2025-ci ildə yük və sərnişin daşımaları əvvəlki illə müqayisədə müvafiq olaraq 1,8 faiz və 6,1 faiz artıb.
Dövlət Statistika Komitəsindən AZƏRTAC-a bildirilib ki, nəqliyyat sektorunda fəaliyyət göstərən təsərrüfat subyektləri tərəfindən 243,2 milyon ton yük daşınıb. Yüklərin 3,7 faizi dəniz, 6,9 faizi dəmir yolu, 0,2 faizi hava, 62,4 faizi avtomobil nəqliyyatı ilə həyata keçirilib.
Qeyd edilib ki, qeyri-dövlət sektoruna məxsus nəqliyyat vasitələri ilə daşınmış yüklərin həcmi 3,2 faiz artıb. Daşınmış yüklərin ümumi həcmində bu sektorun xüsusi çəkisi 80,4 faiz təşkil edib.
Bundan başqa, 2025-ci ildə nəqliyyatçılar 2 milyard 215,1 milyon sərnişinə xidmət göstəriblər. Sərnişinlərin 89,1 faizi avtomobil nəqliyyatı, 10,2 faizi metro, qalan hissəsi isə digər nəqliyyat növləri ilə daşınıb. Dəmir yolu nəqliyyatı ilə 2025-ci ildə 16,8 milyon ton yük, 10 milyon 267 min sərnişin daşınıb.
2024-cü illə müqayisədə yük daşınmasında 9,4 faiz azalma, sərnişin daşınmasında isə 20,4 faiz artım müşahidə olunub. Dəniz nəqliyyatı ilə 2025-ci ildə daşınmış yüklərin həcmi 9 milyon 89,6 min ton təşkil edib və əvvəlki ilə nisbətən 5,4 faiz artıb. Yüklərin 47,5 faizini neft yükləri təşkil edib. Dövr ərzində bu nəqliyyat növü ilə daşınmış sərnişinlərin sayı 2024-cü ilə nisbətən 10,2 faiz azalaraq 25,5 min nəfər olub. Dəniz limanları tərəfindən 12 milyon 959,5 min ton həcmində yükləmə-boşaltma işləri həyata keçirilmiş və yüklərin 10 milyon 246,3 min tonunu və ya 79,1 faizini tranzit yüklər təşkil edib.
Qeyd edilib ki, 2026-cı il yanvar ayının 1-i vəziyyətinə limanlarda qalan yüklərin həcmi 441,3 min ton olub.
“Nəqliyyat sektorunda daşımaların həcmində xüsusi çəkisi ən böyük olan avtomobil nəqliyyatı ilə 151,7 milyon ton yük, 1 milyard 973,8 milyon sərnişin daşınıb və əvvəlki illə müqayisədə müvafiq olaraq 5,7 faiz və 6,9 faiz artım qeydə alınıb. Sərnişinlərin 95,2 faizi avtobus, 4,8 faizi isə minik taksilərinin xidmətlərindən istifadə edib. Yük dövriyyəsi 7 faiz, sərnişin dövriyyəsi isə 9,3 faiz artıb. Metro nəqliyyatının xidmətlərindən istifadə etmiş sərnişinlərin sayı 1,4 faiz azalaraq 226,8 milyon nəfər olub. Hava nəqliyyatı ilə 4 milyon 162,1 min və ya əvvəlki ilə nisbətən 2,9 faiz çox sərnişin daşınıb, daşımaların 99,9 faizi dövlət, 0,1 faizi isə özəl müəssisələrə məxsus nəqliyyat vasitələri ilə həyata keçirilib. Bu nəqliyyat növü ilə yükdaşıma 6,6 faiz azalaraq 391,2 min ton olub”,- deyə Dövlət Statistika Komitəsindən bildirilib.
jpg_1768850033.jpg)
