BMT-dəki diplomatik qələbə dostluğun, etibarlı tərəfdaşlığın və Qoşulmama Hərəkatına uğurlu sədrliyin yaratdığı reallıqdır
Ermənistan və ona havadarlıq edən Fransa və ABŞ-nin yenidən Azərbaycana qarşı bədnam niyyətləri fiaskoya uğradı. Bu üç ölkə hər zamankı kimi "birləşərək" BMT Təhlükəsizlik Şurası çərçivəsində ölkəmizə qarşı hansısa qətnamənin qəbuluna çalışsa da, cəhdləri uğursuz alındı.
Səbəb isə uydurmalara yox, həqiqətlərə əsaslanmaq oldu. Həm Azərbaycanın, həm dost ölkələrin, həm də Qoşulmama Hərəkatına üzv dövlətlərin nümayəndələrinin əsl reallıqları göstərmələri kifayət etdi ki, BMT "üç bacı"ya rədd cavabı versin.
Əlbəttə ki, bu, Azərbaycan diplomatiyasının növbəti uğuru kimi dəyərləndirilməlidir. O diplomatiya ki, konturları
İlham Əliyev tərəfindən çox mükəmməl şəkildə hazırlanıb və uğurla icra olunur.
Cənubi Qafqazı yenidən münaqişə ocağına çevirmək istəyirlər
Həqiqət budur ki, İkinci Qarabağ müharibəsindən sonra Azərbaycan təkcə Ermənistanla deyil, bu ölkəyə dəstək göstərən dövlətlərlə, ümumilikdə dünya erməniliyi ilə informasiya cəbhəsində siyasi, diplomatik, həmçinin hüquqi müstəvidə mübarizə aparır. Haqq və ədalətin tərəfində olan İlham Əliyev regionda sülhün, təhlükəsizliyin təmin olunmasını siyasətinin prioritetinə çevirib və bu istiqamətdə irəli sürülən istənilən təklifi dəstəkləyir. Amma görünən odur ki, bəzi qüvvələr Qafqazda sülhün təmin olunmasında nəinki maraqlıdırlar, hətta regionun yenidən münaqişə ocağına çevrilməsi üçün bütün çirkinliklərə əl atmağa hazırdırlar.
Amma İlham Əliyevin yaratdığı yeni reallıqlar, yürütdüyü tam müstəqil siyasət və qlobal lider kimi artan nüfuzu buna imkan vermir. Sözü imzası qədər keçərli olan, verdiyi vədləri hər zaman reallaşdıran və etibarlı tərəfdaş statusuna sahiblənən İlham Əliyev həyata keçirdiyi diplomatiya ilə əsl reallığı nümayiş etdirir. Həqiqət tərəfdarları isə Azərbaycanın yanında olduqlarını, ölkəmizə hər zaman dəstək göstərdiklərini əməlləri ilə sübuta yetirirlər.
Elə Ermənistan və havadarlarının təkidi ilə keçirilən BMT Təhlükəsizlik Şurasının son iclasında qardaş Türkiyənin, dost Albaniyanın, eləcə də Azərbaycanın sədrlik etdiyi Qoşulmama Hərəkatının üzv dövlətlərinin BMT-dəki daimi nümayəndələrinin sərgilədikləri mövqe bunu bir daha təsdiqləyir.
Qardaş Türkiyənin nümayəndəsi Sedat Önal ölkəsinin Ermənistanın Təhlükəsizlik Şurası da daxil olmaqla beynəlxalq platformalardan Laçın yolu ilə bağlı siyasi iddialarını səsləndirmək cəhdlərindən narahatlığını ifadə etdi.
Azərbaycanın haqlı mövqeyini müdafiə edən, Ağdam-Xankəndi yolundan humanitar məqsədlər üçün istifadəni dəstəkləyən ölkələrdən biri də Albaniya idi. Bu ölkəni BMT-də təmsil edən daimi nümayəndə Ferit Hoca isə diplomatlar qarşısında bəyan etdi ki, humanitar tələbatlar siyasiləşdirilməməli və digər məsələlərin həlli üçün sui-istifadə olunmamalıdır. Söhbət humanitar məsələdən gedirsə, mümkün olan hər şeyi, bütün variantları nəzərdən keçirmək mümkündür. Bura digər yollar, həmçinin təklif olunan Xankəndi - Ağdam yolu da daxildir. Albaniya mayın əvvəlində ABŞ-də baş tutan sülh danışıqlarından sonra Azərbaycan-Ermənistan münasibətlərinin normallaşması prosesinin aktivləşməsini alqışlayır.
Azərbaycanın sədrlik etdiyi Qoşulmama Hərəkatının üzv dövlətlərinin BMT-dəki daimi nümayəndələri də ölkəmizin haqlı mövqeyini müdafiə etdikləri üçün bu ali təşkilat Ermənistan və havadarlarının məkrli niyyətlərinə "yox" dedi. Xüsusən də erməni diasporu və lobbisinin, ermənipərəst dairələrin səyləri nəticəsiz qaldı.
Nüfuz artır, geosiyasi çəki yüksəlir, etibarlı tərəfdaşlar çoxalır
Bu proses İlham Əliyev diplomatiyasının növbəti təntənəsi, Ermənistanın, xüsusən də Fransanın daha bir uğursuzluğu ilə yadda qaldı.
Bütün bunlar, həqiqətən də, Azərbaycanın doğru yolda olduğunun və İlham Əliyevin qlobal nüfuzunun gündən-günə yüksəldiyinin bariz təcəssümüdür. Xüsusən də dövlət başçımızın Qoşulmama Hərəkatının sədri kimi ortaya qoyduğu fəaliyyət, irəli sürdüyü qlobal təşəbbüslər Azərbaycanın geosiyasi əlaqələrinin daha da möhkəmlənməsini, etibarlı tərədaşlarının daha da artmasını şərtləndirib.
Reallıq budur ki, İlham Əliyev beynəlxalq problemlərin həllində mühüm rol oynayan və müasir dövrdə çoxqütblü, ədalətli və demokratik dünya düzəninin formalaşmasında müsbət potensiala malik olan Qoşulmama Hərəkatına sədrliyi üzv dövlətlərin mütləq əksəriyyəti tərəfindən təqdir edilir. Əgər belə olmasaydı, bitən sədrlik müddəti yenidən Azərbaycana həvalə olunmazdı.
Qoşulmama Hərəkatı heç bir hərbi bloka qoşulmayan 120 dövləti özündə birləşdirir. BMT-dən sonra dünya ölkələrini bir araya gətirən ikinci böyük təşkilatdır. Hərəkata sədrlik müxtəlif regional qruplardan olan dövlətlər arasında üç ildən bir rotasiya edilir. Müvafiq regional qrupdan namizədliyi təqdim etmiş dövlət təşkilatın sammiti vaxtı bütün üzv dövlətlərin razılığı ilə sədr seçilir. Sədr dövlət üçillik sədrlik müddətinin əvvəlində zirvə görüşünə və sədrliyinin axırıncı ilində nazirlər iclasına evsahibliyi edir. Ölkəmiz Qoşulmama Hərəkatına 2011-ci ildə üzv olub və 2019-cu ildən təşkilata sədrlik edir. 2022-ci ildə ölkmizin hərəkata sədrlik müddət başa çatsa da, üzv dövlətlər Azərbaycanın təşkilata uğurlu sədrliyini nəzərə alaraq əlavə 1 il müddətinə sədrlik etməsi ilə bağlı təklif irəli sürdülər. İlham Əliyev hərəkatın fundamental prinsiplərinə və dəyərlərinə olan sadiqliyini və mürəkkəb dövrdə təşkilata səmərəli sədrliklə bağlı qazandığı dəyərli təcrübəni nəzərə alaraq, bu müraciətə müsbət cavab verdi. Beləliklə, Azərbaycanın hərəkata sədrliyi 2023-cü ilə qədər uzadıldı.
Ölkəmiz hərəkata sədrliyi dövründə beynəlxalq hüququ və ədaləti daim müdafiə etdi. İlham Əliyev hərəkata rəhbərliyi dövründə bu prinsiplərə sadiq qaldı və bununla da üzv dövlətlərin onun siyasətinə göstərdiyi etimad daha da yüksəldi. Qoşulmama Hərəkatına üzvlükdən qısa müddət sonra Azərbaycanın quruma sədrlik etməsi üzv dövlətlərin ölkəmizə olan inamının və Azərbaycanın beynəlxalq nüfuzunun artmasının, eləcə də respublikamızın qlobal səylərinin beynəlxalq ictimaiyyət tərəfindən dəstəklənməsinin parlaq nümunəsinə çevrildi.
Vətən müharibəsindən öncə Qoşulmama Hərəkatına üzvlük və sədrlik Azərbaycana Ermənistanın təcavüzünə qarşı mübarizədə güclü beynəlxalq dəstək qazandırmışdı. Məhz genişmiqyaslı uğurlu beynəlxalq fəaliyyəti sayəsində ölkəmizin keçmiş Qarabağ münaqişəsi ilə bağlı mövqeyi hərəkatın sənədlərində dəstəklənirdi.
Qoşulmama Hərəkatının Azərbaycana siyasi dəstəyinin bariz nümunəsi kimi Vətən müharibəsi dövründə BMT Təhlükəsizlik Şurasının daimi üzvləri olan ATƏT-in keçmiş Minsk qrupunun həmsədr ölkələrinin hazırladıqları bəyanat layihəsini də geri götürməyə məcbur olmasını göstərmək olar. 2020-ci və 2022-ci illərdə BMT Təhlükəsizlik Şurasında Azərbaycana qarşı irəli sürülmüş qərəzli təşəbbüslərin qarşısı da hərəkata üzv dövlətlər tərəfindən alınıb.
Zaman göstərir ki, Qoşulmama Hərəkatının nüfuzu getdikcə daha da artır. Üzv dövlətlərin də dəstəklədiyi kimi Azərbaycanın hərəkata sədrliyi dövrü daha uğurlu olmaqla yanaşı, mühüm töhfələrlə nəticələnib. Təsisatda Azərbaycanın təşəbbüsü ilə yeni şəbəkələr yaranıb ki, bunlar da həmrəylik və qarşılıqlı dəstəyin gücləndirilməsi istiqamətində atılan addım kimi qiymətləndirilir.
Dünyada elə bir qüvvə yoxdur ki, Azərbaycana nəyisə diktə edə bilsin
Göründüyü kimi, bu gün tarixinin ən qüdrətli dövrünü yaşayan Azərbaycanın mühüm geosiyasi uğurlarından biri dünya birliyində güclü mövqeyə malik olması, beynəlxalq aləmdə söz sahibinə çevrilməsidir. Hazırda Azərbaycan regionda və dünyada öz mövqelərini sürətlə möhkəmləndirən, sosial-iqtisadi baxımdan inkişaf edərək Avroatlantik məkana inteqrasiya olunan bir ölkədir.
Bununla yanaşı, müstəqil Azərbaycan həm qüdrətli, həm də dünya miqyasında etibarlı tərəfdaş kimi tanınır. Bütün bu uğurların yeganə səbəbi isə, əlbəttə ki, ölkə lideri İlham Əliyevin yürütdüyü tam müstəqil siyasətdir. Azərbaycana rəhbərlik etdiyi 20 ildə İlham Əliyev elə bir dövlət yaradıb ki, özünün də söylədiyi kimi, mövcudluğu tarixində ölkəmiz heç zaman indiki kimi qüdrətli, güvənli, istiqrarlı olmayıb. Bu gün Azərbaycan siyasi-iqtisadi meyar və parametrlər üzrə kimdənsə asılı deyil. Hətta ölkəmiz istər iqtisadi artım, istərsə də adambaşına düşən valyuta ehtiyatları baxımından dünyada ən qabaqcıl yerlərdədir. İqtisadi müstəqillik isə siyasi müstəqilliyin möhkəmləndirilməsi baxımından əsas şərtdir. Bütün nailiyyətlər, möhtəşəm uğurlar
İlham Əliyevin yüksəliş konsepsiyasının bəhrəsidir. Artıq heç kim Azərbaycanla təhdid dili ilə danışa biməz. Bu fikirdə, bu niyyətdə olanlara İlham Əliyev çox mükəmməl şəkildə xəbərdarlıq edib: "Bu gün dünyada elə bir qüvvə yoxdur ki, hansısa qərarı bizə aşılasın, yaxud da bizə nəyisə diktə edə bilsin. Belə qüvvə yoxdur və nə qədər ki mən Prezidentəm, belə qüvvə olmayacaqdır".
Rəşad BAXŞƏLİYEV,
"Azərbaycan"
