İtaliya mətbuatında 20 Yanvar faciəsinin 35-ci ildönümü ilə bağlı məqalələr dərc olunub.
AZƏRTAC xəbər verir ki, “Giornale Diplomatico”, “Kmetro0”, “Scenari Internazionali”, “Aska News”, “Gazzetta Matin”, “Agenzia Nova”, “Opinio Juris” kimi saytların yaydığı materiallarda 20 yanvar tarixinin hər il Azərbaycanda Ümumxalq Hüzn Günü kimi qeyd olunduğu bildirilir.
Yazılarda qeyd edilir ki, Azərbaycan xalqının milli azadlıq ruhunun, müstəqillik arzusunun qarşısının alınması məqsədilə keçmiş SSRİ qoşunları 1990-cı il yanvarın 19-dan 20-nə keçən gecə mülki əhaliyə qarşı amansızcasına qətliam törədib. Bakıda və ölkənin digər bir neçə rayon və şəhərlərində törədilmiş bu ağır cinayət nəticəsində 150 nəfər dinc sakin öldürülüb, 744 nəfər yaralanıb, 841 nəfər qanunsuz olaraq həbs edilib. Azərbaycan xalqının Ümummilli Lideri Heydər Əliyev bu ağır cinayətin SSRİ rəhbərliyi tərəfindən törədildiyini dünya ictimaiyyətinə çatdırıb, Ulu Öndər sayəsində 20 Yanvar hadisələrinə siyasi-hüquqi qiymət verilib.
Vurğulanır ki, Azərbaycan beynəlxalq cinayətlərin ən ağır növlərindən biri olan insanlıq əleyhinə cinayət kimi 20 Yanvar hadisələrinin tövsif edilməsini və bu cinayətləri törətmiş hərbi qulluqçularla yanaşı, onların icrasına əmr verən şəxslərin də cinayət məsuliyyətinə cəlb olunmasını təmin etmək üçün beynəlxalq təşkilatları və dünya ictimaiyyətini ədalətli mövqe nümayiş etdirməyə çağırır.
Materiallarda Azərbaycan Respublikasının insan hüquqları üzrə müvəkkilinin və Xarici İşlər Nazirliyinin 20 Yanvar faciəsi ilə bağlı yaydığı bəyanatlardan fikirlərə yer verilib.
