Mingəçevir Şəhər İcra Hakimiyyəti başçısı yanında Şuranın növbəti iclası cari ilin birinci yarımilliyinin yekunlarına həsr olunmuşdu. İclasda şəhər icra hakimiyyəti başçısı aparatının əməkdaşları, hüquq-mühafizə orqanlarının rəhbərləri, YAP Mingəçevir şəhər təşkilatının sədri və fəalları,  Mingəçevir Bələdiyyəsinin sədri və üzvləri, idarə və müəssisələrin rəhbərləri, mətbuat işçiləri, ictimaiyyət nümayəndələri iştirak edirdilər.

İlk olaraq Mingəçevir Şəhər İcra Hakimiyyətinin başçısı İlham İsmayılov müzakirə olunan məsələ haqqında ətraflı məlumat verdi. Bildirdi ki, ötən yarımillik ərzində ölkəmizin hər yerində olduğu kimi, Mingəçevir şəhərində də genişmiqyaslı tədbirlər həyata keçirilmişdir. Şəhərin infrastrukturu xeyli yenilənmiş, sosial layihələrin icrası davam etdirilmişdir. Bununla belə, qarşıda mühüm vəzifələr durur. Prezident İlham Əliyevin tapşırıq və tövsiyələrinə uyğun olaraq şəhərin sosial-iqtisadi inkişafı ilə bağlı uğurlu işlər görülür. 

Şura iclasında "2024-cü ilin 6 ayında Mingəçevir şəhərinin  sosial-iqtisadi inkişafının vəziyyəti və ilin ikinci yarısında qarşıda duran vəzifələr"lə bağlı məruzə ilə icra başçısının müavini-Sosial-iqtisadi  inkişafın təhlili və proqnozlaşdırılması şöbəsinin müdiri Fərid Məmmədov  çıxış etdi.

Məruzə ətrafında müzakirələrdə Maliyyə şöbəsinin rəisi Sultan Əsədov, "Azərbaycan İES" MMC-nin direktoru Təhmasib Hüseynov, 8 saylı Regional  Ekologiya və Təbii  Sərvətlər İdarəsinin rəis müavini İnqilab Əlizadə, Azərbaycan Yerüstü Nəqliyyat Agentliyinin Yevlax Regional bölməsinin müdir əvəzi Elvin Zakirov, Mərkəzi Aran Regional Təhsil idarəsinin Mingəçevir şəhər Təhsil sektorunun müdiri Sevinc Həsənova, Sahibkarlar Təşkilatları Milli Konfederasiyasının Mingəçevir şəhər nümayəndəsi Vaqif Həsənov çıxış edərək müzakirə olunan məsələyə dair fikirlərini söylədilər, təmsil etdikləri qurumların fəaliyyətləri barədə məlumat verdilər. İşgüzarlıq şəraitində keçən şura iclası müzakirə olunan məsələyə dair müvafiq qərar qəbul etdi.

Şəhər icra hakimiyyətinin başçısı İlham İsmayılov şura iclasının işinə yekun vuraraq əminliyini bildirdi ki,  iclasda qeyd olunan nöqsan və problemlər tezliklə öz həllini tapacaq, qarşıya qoyulmuş vəzifələr müvəffəqiyyətlə həyata keçiriləcəkdir. Qeyd edildi ki, cari ilin ikinci yarısında daha böyük uğurlar qazanılması, yeni infrastruktur layihələrin həyata keçirilməsi nur şəhəri sakinlərinin əsas hədəfidir.

Lazım QULİYEV,

"Azərbaycan"