Fransanın “Le Parisien” qəzeti prezident Emmanuel Makronun hökumətin qapalı iclasında verdiyi bəyanatı dərc edib. Makron bildirib ki, “İsrailin baş naziri Binyamin Netanyahunun ölkəsinin BMT-nin qərarı ilə qurulduğunu xatırlaması lazımdır və buna görə də o, bu beynəlxalq təşkilatın qərarlarına məhəl qoymaya bilməz”.

Bu bəyanata cavab olaraq baş nazirin Ofisi sərt ifadələrlə çıxış edib: “Fransa prezidentinə xatırlatma: İsrail dövləti BMT-nin qərarı ilə deyil, Qurtuluş Müharibəsindəki qələbə ilə qurulub, qanla qalib gəlib. Qəhrəman döyüşçülərin əksəriyyəti Holokostdan sağ çıxanlar, o cümlədən Fransadakı Vişi rejimi tərəfindən təqib edilənlər idi”.

Mignews.com portalının xəbərinə görə, Makronun açıqlamaları Fransa ictimaiyyəti arasında kəskin reaksiyaya səbəb olub, bir çoxları onun sözlərindən şok və narazılıq ifadə ediblər. Sosial şəbəkələrdə Fransa vətəndaşlarının çoxsaylı tənqidi şərhləri ilə canlı müzakirələr başlayıb. Bir istifadəçi qeyd edib: "İsrail BMT tərəfindən yaradılmayıb. Bu, üç min ildir mövcud olan sivilizasiyadır və Baş Assambleyanın 29 noyabr 1947-ci il tarixli qətnaməsi sadəcə tövsiyə xarakteri daşıyır. BMT-nin dövlət yaratmaq səlahiyyəti yoxdur. Tarix və beynəlxalq hüququ öyrənmək lazımdır”.

Başqa bir istifadəçi bunu daha açıq şəkildə ifadə edib: “İsrail Holokostun altı milyon qurbanının külündən yaradılıb, onların bir çoxunu Fransa bütün müharibə boyu əməkdaşlıq etdiyi nasistlərin düşərgələrində ölümə göndərib”. 

Digər bir şərhçi isə əlavə edib: "Bu, cəhalət və alçaqlığın vəhdətidir”.

Rizvan CƏFƏROV,

“Azərbaycan”