Müasir dünya nizamı bu gün tarixin ən ağır sınaqlarından birini keçir. Beynəlxalq hüququn işləmədiyi, qlobal təhlükəsizlik arxitekturasının sarsıldığı bir dövrdə geosiyasi güclərin toqquşan maraqları dünyanı qeyri-müəyyənliyə sürükləyir. Regional və qlobal miqyasda artan silahlı münaqişələr, qanlı müharibələr, siyasi böhranlar və təhlükəsizlik riskləri beynəlxalq münasibətlər sistemini sarsıdıb, bir çox bölgəni "qaynar qazan"a çevirib. Bu mürəkkəb və təhlükəli proseslərin fonunda Azərbaycanda müşahidə olunan sabitlik, inkişaf və tərəqqi xüsusi diqqət çəkir.
Prinsipial mövqe
Respublikamızın bilavasitə sərhədində yerləşən ölkələrin müharibə içərisində olduğunu nəzərə alsaq, Azərbaycanda hökm sürən sabitliyin və təhlükəsizliyin real əhəmiyyəti daha aydın şəkildə ön plana çıxır. Öz milli maraqlarını qorumağı və daxili asayişini ən yüksək səviyyədə saxlamağı bacaran ölkəmiz artıq təkcə öz vətəndaşları üçün deyil, region üçün də "təhlükəsizlik adası"na çevrilib. Bu isə məqsədyönlü və uzaqgörən dövlət siyasətinin məntiqi nəticəsidir.
Azərbaycanın təhlükəsizlik modelinin ən parlaq səhifəsi 2020-ci ildə qazanılan tarixi Zəfərdir. Uzun illər torpaqları işğal altında qalan, lakin buna rəğmən hər zaman sülh və danışıqlar yoluna üstünlük verən dövlətimiz nəticədə öz gücü ilə ədaləti bərpa etdi. Qarabağ Zəfəri dünyaya bir mesaj idi ki, dayanıqlı sülh yalnız ədalət üzərində qurula bilər. İşğala son qoyulması təkcə ölkəmizin ərazi bütövlüyünü bərpa etmədi, həm də Cənubi Qafqazda onilliklər boyu davam edən münaqişə ocağını söndürdü. 2020-ci ildən sonra bölgədə yaranan yeni reallıqlar Azərbaycanın yürütdüyü uzaqgörən siyasətin nəticəsidir. Müharibəyə son qoymaqla regionda əməkdaşlıq üçün yeni imkanlar yaradan Azərbaycan müstəqilliyinin ilk günlərindən etibarən beynəlxalq əməkdaşlığın gücləndirilməsinin tərəfdarı, qlobal problemlərin həllində aktiv tərəfdaş kimi çıxış edib.
Təsadüfi deyil ki, Azərbaycan beynəlxalq terrorçuluğa qarşı mübarizədə ön sıralarda yer alır. Ölkəmiz qlobal təhlükəsizlik koalisiyalarının fəal üzvü olmaqla, həm də regionda radikalizmin qarşısının alınmasında mühüm rol oynayır.
O cümlədən müharibələrdən, təbii fəlakətlərdən əziyyət çəkən insanlara yardımların göstərilməsi Azərbaycanın dövlət siyasətinin prioritet istiqamətlərindəndir. Dünyanın ən ucqar nöqtələrində ehtiyacı olanlara uzanan Azərbaycanın kömək əli ölkəmizin gücünün və sülhsevər mahiyyətinin göstəricisidir.
Bu gün ölkəmizə yaxın coğrafiyalarda baş verən hadisələr hər birimizi narahat edir. Azərbaycan bütün qonşu dövlətlərlə qarşılıqlı hörmət və mehriban qonşuluq prinsipləri əsasında münasibətlər qurur. Eyni zamanda dünya nəhəngləri ilə strateji tərəfdaşlığını inkişaf etdirir. Azərbaycan heç bir halda öz ərazisindən üçüncü tərəflərə qarşı istifadə olunmasına imkan vermir və sərgilənən bu prinsipial mövqe ölkəmizi regionda yaranan gərginliklərdən sığortalayır.
İnkişaf və əməkdaşlıq yolu
Problemlərin həlli yolunun silah deyil, səmimi dialoq və diplomatik masa olduğunu hər zaman müdafiə edən Bakı bu gün münaqişə edən tərəfləri bir araya gətirə bilən, etibarlı vasitəçilik missiyasını uğurla həyata keçirən nadir paytaxtlardan biridir.
Hazırda ABŞ-dən Çinə qədər dünyanın böyük ölkələri Azərbaycanı etibarlı tərəfdaş kimi tanıyır. Bu maraq təkcə enerji resursları ilə bağlı deyil, həm də ölkəmizin bölgədəki sabitləşdirici roluna verilən qiymətdir.
2026-cı il fevralın 9-da Prezident İlham Əliyev ABŞ Ticarət Palatasının beynəlxalq üzvlərlə əlaqələr, Yaxın Şərq və Türkiyə üzrə baş vitse-prezidenti Kuş Çoksinin başçılıq etdiyi nümayəndə heyətini qəbul edib. Həmin görüşdə dövlətimizin başçısı vurğulayıb ki, beynəlxalq əlaqələrimizin coğrafiyası da genişlənir: "Bir çox ölkələrlə imzalanmış strateji tərəfdaşlıq sənədləri, sazişlər və bəyannamələr var. Ölkələrdən bəziləri bir-biri ilə yaxşı münasibətdə deyil. Lakin mən hər zaman demişəm ki, Azərbaycan heç vaxt toqquşma yeri olmayacaq, əməkdaşlıq məkanı olacaq".
Dövlət başçısı onu da əlavə edib ki, ölkəmizin inkişaf gündəliyi göstərir ki, biz düz yoldayıq.
Azərbaycanın uğuru təhlükəsizliklə inkişafın vəhdətindədir. Sabitlik olmayan yerdə nə iqtisadi tərəqqidən, nə də sosial rifahdan danışmaq olar. Həyata keçirilən Bakı-Tbilisi-Ceyhan, "Cənub qaz dəhlizi" kimi enerji layihələri, Orta dəhlizin timsalında logistik imkanları Azərbaycanı enerji və nəqliyyat təhlükəsizliyinin mərkəzinə çevirib.
Dünyada qida və enerji böhranının yaşandığı bir vaxtda Azərbaycan Avropanın və regionun təminatçısı rolunda çıxış edir. Bu, ölkəmizin beynəlxalq nüfuzunu artırmaqla yanaşı, həm də milli təhlükəsizliyini təmin edir.
Azərbaycan bu gün qlobal siyasi fırtınaların baş verdiyi dünyada sabitlik məkanı kimi diqqət mərkəzindədir. Bakının sülhsevər siyasəti öz gücünə, haqlı mövqeyinə və milli birliyə olan inamından qaynaqlanır.
Azərbaycan hər zaman ölkələr arasında yaranmış gərginliyin qarşılıqlı anlaşma yolu ilə həllinin tərəfdarıdır və bu prosesə töhfə verməyə hazırdır. Onun hədəfi təkcə öz sərhədlərimiz daxilində deyil, bütün regionda dayanıqlı sülhün və tərəqqinin hökm sürməsidir.
Prezident İlham Əliyevin rəhbərliyi ilə həyata keçirilən siyasətin mərkəzində milli maraqlar dayanır. Azərbaycan heç bir kənar diktəni qəbul etmir, öz yolunu özü müəyyən edir. Məhz bu müstəqil siyasət imkan verir ki, ölkəmiz qlobal böhranların, münaqişələrin baş verdiyi bir vəziyyətdə öz sabitliyini və inkişaf tempini qorusun və müəyyənləşdirdiyi düzgün yolla gələcəyə doğru inamla addımlasın.
Yasəmən MUSAYEVA,
"Azərbaycan"
