Prezident İlham Əliyevin Almaniyaya rəsmi səfəri Azərbaycan-Almaniya münasibətlərinin gələcək inkişaf perspektivləri baxımından mühüm siyasi hadisə kimi dəyərləndirilə bilər. Səfər yalnız ikitərəfli münasibətlərin növbəti mərhələsi deyil, həm də Avropada dəyişən geosiyasi və geoiqtisadi reallıqlar fonunda Bakı ilə Berlin arasında əməkdaşlığın məzmununun genişləndiyini göstərən əhəmiyyətli göstəricidir.
Milli Məclisin deputatı Sevinc FƏTƏLİYEVA qəzetimizə açıqlamasında deyib ki, son illər Avropanın enerji təhlükəsizliyi, qlobal nəqliyyat marşrutlarının transformasiyası, Orta dəhlizin strateji əhəmiyyətinin artması və Cənubi Qafqazda formalaşmış yeni reallıqlar Azərbaycanı Almaniya üçün daha mühüm tərəfdaşlardan birinə çevirib. Berlinə səfər çərçivəsində Prezident İlham Əliyevin Almaniya Kansleri Fridrix Merts ilə keçirdiyi görüş, eləcə də Alman İqtisadiyyatının Şərq Komitəsinin rəhbərliyi ilə apardığı müzakirələr münasibətlərin gələcək inkişaf istiqamətlərini müəyyən edən mühüm siyasi dialoq oldu. Tərəflər enerji təhlükəsizliyi, sənaye kooperasiyası, investisiyalar, nəqliyyat-logistika, rəqəmsal texnologiyalar və "yaşıl enerji" sahələrində əməkdaşlığın genişləndirilməsi imkanlarını müzakirə etdilər. Bu isə göstərir ki, Azərbaycan və Almaniya münasibətləri artıq ənənəvi enerji əməkdaşlığından daha geniş strateji gündəmə keçid edir.
Deputatın sözlərinə görə, Azərbaycan və Almaniya arasında münasibətlər uzun illər ərzində qarşılıqlı maraqlar əsasında inkişaf edib: "Bununla belə bəzi dövrlərdə Avropa İttifaqının ayrı-ayrı institutlarının Azərbaycana münasibətdə nümayiş etdirdiyi selektiv yanaşma siyasi dialoqun dinamikasına müəyyən təsir göstərmişdi. Lakin Almaniya hər zaman iqtisadi praqmatizmi ilə seçilən dövlət olub. Berlin Azərbaycanın Avropanın enerji təhlükəsizliyində oynadığı rolu, regionun sabitliyinə verdiyi töhfəni və nəqliyyat-logistika imkanlarını strateji baxımdan yüksək qiymətləndirib. Məhz buna görə də müəyyən siyasi fikir ayrılıqları iqtisadi əməkdaşlığın inkişafına ciddi maneə yarada bilməyib. Hazırda isə münasibətlərin inkişafı üçün daha əlverişli beynəlxalq şərait formalaşıb. Avropada enerji təhlükəsizliyi artıq iqtisadi məsələ olmaqdan çıxaraq milli təhlükəsizlik məsələsinə çevrilib. Azərbaycan isə son illərdə özünü etibarlı və məsuliyyətli enerji tərəfdaşı kimi təsdiqləyib. "Cənub qaz dəhlizi"nin uğurlu fəaliyyəti, Azərbaycanın Avropaya qaz ixracının ardıcıl şəkildə artırılması və uzunmüddətli öhdəliklərə sadiqliyi Almaniya da daxil olmaqla, Avropa dövlətləri üçün ölkəmizin əhəmiyyətini daha da artırıb".
Azərbaycanın strateji əhəmiyyətinin yalnız enerji ilə məhdudlaşmadığını deyən S.Fətəliyeva əlavə edib ki, son illər Orta dəhlizin qlobal logistika sistemində rolu əhəmiyyətli dərəcədə artıb. Avropa ilə Mərkəzi Asiyanı və Çin bazarını birləşdirən bu marşrut qlobal təchizat zəncirlərinin şaxələndirilməsi baxımından xüsusi önəm kəsb edir. Azərbaycanın müasir nəqliyyat infrastrukturu, Bakı Beynəlxalq Dəniz Ticarət Limanı, Bakı-Tbilisi-Qars dəmir yolu və digər tranzit imkanları Almaniyanın ixracyönümlü iqtisadiyyatı üçün mühüm üstünlüklər yaradır. Bu səbəbdən Berlin Azərbaycanı yalnız enerji təchizatçısı deyil, həm də Avrasiyanın mühüm logistik qovşaqlarından biri kimi qiymətləndirir. "Diqqətçəkən məqamlardan biri də Almaniyada yeni hökumətin fəaliyyətə başlamasıdır. Kansler Fridrix Mertsin rəhbərlik etdiyi hökumət iqtisadi rəqabət qabiliyyətinin artırılmasını, yeni bazarlara çıxışı və etibarlı tərəfdaşlarla əməkdaşlığın genişləndirilməsini xarici siyasətin əsas prioritetlərindən biri kimi müəyyənləşdirib. Bu yanaşma Azərbaycanla münasibətlərin inkişafı üçün də yeni imkanlar yaradıb. Çünki Azərbaycan regionda sabitlik, siyasi etibarlılıq və uzunmüddətli əməkdaşlıq baxımından Almaniyanın maraqlarına cavab verən azsaylı tərəfdaşlardan biridir. Prezident İlham Əliyevin Alman İqtisadiyyatının Şərq Komitəsinin nümayəndələri ilə görüşü də bu baxımdan xüsusi əhəmiyyət daşıyır. Alman şirkətləri Azərbaycanın sənaye parklarında, bərpaolunan enerji layihələrində, rəqəmsal iqtisadiyyatın inkişafında, nəqliyyat-logistika infrastrukturunda və sənaye istehsalında iştirak imkanlarını genişləndirməkdə maraqlıdırlar. Xüsusilə Qarabağ və Şərqi Zəngəzur iqtisadi rayonlarında həyata keçirilən genişmiqyaslı bərpa və yenidənqurma işləri alman biznesi üçün yeni əməkdaşlıq platformaları yarada bilər. Bu, iqtisadi münasibətlərin keyfiyyətcə yeni mərhələyə keçməsinin göstəricilərindən biridir", - deyə o bildirib.
Deputat qeyd edib ki, münasibətlərin inkişafına təsir edən digər mühüm amil regionda yaranmış yeni siyasi reallıqdır. Azərbaycan öz suverenliyini tam bərpa edib. Artıq Cənubi Qafqazın gündəliyi münaqişə deyil, regional əməkdaşlıq, iqtisadi inteqrasiya və nəqliyyat-kommunikasiya layihələrinin icrasıdır. Avropanın aparıcı dövlətləri, o cümlədən Almaniya da bu reallığı nəzərə alaraq regionla bağlı siyasətini tədricən daha praqmatik əsasda qurmağa başlayır. Bu yanaşma həm iqtisadi maraqların təmin olunmasına, həm də Cənubi Qafqazda uzunmüddətli sabitliyin möhkəmlənməsinə xidmət edir. Müasir beynəlxalq münasibətlər göstərir ki, qarşılıqlı hörmətə, dövlətlərin suverenliyinə və milli maraqların nəzərə alınmasına əsaslanan praqmatik əməkdaşlıq daha dayanıqlı nəticələr verir.
S.Fətəliyeva vurğulayıb ki, bütövlükdə, Prezident İlham Əliyevin Almaniyaya rəsmi səfəri Azərbaycan-Almaniya münasibətlərinin yeni inkişaf mərhələsinə qədəm qoyduğunu göstərir: "Əgər əvvəlki dövrdə əməkdaşlığın əsasını enerji sektoru təşkil edirdisə, hazırda gündəlik sənaye kooperasiyası, yüksək texnologiyalar, rəqəmsal iqtisadiyyat, "yaşıl enerji", logistika və investisiyalar istiqamətində əməkdaşlıq əhəmiyyətli dərəcədə genişlənir. Mövcud geosiyasi şərait və tərəflərin qarşılıqlı maraqları nəzərə alındıqda Bakı ilə Berlin arasında münasibətlərin yaxın illərdə daha sistemli, çoxşaxəli və strateji xarakter alacağı gözlənilir".
Əsmər QARDAŞXANOVA,
"Azərbaycan"
