TƏBİB-in və Hemofiliyalı xəstələrin Respublika Assosiasiyasının birgə təşkilatçılığı və Novo Nordisk Hemofiliya Fondunun dəstəyi ilə 2022-2024-cü illər ərzində qanın laxtalanma pozğunluğundan əziyyət çəkən vətəndaşlara tibbi yardımın kompleks yanaşılmasına dair hesabat konfransı keçirilib.
Konfransda Hemofiliyalı Xəstələrin Respublika Assosiasiyasının sədri Ayaz Hüseynov 3 il ərzində görülən mühüm işləri təqdim edib.
Görülən işlərdən 5 Rayon Mərkəzi Xəstəxanalarda fizioterapiya və reabilitasiya kabinetlərinin təchizatlandırılması, Bakı Şəhərində Milli Hematologiya və Transfuziologiya Mərkəzində və Naxçıvan şəhər Mərkəzi Xəstəxanasında irsi qan xəstəliklərindən əziyyət çəkən vətəndaşların ağız boşluğunun keyfiyyətli müəlicəsi üçün stomatomatoloji kabinetlərin yaradılması və müasir avadanlıqla təchizatı, bu müddətdə konfranslar və seminarlar nəticəsində 1200-dən çox tibb işçisinin və 600-dən çox pasiyent və onların ailə üzvləri təlim keçib.
Bundan başqa, Assosiasiya tərəfindən Dünya Hemofiliya Federasiyasının Hemofiliyanın müasir müalicəsinə dair 3-cü ən son təlimat kitabı tərcümə edilərək tibb müəsisələrinə və dövlət səhiyyə qurumlarına təqdim olunub.
Konfransda TƏBİB-in icraçı direktorunun müşaviri Pərvin Əkbərov bu sahədə görülən işlər və gələcək perspektivlər barəsində ətraflı məlumat verib.
Deputat Pərvanə Vəliyeva görülən işləri yüksək qiymətlədirərək hemofiliyaya dair Azərbaycan Respublikası Qanunvericiliyinə yenidən baxılması və təkmilləşməsinə ehtiyac olduğunu bildirib.
Milli Qeyri-Hökumət Təşkilatları Forumunun sədri Ramil İskəndərli öz çıxışında İxtisaslaşmış təşkilatların dövlət qurumları ilə birgə əməkdaşlığının vacibliyini və töhfələri barədə ətraflı məlumat verib.
Respublika Klinik Xəstəxanasının Baş Həkimi Dr. Sahib Hüseynov hemofiliyalı vətəndaşıların müalicə aldığı Respublika Kliniki Xəstəxananın Hematalogiya şöbəsinin imkanlarından və xəstəxananın keçən il təkmilləşdirilmiş labaratoriyası barədə məlumat verib.
"Azərbaycan"
