Tovuz rayonunun təbii qazla təmin olunmayan Baqqallı kəndinin qazlaşdırılması ilə bağlı məktubunuza "Azəriqaz" İstehsalat Birliyində baxılmışdır.
Məlumat üçün bildiririk ki, qazlaşma tədbirləri "Azəriqaz" İB-nin maliyyə imkanları çərçivəsində mərhələli şəkildə davam etdirilir. "Azəriqaz" İstehsalat Birliyinin mövcud maliyyə resurslarından səmərəli şəkildə istifadə olunması, həmin resurslar çərçivəsində əhalinin qaz təchizatı şəbəkəsinə əlçatanlığının təmin edilməsi və daha çox əhalinin qaz şəbəkəsi ilə əhatələnməsi məqsədilə 2021-ci ildən etibarən qazlaşdırılması aparılan bütün yaşayış məntəqələrində mərhələli şəkildə yalnız daşıyıcı və paylayıcı küçə qaz xətləri çəkilir ki, bunun nəticəsində əhalinin qaz şəbəkəsinə əlçatanlığı təmin olunmuş olur.  Tovuz rayonu üzrə əhali istehlakçılarının qaz təchizatı şəbəkəsi ilə əhatələnməsi səviyyəsi 01.06.2024-cü il tarixə 92,6 faiz təşkil etmişdir. Cari ildə birliyin maliyyə resursları hesabına rayonun Şamlıq kəndinin daşıyıcı və paylayıcı qaz kəmərlərinin tikintisi, həmçinin Aşağı Mülkülü, Vahidli, Aşağı Öysüzlü, Dondar Quşçu, Əyyublu, Düz Qırıqlı, Azaflı, Xatınlı, Qədirli, İbrahimhacılı, Sarıtala, Aşağı Quşçu kəndlərinin və Qovlar qəsəbəsinin yeni yaşayış massivlərinin paylayıcı qaz kəmərlərinin tikintisi nəzərdə tutulmuşdur.
Tovuz rayonunun qazlaşdırılmamış digər kəndlərinin və yeni yaşayış massivlərinin qazlaşdırılması məsələsinə növbəti mərhələlərdə baxılacaqdır.

Ramil İSGƏNDƏROV,
Baş direktorun əsaslı tikinti üzrə müavini