“OpenAI” şirkətinin illik daimi gəlirinin həcmi ilk dəfə olaraq 10 milyard dolları keçib.
AZƏRTAC CNBC telekanalına istinadla xəbər verir ki, bu nəticə 2022-ci ilin noyabrında “ChatGPT”nin istifadəyə verilməsindən cəmi üç ilə yaxın müddətdə əldə olunub və süni intellekt əsaslı məhsullara tələbatın sürətlə artdığını təsdiqləyir.
Gəlirə “ChatGPT”nin istehlakçılar üçün olan versiyası, korporativ “ChatGPT” və API-dən əldə olunan vəsait daxildir. Buraya “Microsoft” şirkətindən alınan lisenziya haqları və digər qeyri-daimi razılaşmalar daxil deyil. Ötən il eyni göstərici 5,5 milyard dollar təşkil etmişdi ki, bu da təxminən ikiqat artımı göstərir.
Buna baxmayaraq, “OpenAI” hələ də zərər edən şirkətdir. Ötən il onun itkiləri 5 milyard dollara çatıb. Buna rəğmən, süni intellekt sahəsində nəhəng oyunçu sayılan şirkət 2029-cu ilə qədər illik gəlirini 125 milyard dollara çatdırmağı planlaşdırır. Bu planlarla tanış mənbə bildirib ki, belə ümidlər iri investorların davamlı marağını təsdiqləyir.
Cari ilin mart ayında “OpenAI” özəl texnologiya sahəsi üçün rekord hesab edilən 40 milyard dollarlıq maliyyələşdirmə mərhələsini başa çatdırıb. Hazırkı gəlir səviyyəsinə əsasən, şirkətin dəyəri illik gəlirin təxminən 30 misli qədər qiymətləndirilir ki, bu da biznesin böyük miqyasda genişlənməsi ilə bağlı gözləntiləri əks etdirir.
Bundan əlavə, may ayında “OpenAI” məşhur dizayner Conatan Ayv tərəfindən qurulmuş “io” startapı ilə birləşdiyini elan edib. Bu, şirkətin tarixində ən iri satınalma olub və ona 6,5 milyard dollara başa gəlib.
“OpenAI”-ni “Microsoft”, “SoftBank”, “Thrive” və “Altimeter” kimi böyük investorlar dəstəkləyir. Mart ayının sonuna olan məlumata görə, “ChatGPT”nin həftəlik aktiv istifadəçilərinin sayı 500 milyona çatıb, korporativ abunəçilərin sayı isə cəmi iki ay ərzində 2 milyondan 3 milyona yüksəlib.
Ekspertlər qeyd edirlər ki, şirkət pullu məhsullar çeşidini fəal şəkildə genişləndirir və “Google” da daxil olmaqla digər süni intellekti inkişaf etdirənlərlə rəqabəti gücləndirir. Bu addımlar “OpenAI”nin korporativ proqram təminatı və inkişafçılar üçün alətlər bazarında mövqeyini möhkəmləndirməyə yönəlib.
