Konstitusiyaya dəyişikliklərə əsasən, "insan ya kişidir, ya da qadın"
Macarıstan parlamenti aprelin 14-də ölkə konstitusiyasına "insan ya kişi, ya da qadın" kimi düzəliş etmək üçün səs verib. Deputatlar tərəfindən dəstəklənən qanunvericiliyə edilən digər dəyişiklik, bəzi müşahidəçilərin fikrincə, LGBT yürüşlərinin qadağan edilməsini dəstəkləmək məqsədi daşıyır.
Yerli media Macarıstan konstitusiyasının nikah və ailə ilə bağlı maddəsinə yeni redaksiyanı sitat gətirir: "Macarıstan nikah institutunu kişi və qadının könüllü birliyi, ailəni isə millətin varlığının əsası kimi müdafiə edir. Ailə nikah və valideyn-övlad münasibətlərinə əsaslanır. İnsan ya kişidir, ya qadındır. Ata kişidir, ana qadındır".
Bildirilir ki, müvafiq düzəlişləri 140 deputat dəstəkləyib. 21 deputat dəyişikliyin əleyhinə çıxış edib.
Beləliklə, konstitusiyanın dəyişdirilməsi üçün lazım olan üçdə iki səs çoxluğu əldə edilib. Müvafiq dəyişiklikləri Macarıstanın Baş naziri Viktor Orban və onun FIDES partiyası dəstəkləyib.
DPA agentliyinin xəbərinə görə, səsvermə zamanı müxalifət tərəfdarları Macarıstan parlamentinin binası qarşısında etiraz aksiyası keçiriblər. Aksiya daha əvvəl "Momentum" adlı kiçik bir partiya tərəfindən çağırılıb.
Macarıstanda LGBT paradları qadağan edilib
Ötən ayın 18-də Macarıstan parlamenti ölkədə əvvəllər hər il baş tutan LGBT tədbirlərinin keçirilməsini qadağan edib. Hökumət bu qərarı ilk növbədə uşaqları homoseksuallıq mövzusu ilə təmasdan qorumaq istəyi ilə əsaslandırıb.
Macarıstan konstitusiyasına aprelin 14-də qəbul edilmiş əlavələrdən birində uşaqların "zehni və əxlaqi inkişafının" qorunmasının yaşamaq hüququ istisna olmaqla, bütün digər əsas hüquqlardan üstün tutaraq fundamental hüquq statusu qazanması təklif edilir.
Tənqidçilər qeyd edirlər ki, bu, mahiyyət etibarilə sərbəst toplaşmaq hüququnun əhəmiyyətini itirmək anlamına gəlir.
Preambulası "Milli etiqad" adlanan Macarıstanın hazırkı konstitusiyası ölkə parlamenti tərəfindən 2011-ci il aprelin 18-də qəbul edilib və 2012-ci il yanvarın 1-də qüvvəyə minib.
Bildirildiyinə görə, Macarıstan konstitusiyasına edilən hazırkı düzəlişlər sayca 15-cidir.
Rizvan CƏFƏROV,
"Azərbaycan"
jpeg_1766065291.jpeg)
jpeg_1766054270.jpeg)
