R.Əlihəsənov adına Masallı şəhər 1 saylı tam orta ümumtəhsil məktəbində müəllimlərin, valideynlərin və şagirdlərin iştirakı ilə yetkinlik yaşına çatmayanlar və gənclər arasında narkomanlığın, eləcə də erkən nikaha cəlb olunma hallarının qarşısının alınması məqsədilə maarifləndirici tədbir keçirilib.
Tədbirdə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu illər üçün Dövlət Proqramı”nın həyata keçirilməsi üzrə tədbirlər planının icra vəziyyəti müzakirə edilib.
Tədbirin əvvəlində Ulu Öndər Heydər Əliyevin və torpaqlarımızın işğaldan azad olunması uğrunda gedən döyüşlərdə qəhrəmancasına şəhid olmuş igidlərin xatirəsi bir dəqiqəlik sükutla yad edilib.
Tədbirdə Masallı Rayon İcra Hakimiyyəti başçısı Aparatının Ərazi-təşkilat və ictimai-siyasi məsələlər şöbəsinin İctimai-siyasi və humanitar məsələlər sektorunun müdiri Abbas Abbaszadə, Masallı Rayon Polis Şöbəsinin rəis müavini İxtiyar Talıbov, Lənkəran-Astara Regional Təhsil İdarəsinin Masallı rayonu üzrə Təhsil sektorunun aparıcı məsləhətçisi Hörmət Balakişiyev və Masallı Rayon Polis Şöbəsinin YYÇPİTQ-nın baş inspektoru Samid Əliyev çıxış ediblər.
Çıxışlarda gənclər arasında narkomanlığın qarşısının alınması, şagirdlərin qadağan olunmuş əşyaları (kəsici və deşici alətlər, təhlükəli, zəhərli və tez alışan maddələr, kibrit və alışqanlar, siqaret və elektron siqaretlər, spirtli içkilər, təsbeh və zinət əşyaları kimi aksesuarlar, qanunla istifadəsi qadağan olunmuş maddələr) məktəbə gətirməmələri, yetkinlik yaşına çatmayanlar tərəfindən törədilən cinayətlərin hüquqi nəticələri barədə ətraflı məlumat verilib. Bununla yanaşı, yetkinlik yaşına çatmayanların təzyiqə və məişət zorakılığına məruz qalması, cinsi və əmək istismarına təhrik olunması, erkən nikaha cəlb edilməsi kimi halların qarşısının alınması istiqamətində maarifləndirici tövsiyələr səsləndirilib.
Tədbir çərçivəsində Azərbaycan Respublikası Daxili İşlər Nazirliyinin Polis Akademiyasında təhsil imkanları barədə də şagirdlərə məlumat verilib və gənclər bu istiqamətdə təşviq olunublar. Sonda şagirdləri maraqlandıran suallar cavablandırılıb və tədbirin maarifləndirici əhəmiyyəti xüsusi vurğulanıb.
Seyran CAVADOV,
“Azərbaycan”
jpg_1790976482.jpg)
