Bunun sayəsində Azərbaycana gələnlərin sayı ildən-ilə artır
Dünyada olan 11 iqlim şəraitinin 9-nu özündə ehtiva edən Azərbaycanda, xüsusən də qış aylarında Böyük və Kiçik Qafqazın qarlı dağları, dağətəyi bölgələri bu yerlərə səyahətə gələnlərə başqa aləm yaşadır.
2025-ci ilin 10 ayında Azərbaycana dünyanın 183 ölkəsindən 2 milyon 171,6 min xarici və vətəndaşlığı olmayan şəxs gəlib. Gələnlərin 24,4 faizi Rusiya Federasiyası, 17,4 faizi Türkiyə, 8 faizi İran, 6,6 faizi Hindistan, 4,3 faizi Səudiyyə Ərəbistanı, 4,2 faizi Gürcüstan vətəndaşları olublar. Bir neçə həftə bundan əvvəl Qubaya, Qusara, Gədəbəyə, Daşkəsənə, Kəpəzə, Laçına, Şahdağa və digər ərazilərə yağan qarın sorağı ilə adları qeyd olunan xarici ölkələrdən, xüsusən də Şimaldan, Şimal-Şərqi ölkələrdən, eləcə də Avropa ölkələrindən gələnlərin sayında artım müşahidə olunur.
Böyük Qafqaz dağlarında qış mövsümü başqa möcüzədir. Burada xizəksürmə həvəskarları insan ayağı dəyməyən gözəl məkanlarla qarşılaşırlar. Yamaclarda cəsarətlə sürüşənlər dünya səviyyəli iki məşhur dağ-xizəksürmə kurortunda - Qusarda "Şahdağ", Qəbələdə "Tufandağ" Qış-Yay Turizm İstirahət Kompleksində xizək sürməkdən zövq alırlar. Onlar üçün Avropa ilə Asiyanın qovuşuğunda yerləşən Azərbaycanın heyrətamiz mənzərələri, maraqlı qış festivalları, dünya səviyyəli dağ-xizək kurortları qarlı və soyuq havalarda istirahət üçün əla məkandır. Əminliklə demək olar ki, qonaqpərvər insanlar diyarının gözoxşayan, əsrarəngiz təbiəti, görməli yerləri turistlərin yaddaşında silinməz izlər buraxır.
Bu yerlərə gələnlər Qış festivallarında iştirak etməkdə çox maraqlıdırlar. Paytaxt Bakı unudulmaz anların zövqünü yaşamaq üçün uzaq və yaxından gəlmiş qonaqları qəbul edən mədəni meqapolisdir. Qış turizmi həvəskarları Bakıda keçirilən "Soyuq əllər, isti ürək" adlı xeyriyyə yarmarkasında da həvəslə iştirak etməkdən məmnundurlar. Sayrışan parlaq işıqlar, isti içkilər və zəngin dadlı yeməklər səyahətçilərdə həddən artıq bayram əhvali-ruhiyyəsi yaradır.
Azərbaycanın qədim diyarı Qəbələ rayonu ərazisində bənzərsizliyi ilə seçilən "Tufandağ" Dağ-Xizək Kompleksi Böyük Qafqaz dağlarının ətəyində yerləşir. Azərbaycanın bu gözəl guşəsi göllər, şəlalələr, çaylar və dağlarla zəngindir. Keçmiş Qafqaz Albaniyasının paytaxtı olan Qəbələ qədim tarixi və mədəniyyəti ilə seçilir. Bölgədə eyni zamanda 16 hektarlıq əyləncə və macəra ərazisi - Azərbaycanın ən böyük əyləncə parkı - "Qəbələnd" də fəaliyyət göstərir.
Xüsusi hazırlanmış 15 kilometrlik yamaclar snoubordinq və xizəklə sürüşmək üçün əla məkandır. Xizək sürməyi ilk dəfə sınayanlar bu əyləncəli idman növü ilə məşğul olmaq üçün istirahət kompleksinin xizəksürmə məktəbinin təcrübəli əməkdaşlarının dəstəyindən istifadə edirlər. Xatırladaq ki, restoran, kafe, bar və istirahət zonaları ilə təchiz olunmuş Tufandağ gəzintidən sonra səyahətçilərdə maraqlı anlar yaşadır.
Qış mövsümü ilə əlaqədar Qusar rayonu ərazisindəki "Şahdağ" Turizm Mərkəzi də ən gözəl istirahət ünvanlarından biridir. Səyahətçilərə sıx meşəliklərdə və qarlı dağlarda açıq havada istirahət və əyləncə proqramları təşkil olunur. Yeri gəlmişkən, deyək ki, şəhər mərkəzindən uzaqlaşmaq istəyənlər üçün "Şahdağ" Turizm Mərkəzi mükəmməl qış istirahət zonasıdır. Qarla örtülmüş dağ yamacı həm xizəkçilər, həm də isti və rahat divar sobası ətrafında dincəlmək istəyənlər üçün ideal məkandır.
Xizək sürməyə marağı olmayan turistlər motorlu xizəklə, asma kanatla, dağ yolları ilə, habelə velosiped gəzintisi və yamac paraşütçülüyü, bir qismi isə qar təmizləyən maşın və atla gəzinti ilə günlərini maraqlı keçirirlər.
İşğaldan azad edilmiş Qarabağ bu gün yay-yaz turizmi ilə deyil, həm də qış turizm potensialı ilə diqqət çəkir. Bu bölgədə dağ turizmi, xüsusilə qış turizmi üçün də geniş imkanlar mövcuddur. Şuşa şəhəri və onun ətrafındakı əzəmətli dağlar, Xankəndi, Laçın, Kəlbəcər və digər rayonlar qış turizmi baxımından unikal məkanlardır.
Azərbaycanın ən qədim əraziləri olan Qarabağ və Şərqi Zəngəzur təkcə tarixi və siyasi əhəmiyyətinə görə deyil, həm də qış turizm potensialına görə diqqətçəkəndir. Şuşa şəhəri və ətraf ərazilər qış turizmi üçün əvəzolunmaz yerlərdir. Ekspertlərin fikrincə, Şuşaya çəkilən yeni dəmir yolu və yaradılan nəqliyyat infrastrukturu bu ünvanlara turizm axınını da artıracaq.
Hazırda Qarabağ iqtisadi rayonunda olduğu kimi, bütün bölgələrdə dünya standartlarına uyğun turizmin inkişafı üçün ardıcıl işlər həyata keçirilir. Sülh sazişi tezliklə imzalanarsa, Ermənistan tərəfindən gələn turistlərin Naxçıvana səfər etməsi də qış turizminin inkişafına töhfə verə bilər. Səyahətçilərin Gürcüstandan Naxçıvana quru yol ilə Ermənistan üzərindən daha rahat gəlməsi mümkün olacaq ki, bu da yeni turizm axınına səbəb olacaq. Eyni zamanda Ermənistana və Gürcüstana gələn xarici turistlərin də Naxçıvana keçidi asanlaşacaq. Görünən odur ki, ölkəmizdə qış turizminin coğrafiyası böyüdükcə, Azərbaycana gələn turistlərin də sayı ilbəil artır.
Rəhman SALMANLI,
"Azərbaycan"
jpg_1767211798.jpg)
