300 min baş qaramal identikləşdirilərək AQTİS-ə daxil edilib
Heyvandarlıq həm çətin, həm də gəlirli sahədir. O səbəbdən aqrar sahənin bu sektoruna dövlət səviyyəsində də böyük diqqət və dəstək verilir. Əsas məqsəd isə əhalinin sağlam və təmiz yerli heyvandarlıq məhsulları ilə təminatıdır.
Azərbaycanın təsərrüfat subyektlərində hazırda 2,5 milyon başdan çox qaramal var. Onların 300 min başa yaxını identikləşdirilərək Avtomatlaşdırılmış Qida Təhlükəsizliyi İnformasiya Sisteminə (AQTİS) daxil edilib. Bu barədə Azərbaycan Respublikası Qida Təhlükəsizliyi Agentliyi (AQTA) Aparatının Heyvan sağlamlığı və bioloji təhlükəsizlik şöbəsinin müdiri, respublikanın baş dövlət baytarlıq müfəttişi Qalib Əbdüləliyev məlumat verib. Onun sözlərinə görə, hazırda ölkə üzrə qaramal heyvandarlıq təsərrüfatlarının strukturuna 537 min 721 təsərrüfat subyekti daxildir: "Qaramalın 92 faizi 10 başadək heyvanı olan xırda təsərrüfatlarda cəmləşib. Bunun təxminən 39 faizi 1-2, 30 faizə yaxını 3-4, 20 faizi 5-9, az bir hissəsi isə 50 başdan yuxarı heyvan saxlanılan təsərrüfatlardır. Hazırda ölkəyə müxtəlif məqsədlərlə, yəni həm damazlıq, həm də kəsim üçün gətirilən heyvanların idxaldan öncə identikləşdirilməsi bir şərt kimi qarşıya qoyulub. Yalnız belə olan halda gətirilən heyvanlar bizim qeydiyyat sisteminə daxil olunur".
Aqrar Sığorta Fondu (ASF) indiyə qədər heyvandarlıq sığortası üzrə 2,5 milyon manat ödəniş edib. Fonddan bildirilib ki, son məlumata görə, vəhşi heyvanların hücumu ilə bağlı 20-yə yaxın hadisə qeydə alınıb və ödəniş olunub. Təkcə bu ilin 7 ayında vəhşi heyvanların təsərrüfatlara hücumu ilə bağlı 8 hadisə qeydə alınıb, 8 baş kənd təsərrüfatı heyvanı tələf olub və ona görə fermerlərə ümumilikdə 37485 manat ödənilib. Yeri gəlmişkən, xatırladaq ki, 2022-ci ildə heyvandarlıq sığortası üzrə 710 min, 2023-cu ildə 910 min, 2024-cü ilin 8 ayında 770 min manat sığorta ödənişi edilib.
Bir daha vurğulayaq ki, ölkəmizdə aqrar sığorta haqqına 50 faizlik dövlət dəstəyi mövcuddur, başqa sözlə, kənd təsərrüfatı bitkilərinin və heyvanlarının sığortası zamanı hesablanmış sığorta haqqının yarısını dövlət ödəyir. Sığorta haqqı heyvanın qiymətinə əsasən hesablanır, tarif 5,2-8,2 faiz arasında dəyişir. Belə ki, 300 manatlıq qoyun və ya keçinin illik sığortası 8-12, 1000 manatlıq qaramalın sığorta haqqı 26-41 manat civarındadır. 2000 manatlıq inək üçün isə sığorta haqqı 52-82 manat arasında dəyişir. Hadisə baş verərsə, yəni məsələn, vəhşi heyvanların hücumu nəticəsində heyvan tələf olarsa, sahibi onun qiymətinin 90 faizi qədər ödəniş alır. Məsələn, 300 manatlıq qoyun tələf olarsa, fermerə 270, 2000 manatlıq inək tələf olduqda 1800 manat sığorta pulu verilir.
Qurban MƏMMƏDOV,
"Azərbaycan"
