Moldova Xarici İşlər Nazirliyi pilotsuz uçuş aparatının (PUA) Moldova hava məkanını icazəsiz keçməsini pisləyir. Belə ki, PUA Vinnitsa bölgəsindəki Mogilyov-Podolski tərəfindən Oknitsa rayonunun Savka kəndi istiqamətində dövlət sərhədini keçib.
AZƏRTAC xəbər verir ki, nazirlik bir daha “Moldova Respublikasının suverenliyinə və hava məkanına ciddi şəkildə riayət edilməsinin zəruriliyini” vurğulayıb.
Hakimiyyət orqanları bu cür hərəkətlərin vətəndaşların təhlükəsizliyini risk altına qoyduğunu və hava məkanının təhlükəsizliyinə təsir etdiyini vurğulayır.
“Hadisə ölkənin suverenliyinin və ərazi bütövlüyünün yolverilməz şəkildə pozulmasıdır və vətəndaşlarımızın təhlükəsizliyini riskə atır. Biz beynəlxalq hüquq normalarına uyğun olaraq bir daha Moldovanın suverenliyinə və hava məkanına ciddi şəkildə riayət edilməsinin zəruriliyini vurğulayırıq”, - deyə nazirlik bildirib.
Bu gün Moldova ərazisində pilotsuz uçuş aparatı (PUA) aşkar edilib. O, vətəndaşlar tərəfindən Beltsı şəhəri üzərində və Ungen rayonuna doğru hərəkət edərkən müşahidə edilib. Daha sonra dron Hınçeşt rayonunda qeydə alınıb, o ölkənin cənubuna tərəf hərəkət edirdi. PUA Hınçeşt rayonunun Mingir yaşayış məntəqəsi yaxınlığında radarlardan itib. Dron Kaqul rayonunun Kolibaş yaşayış məntəqəsi yaxınlığında yenidən radarda peyda olub, daha sonra Kaqul rayonunun Kışlitsa Prut kəndini keçib. Aparat Curculeşt rayonunda radarlardan yox olub.
İcazəsiz uçuşla bağlı ölkənin şimal və mərkəzi hissələrində hava məkanı müvəqqəti olaraq bağlı olub. İcazəsiz uçuş Rusiyanın Ukraynanın qərb bölgələrinə güclü hücumu nəticəsində baş verib.
Ukraynada müharibənin başlanğıcından bəri Moldovanın hava məkanı 40-dan çox icazəsiz müdaxiləyə məruz qalıb. Moldova hakimiyyəti təyin olunmuş Rusiya səfirinə etiraz notaları göndərərək vurğulayıb ki, dronlar birbaşa Moldovanı hədəf almasa da, Ukraynaya hücumlarla əlaqəli trayektoriyaları milli təhlükəsizlik üçün artan riskdir.
jpg_1782323954.jpg)
