Noyabrın 6-da elm və təhsil nazirinin müavini Firudin Qurbanov 8 Noyabr - Zəfər Gününün altıncı ildönümü münasibətilə nazirliyin tabeliyindəki qurumlarda çalışan Vətən müharibəsi iştirakçısı və qazilərlə görüşüb.
Nazirlikdən AZƏRTAC-a bildirilib ki, görüşdə Məktəbəqədər və Ümumi Təhsil üzrə Dövlət Agentliyinin Xüsusi təhsil sektorunun müdiri, Vətən müharibəsi iştirakçısı Anar Xələfov, Elm və Ali Təhsil üzrə Dövlət Agentliyinin Beynəlxalq əməkdaşlıq şöbəsinin Xaricdə təhsil sektorunun müdiri Niftalı Qasımlı və həmin sektorun əməkdaşı Cavidan Gözəlov, Peşə Təhsili üzrə Dövlət Agentliyinin Peşə təhsilinin keyfiyyətinə nəzarət şöbəsinin əməkdaşı Elsevər Salayev, Təhsil Sisteminin İnformasiyalaşdırılması İdarəsinin Layihələrin idarəolunması və dəstək şöbəsinin əməkdaşı, Vətən müharibəsi iştirakçısı və qazisi Ayaz Əfəndiyev iştirak ediblər.
Görüşdə nazir müavini Firudin Qurbanov 44 günlük Vətən müharibəsində qazanılan tarixi Zəfərin Prezident İlham Əliyevin uzaqgörən və qətiyyətli siyasəti, ölkənin iqtisadi potensialının gücləndirilməsi, ordunun müasir texnologiyalarla təchiz edilməsi, xalqımızın birliyi və hərbçilərimizin qəhrəmanlığı sayəsində mümkün olduğunu bildirib. O, Azərbaycanın daha da güclənməsi və müasir çağırışlara hazır olması üçün süni intellekt və innovasiyaların imkanlarından səmərəli istifadənin, gənclərin gələcəyin tələblərinə uyğun hazırlanmasının vacibliyini diqqətə çatdırıb. Təhsilin sağlam, bilikli və vətənpərvər nəslin yetişdirilməsində, eləcə də ölkənin gələcək inkişafında mühüm rol oynadığını qeyd edib.
Görüşdə müharibə iştirakçılarının döyüş yolu, xatirələri və müharibədən sonrakı fəaliyyətləri barədə fikirləri dinlənilib, onları maraqlandıran məsələlər ətrafında fikir mübadiləsi aparılıb.
Sonda Vətən müharibəsi iştirakçılarına Azərbaycanın ərazi bütövlüyü uğrunda göstərdikləri xidmətlərə və qəhrəmanlığa görə minnətdarlıq ifadə olunub, onlara gələcək fəaliyyətlərində uğurlar arzulanıb.
314444444 - Copyjpg_1793831795.jpg)
