Xocalı ikiqat bayram sevinci yaşadı
Xocalı sevinc içindədir...
Xocalı bayram edir...
Xocalılılar gülür, fərəhlənirlər...
Bir-birilərini təbrik edirlər...
Bu qədim yurdda yalnız insanlar sevinmir...
Sanki göydə günəş, yerdə oyanan torpaq, şəhərin daşı, divarı, 32 ildən sonra yurda qayıdan insanlara qucaq açan yollar, qürurla dalğalanan Zəfər bayrağımız da sevinir...
Bura gələn insanları isə Müzəffər Ali Baş Komandan İlham Əliyevin ucaltdığı Zəfər bayrağını salamlayıb, "Xoş gəldiniz" deyir...
Sanki daha qürurla, daha əzəmətlə dalğalanan müqəddəs bayrağımız dil açıb ona baxıb sinəsi fərəhlə döyünən insanlara "Mən buradayam", "Mən Xocalıdayam", "Mən suveren Azərbaycanın hər yerindəyəm" deyir...
Xocalıda möhtəşəm təntənə
Şəhər üçrəngli Zəfər bayrağımızla bayramsayağı bəzədilib. Hər qarışı şəhidlərin qanı ilə müqəddəsləşən Xocalı ələmdən nəşəyə keçib. Xocalı da, xocalılılar da bayram edirlər.
2023-cü ilin sentyabrında keçirilən lokal xarakterli antiterror tədbirləri ilə torpaqlarımızda erməni separatizminə son qoyulduqdan sonra Prezident İlham Əliyev 2024-cü il sentyabrın 18-də imzaladığı sərəncamla onlara azadlığın təntənə gününü - Xocalı Şəhər Gününü hədiyyə etdi. Bir gün sonra isə sentyabrın 19-da Azərbaycan Prezidenti İlham Əliyev 2023-cü il sentyabrın 19-da Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması və Ermənistan silahlı qüvvələrinin qalıqlarının tərk-silah edilərək torpaqlarımızdan çıxarılması, həmin ərazilərdə Azərbaycan Respublikası konstitusiya quruluşunun bərpa edilməsi məqsədilə antiterror əməliyyatına başlandığının bir ili tamam olan gün "Azərbaycan Respublikasında Dövlət Suverenliyi Gününün təsis edilməsi haqqında" sərəncam imzaladı. Bu iki sərəncam xocalılılar üçün ikiqat bayrama çevrildi.
Ümumiyyətlə, Xocalı azad edildikdən sonra çox qısa zamanda şəhər böyük tikinti meydanına, qaynar həyatın ünvanına çevrilib. Prezident İlham Əliyevin göstərişi ilə yenidən qurulan şəhərdə qısa müddətdə böyük abadlıq, quruculuq işləri görülür. İndidən şəhər gözəlliyi ilə adamı heyran edir. Reallıqdan çox gözəl tabloya bənzəyir.
Öyrənirik ki, şəhərin quruculuğu mərhələli şəkildə aparılır. Birinci mərhələdə 167 hektar ərazidə 140 fərdi ev, 48 kottec tipli ev və 9 binadan ibarət 110 evdə tikinti, təmir-bərpa və abadlıq işləri görülür. 18 hektar ərazini əhatə edən ikinci hissədə fin tipli 92 evdə tikinti, təmir-bərpa və abadlıq işləri görülür. 44 ailənin, yəni 169 nəfərin daimi məskunlaşması təmin edilib və bərpa işləri tamamlandıqca köç edən şəhər sakinlərinin sayı da artır. Bütün kommunikasiya xətləri yerin altına salınıb. Demək olar ki, şəhər üzrə bu işlərin böyük hissəsi icra edilib.
Burada əyilib bu müqəddəs torpağı öpən, sevincdən ağlayan, əllərini Tanrıya açıb dua edən, "selfi" çəkib Xocalının gözəlliklərini sosial şəbəkələrdə paylaşmağa tələsən insanlara rast gəlmək olar.
Bayram edən Xocalıda şəhərə gələn qonaqları gözəlliyi ilə "mat" qoyan, hər cür müasir tələblərə cavab verən orta məktəb binasını və uşaq bağçasını bu şəhərin simvollarından hesab etmək olar. Məktəbin qarşısındakı parkda və yaxınlıqdakı sənətkarlar məhəlləsində də qələbəlikdir.
Xocalı dərdli, əyilmiş qamətini düzəldib. Bu bayram günü illərdir gözləri qan ağlayan xocalılılar sevinmək, şənlənmək, doğma yurdun yeni büsatını görmək, bu xoşbəxt anları birgə yaşamaq üçün buraya üz tutublar. Xocalılılar artıq "qəm libası"nı çıxarıb, xoşbəxt həyatlarına dönüblər...
Gül-çiçəyə qərq olmuş parkları, geniş yaraşıqlı küçələri, durna qatarı kimi sıralanmış müasir binaları, bir-birindən gözəl evləri görüb qürur hissi keçiririk.
Prezidentin sərəncamı xocalılılara verilən yüksək dəyərdir
Bu il mayın 28-də ilk 20 şəhid ailəsi Xocalıya qayıdıb. Həmin gün Prezident İlham Əliyev, birinci xanım Mehriban Əliyeva və qızları Arzu Əliyeva bir qərinədən sonra Xocalıya dönən sakinlərlə görüşüb onlara öz xeyir-dualarını verdilər...
Şəhərdə bayramdır. Şəhər sakini Ceyran Əzizova sevincini bizimlə bölüşür:
"Bu gün tarixi bir gündür. 2023-cü il sentyabrında keçirilən antiteror tədbirləri ilə ölkəmiz əsl suverenliyinə qovuşdu. Xocalı dünyada bəşər tarixinin ən böyük faciəsi ilə tanınsa da, Xocalının azad olması ilə Azərbaycan suverenliyini tam bərpa etdi. Şanlı zəfərimizin böyük memarı İlham Əliyevin bu böyük qələbənin ildönümündə "Azərbaycan Respublikasında Dövlət Suverenliyi Gününün təsis edilməsi haqqında" sərəncam verməsini Xocalıya və xocalılılara verilən yüksək dəyər kimi qiymətləndiririk. Prezident İlham Əliyev bizə qələbənin ardınca suverenlik qürurunu da yaşatdı. Ölkəmiz 1991-ci il oktyabrın 18-də müstəqilliyini elan etsə də, əsl müstəqilliyinə və suverenliyə 2023-cü il sentyabrın 20-də qovuşdu. Bu gün bütün xalqımızın ən böyük bayramıdır".
Digər həmsöhbətimiz Şahin Əzimov isə deyir:
"Xocalıdan çıxanda 17 yaşım var idi. Dəhşətli hadisələrə şahidlik etmişəm. Ölümün, zülmün ağrılarını çəkmişəm.. Elə zənn edirdim ki, belə faciəni yaşayan insan heç vaxt sevinə, gülə bilməz... Xocalıya ilk qayıdanlardanam. Hər gün evimdən çıxanda gözüm müqəddəs Azərbaycan bayrağını gəzir. Müzəffər Ali Baş Komandanın ucaltdığı o bayraq bizim qürurumuz, sevincimiz, fərəhimizdir.
Xoş gün, fərəh və qüdrət bizlər üçün dərdi əvəz edən ən gözəl dərmandır. İlham Əliyev Xocalını azad etməklə dərdimizə dərman verdi. "Azərbaycan Respublikasında Dövlət Suverenliyi Gününün təsis edilməsi haqqında" sərəncam verməklə ömrümüzə ömür caladı... Hər il 26 fevralı göz yaşı içində qeyd edən xocalılıların indi sevinc, fərəh, 20 sentyabr günü də oldu. Sevinirəm. Dövlətimin qüdrəti ilə qürur duyuram..."
Xocalıda bayramdır. Göydə günəş gülümsəyir, yerdə isə üzündən sevinc tökülən insanlar...
Xocalı indi düşmənə gözdağıdır.
Elşən QƏNİYEV,
"Azərbaycan"
Bakı-Xocalı-Bakı
jpg_1726949778.jpg)
