Ötən il qeyri-neft sektorunda ixracın dəyəri 3,6 milyard dollara çatıb

Bu, 8,5 faiz artım deməkdir

İqtisadi İslahatların Təhlili və Kommunikasiya Mərkəzi (İİTKM) "İxrac icmalı"nın yanvar sayını təqdim edib. İcmala əsasən, ötən il Azərbaycanın qeyri-neft sektoru üzrə ixracının dəyəri 2024-cü illə müqayisədə 8,5 faiz artaraq 3,6 milyard dollar təşkil edib. 

Hesabat dövründə ixrac olunan şəkər ötən ilə nisbətən 57,4, meyvə-tərəvəz 27,4, alüminium və onlardan hazırlanan məmulatlar 24,2, pambıq iplik 19,3, kimya sənayesi məhsulları 8, çay 3, bitki və heyvan mənşəli piylər və yağlar 2 faiz artıb. Aqrar məhsullar üzrə ixracın dəyəri 26,7 faiz artaraq 1 milyard, aqrar sənaye məhsulları üzrə 314,7 milyon dollara bərabər olub. Bütövlükdə aqrar və aqrar-sənaye məhsullarının birgə ixracının dəyəri 1,3 milyard dolları ötüb ki, bu da 18,9 faiz artım deməkdir. 

Ötən ilin 11 ayında ixrac edilmiş qeyri-neft sektoruna aid malların siyahısında qızıl birinci, pomidor (tomat) ikinci, karbamid üçüncü, noyabr ayı ərzində isə xurma  birinci, meşə fındığı ikinci, emal olunmamış, aşqarlanmamış alüminium üçüncü olub. Həmin dövr Rusiya Federasiyasına, Türkiyəyə, İsveçrəyə, Gürcüstana, Ukraynaya ən çox qeyri-neft məhsulları ixrac edilib. Daha çox qeyri-neft məhsulları ixracatçıları sırasında  qeyri-dövlət subyektlərinin reytinqində ilk onluqda "Azərbaycan İnterneyşnl Mayninq Kompani Limited Şirkəti"nin Azərbaycan Respublikasındakı Nümayəndəliyi, "Prime Cotton" MMC, "Azərbaycan Şəkər İstehsalat Birliyi" MMC, "Baku Steel Company" QSC, "Export Stream" Məhdud Məsuliyyətli Cəmiyyəti, "STP Alüminium" MMC,"TABATERRA"QSC, "UYTROP" Məhdud Məsuliyyətli Cəmiyyəti, "KHAN-EL" MMC ,"P-Aqro" MMC, dövlətə məxsus olan şirkətlərin siyahısında isə ARDNŞ-nin Marketinq və İqtisadi Əməliyyatlar İdarəsi başçılıq edir. Bundan sonra bu siyahıda reytinq üzrə aşağıdakı şirkətlər qərarlaşıblar: "SOCAR Polymer" MMC, "AzerGold" QSC, "Azəralüminium" MMC, Azərbaycan Respublikası Dövlət Neft Şirkətinin Qaz İxrac İdarəsi,"Azərpambıq Aqrar Sənaye Kompleksi" MMC, "Socar-Dalğıc" MMC, "İstisu" mineral su zavodu MMC, "Azərbaycan Dəmir yolları" QSC, Naxçıvan MR Dövlət Energetika Xidməti təmsil olunublar. 

2025-ci ilin yanvar-noyabr aylarında həmçinin Azərbaycan Respublikasının Kosmik Agentliyi ("Azərkosmos") xarici ölkələrə 16,4 milyon dollar dəyərində telekommunikasiya xidmətləri göstərib. 41 ölkəyə ixrac olunan xidmətlərdən "Azərkosmos"un əldə etdiyi gəlir onun ümumi gəlirlərinin 66 faizini təşkil edib. Ötən ilin noyabr ayında isə "Azərkosmos" dünyanın 35 ölkəsinə 1,5 milyon dollar dəyərində xidmət ixrac edib. 

Hesabat dövründə "Azərkosmos"un xidmətlərindən 4,2 milyon dollarla Birləşmiş Krallıq, 3,2 milyon dollarla Lüksemburq, 1,1 milyon dollarla İsveç, 772 min dollarla Türkiyə, 759,8 min dollarla Nigeriya yararlanıb.

Rüstəm KAMAL,

"Azərbaycan"