədəflərindən biri hesab edən "AzerGold" QSC bu layihə ilə region gənclərinin təhsil imkanlarının genişləndirilməsinə dəstək göstərməyi qarşıya məqsəd qoyur. Layihə çərçivəsində məktəblilərin əlavə hazırlıq kurslarına cəlb olunması, onların bilik və bacarıqlarının artırılması nəzərdə tutulur. Şirkət tərəfindən ayrılmış xüsusi nəqliyyat vasitəsi şagirdlərin hazırlıq dərslərinə rahat çatdırılmasını təmin edəcək. Bu təşəbbüs həm valideynlərin əlavə nəqliyyat və hazırlıq xərclərinin azalmasına, həm də şagirdlərin keyfiyyətli təhsil imkanlarından bərabər yararlanmasına şərait yaradacaq. Kurslarda təcrübəli və yüksəkixtisaslı müəllimlərin iştirakı ilə məktəblilərin gələcək təhsil və peşə seçimlərinə mühüm dəstək veriləcək.
Göründüyü kimi, şirkətin fəaliyyəti yalnız hasilat göstəriciləri ilə məhdudlaşmır. "AzerGold" fəaliyyət göstərdiyi ərazilərdə sosial məsuliyyət layihələrinə də xüsusi diqqət ayırır. Bu günədək şirkət tərəfindən təhsil, səhiyyə, aqrar inkişaf, kiçik sahibkarlıq və digər istiqamətlərdə 100-dən çox sosial layihə həyata keçirilib.
Ekoloji məsələlər də şirkətin fəaliyyət strategiyasında mühüm yer tutur. "AzerGold" Azərbaycanda rekultivasiya tədbirləri reallaşdıran ilk dağ-mədən şirkətlərindəndir. Bu çərçivədə istismarı başa çatmış ərazilərdə torpaq qatı bərpa olunur, yaşıllaşdırma işləri və ağacəkmə layihələri həyata keçirilir.
Şirkətin gələcək hədəfləri sırasında geoloji kəşfiyyat işlərinin və beynəlxalq əməkdaşlığın genişləndirilməsi, yeni bazarlara çıxış imkanlarının tapılması da xüsusi yer tutur. Özbəkistanla həyata keçirilən əməkdaşlıq bu istiqamətdə atılan mühüm addımlardan biridir.
"AzerGold"un 10 illik fəaliyyəti göstərir ki, müasir mədənçilik yalnız yeraltı sərvətlərin hasilatı deyil. Bu həm də regionların sosial-iqtisadi inkişafı və Azərbaycanın sənaye potensialından ölkənin xeyrinə istifadə olunmasıdır.
Elşən QƏNİYEV,
"Azərbaycan"
