Bakı minifutbol üzrə dünya çempionatını qəbul edir
İdman paytaxtına çevrilən Bakıda ən nüfuzlu beynəlxalq yarışların təşkili Azərbaycana böyük imic qazandırıb.
"Bakı-2015" ilk Avropa Oyunlarının, IV İslam Həmrəyliyi Oyunlarının, XV Avropa Gənclər Olimpiya Festivalının, "Formula-1" yarışlarının, futbol üzrə Avropa çempionatının final mərhələsinin 4 qarşılaşmasının, UEFA Avropa Liqasının finalının və müxtəlif idman növləri üzrə təşkil olunan dünya və qitə birinciliklərinin Azərbaycana həvalə edilməsi son illər bu sahədə görülən işlərə verilən ən yüksək qiymətdir. Elə bunların nəticəsidir ki, Avropa İdman Paytaxtları və Şəhərləri Federasiyası Bakı şəhərini 2026-cı il üçün dünyanın "İdman paytaxtı" seçib.
Mükəmməl açılış mərasimi
Azərbaycan beynəlxalq miqyasda dünya və Avropa çempionatlarının keçirildiyi unikal məkan statusuna da sahiblənib. Hazırda isə idman ölkəsi daha bir nüfuzlu yarışı - minifutbol üzrə dünya çempionatını qəbul edir. İyun ayının 1-dək Milli Gimnastika Arenasında keçiriləcək mundialda dünyanın ən güclü 32 komandası mübarizə aparır.
Mundialın açılış mərasimi Dövlət himnimizin səsləndirilməsi ilə başladı. Sonra ölkəmiz haqqında musiqi və xüsusi işıq şousunun müşayiəti ilə maraqlı bir səhnəcik göstərildi. Burada ritmik və həyəcanlı musiqi vasitəsilə rəqqasların nümunəvi ifası təqdim olundu. Açılış mərasimində xüsusi olaraq Bakıya dəvət olunmuş dünya freestyle sənətinin əfsanəsi Sean Qarnier topla möhtəşəm hərəkətlər nümayiş etdirdi. Azərbaycanın Xalq artisti Aygün Kazımova və türkiyəli pop ulduzu Aleyna Tilkinin ifaları tədbirə əlavə rəng qatdı. Tədbirin sonunda turnirin rəsmi maskotu olan Maralzadə azarkeşlərə təqdim olundu.
AMF nümunə göstərir
Ümumiyyətlə, etiraf edək ki, belə nüfuzlu yarışlar üçün ən azı 3-4 il zaman verilsə də, Azərbaycanın dünya çempionatına hazırlıq üçün cəmi bir il vaxtı vardı. Mundialın keçirilməsində böyük təcrübə mövcuddur. Dünya Minifutbol Federasiyasının (WMF) hər bir sahə üzrə öz göstərişləri olur. Mövcud təlimatlarda hər bir istiqamət üzrə müəyyən edilmiş metodiki qaydalar var.
"Bakı-2025"də isə bütün məsuliyyət, təşkilati məsələlərin yoluna qoyulması Azərbaycanın öz üzərinə düşürdü. Bu müddət ərzində Bakıda qarşılaşmaların keçirilməsi üçün infrastrukturun yaradılması və oyunların təşkili üzrə digər işlərin sürətlə həyata keçirilməsi göstərir ki, Azərbaycan Minifutbol Federasiyası (AMF) hazırlıq işlərini göstərilən vaxtda yüksək səviyyədə başa çatdırıb.
Əlbəttə ki, dünya çempionatının Bakıda keçirilməsi Azərbaycan idmanının beynəlxalq səviyyədə qazandığı növbəti uğurun bariz nümunəsidir. Ölkəmiz indiyədək idmanın müxtəlif növlərinə aid mötəbər beynəlxalq yarışlara yüksək səviyyədə evsahibliyi edib. Bu gün ən nüfuzlu idman qurumlarının böyük beynəlxalq yarışlara evsahibliyi hüququnu tərəddüd etmədən Azərbaycana verməsi də təsadüfi deyil.
Bu prosesdə Azərbaycan Minifutbol Federasiyasının təqdirəlayiq fəaliyyəti xüsusi vurğulanmalıdır. Təkcə onu demək kifayət edər ki, Azərbaycan Minibutbol Federasiyasının qısa zaman kəsiyində əldə etdiyi uğur bəlkə də bu sahədə ənənəsi olan böyük dövlətlərin onilliklər ərzində qazandıqları nailiyyətlərdən, uğurlardan böyükdür.
AMF-nin prezidenti Orxan Məmmədovun rəhbərliyi altında federasiya az vaxtda uğura aparan yolun qısa xülasəsini təqdim etdi və bir daha bəlli oldu ki, həqiqətən də, istənilən sahədə qısa zamanda uğurun qazanılması mümkündür. Yüksək təşkilatçılıq bacarığı, istedad, peşəkar yanaşma, diqqət və qayğı, ən əsası isə milli ruhun, vətənpərvərliyin ən ali dəyər kimi qəbul edildiyi yerdə zəfər qaçılmazdır. Məhz Orxan Məmmədovun təklifi əsasında yalnız azərbaycanlılardan ibarət və milli ruha malik komanda yaradılıb və düzgün idarəetmə sayəsində qısa zamanda yüksək nəticələr əldə edilib.
Hədəf çempionluqdur
Açılış mərasimindən sonra minifutbol üzrə milli komandamız mundialda ilk oyununu keçirdi. A qrupunda qərarlaşan futbolçularımız Bəhreyn seçməsi ilə qarşılaşdı. Görüş 1:1 hesablı heç-heçə ilə yekunlaşıb. Millimizin heyətində yeganə qolu Mirmehdi Rzayev vurub.
Qarşılaşmadan əvvəl milli komandamızın üzvləri Tural Nərimanov, Bəxtiyar Soltanov, Davud Karimi və Seymur Məmmədov seçmə komandada karyeralarını başa vurmaları ilə əlaqədar təntənəli şəkildə yola salındı və onlara xüsusi mükafat təqdim olundu.
Matçdan sonra komandamızın kapitanı Elvin Əlizadə bildirib ki, Bəhreynə qalib gələ bilməsək də, düşünürəm ki, onlar bizdən zəif komandadır: "Əslində, rəqib də meydanda yaxşı performans nümayiş etdirmədi. Təəssüf ki, biz də şansları dəyərləndirə bilmədik. Meydançanın yeni olması oyunumuza müəyyən təsir göstərdi. Düşünürəm ki, bu düzələcək".
E.Əlizadə dünya çempionatında uğurlu nəticə qazanacaqlarına inandığını söyləyib: "Qarşıda bizi Sloveniya və Mavritaniya ilə oyunlar gözləyir. Hər iki komandanın fiziki və taktiki hazırlığı yüksək səviyyədədir. İki çətin görüş olacaq. Lakin qrupdan çıxıb, sonda medalçılar sırasında olacağımıza inanırıq".
Komandamızın Bəhreynlə matçda yeganə qolunun müəllifi olan oyunçu Mirmehdi Rzayev görüşü dəyərləndirib: "Rəqib komandanın bəxti gətirdi. Hücum oyunu oynayırdıq. Adi bir səhvdən qol buraxdıq. Təəssüf ki, bu gün belə alındı. Azarkeşlərin önündə oynamaq çətin oldu. Amma inanıram ki, növbəti qarşılaşmalarda qələbə qazanacağıq. Komandamıza inanıram".
Göründüyü qədərilə Bakıda mundiala hazırlıq, püşkatma mərasiminin yüksək səviyyədə təşkilindən açılış mərasiminədək işlərin sürətlə həyata keçirilməsi göstərdi ki, AMF rəhbərliyi hazırlıq işlərini göstərilən vaxtda yüksək səviyyədə başa çatdırmaqla misli görünməmiş bir uğura imza atmaqdadır. Qalır milli komandamızın uğurla çıxış edərək ən azından mükafatçılar sırasında yer almağı.
Uğurlar, Azərbaycan!
Elçin CƏFƏROV,
"Azərbaycan"
jpg_1765911397.jpg)
