Qəhrəman oğullar yetişdirən diyarlarımızdan biri də Biləsuvardır. Adlarını hərb salnaməmizə qızıl hərflərlə həkk edən Mübariz İbrahimov, Babək Mahmudlu, Elgün Əliyev kimi yüzlərlə igid məhz bu torpağın yetirmələridirlər. Vətən savaşında keçdiyi şərəfli döyüş yolu ilə Biləsuvarın fəxrinə çevrilən oğullardan biri də Cəlal Adıböyük oğlu Rəhimovdur.
44 günlük Vətən müharibəsində torpaqlarımızın işğaldan azad edilməsi uğrunda qəhrəmanlıqla vuruşaraq Füzulidən Şuşaya - Zəfər qalamızadək möhtəşəm döyüş yolu keçən mayor Cəlal Rəhimovun əsgər yoldaşları ilə birgə savaşda düşmənə aman verməməsi, onların başına od ələyərək torpaqlarımızdan qovmaları biləsuvarlıların, bütövlükdə xalqımızın qüruruna səbəb oldu.
40 gün öncə isə qəhrəman qazimizin ömrünün 40-cı ilində qəfil ürəktutmasından vəfat etməsi xəbəri çoxlarımızı sarsıtdı…
Hələ erkən yaşlarında atasını itirmiş Cəlal Rəhimov orta məktəbdə təhsilini bitirdikdən sonra 2001-ci ildə Heydər Əliyev adına Ali Hərbi Məktəbə daxil olub, oranı 2005-ci ildə artilleriya zabiti kimi başa vurub. Azərbaycan Ordusunun zabiti kimi Qusarda və cəbhə bölgəsində - Murovda vətənə layiqli xidmət göstərib.
Mayor Cəlal Rəhimov 2020-ci ilin payızında başlamış İkinci Qarabağ müharibəsində Füzuli, Xocavənd, Tuğ, Daşaltı, Şuşa uğrunda qəhrəmancasına döyüşüb. Artilleriya komandiri kimi düşmənə sarsıdıcı zərbələr vurub. O, torpaqlarımızın azad olunması uğrunda döyüşlərdə göstərdiyi şəxsi şücaət və igidliyə, qüsursuz xidmətə görə, habelə "Füzulinin azad olunmasına görə" və "Xocavəndin azad olunmasına görə" çoxsaylı medallarla təltif olunub.
"Biləsuvarın qəhrəman övladlarından, kapitan Elgün Əliyevə zəng edərək "Xocavəndin azad olunmasına görə" və "Füzulinin azad olunmasına görə" medalları ilə təltif edilməsi münasibəti ilə onu təbrik etdim. Onun kimi oğullarımızla qürur duyduğumuzu bildirdim. Həmçinin Biləsuvarın fəxri, düşmənin xeyli sayda canlı qüvvəsini təkbaşına məhv etmiş mayor Cəlal Rəhimov ilə də əlaqə saxladım. Göstərdiyi yüksək rəşadətə görə təşəkkür etdim, fəaliyyətində uğurlar arzuladım. Allah Azərbaycanı qorusun!" Bu sözləri 2020-ci il dekabrın 27-də Milli Məclisin deputatı Bəhruz Məhərrəmov mediaya müsahibəsində demiş, Cəlal Rəhimovun qəhrəmanlığını dilə gətirmişdi. Millət vəkilinin fikirlərinin timsalında gətirdiyimiz nümunədə olduğu kimi, haqqında eşidən hər kəs Cəlal Rəhimovun şəxsi rəşadəti ilə qürur duyurdu.
Cəlal Rəhimov Vətən müharibəsindən sonra Qarabağda qalaraq Şuşada "N" saylı hərbi hissədə artilleriya divizionunun komandiri vəzifəsində hərbi xidmətdə olub. Bir il idi ki, ehtiyata buraxılmışdı. Amma yenə də o, Vətənə xidmətini davam etdirmiş və ANAMA əməkdaşı kimi erməni qəsbkarlarından azad olunmuş torpaqlarımızın minalardan təmizlənməsində iştirak etmişdir.
Bu igid zabitimizi tanıyanlar danışırlar ki, o, müharibədə itirdiyi döyüşçü yoldaşlarını heç zaman unutmurdu, II Fəxri xiyabana, ölkəmizin digər bölgələrində yerləşən Şəhidlər xiyabanlarına tez-tez baş çəkər, qəhrəman oğullarımızın ruhlarına dualar oxuyarmış.
40 yaşı yenicə tamam olmuş Cəlal Rəhimovun nəşi doğulduğu Biləsuvar rayonunda torpağa tapşırılıb.
İgid döyüşçü cəmi 40 il yaşasa da, Vətən müharibəsində göstərdiyi rəşadətlə adını qəhrəmanlıq tariximizə yazıb əbədiyaşarlıq qazandı.
Rizvan CƏFƏROV,
"Azərbaycan"
