İkinci Qarabağ müharibəsində kapitulyasiya aktına imza atan, antiterror tədbirləri zamanı ağ bayraq qaldıraraq xilası üçün yalvaran Ermənistan uğradıldığı biabırçı məğlubiyyətlərdən dərs almaq istəmir. 

İrəvanın Azərbaycanla yeni müharibəyə iştahlanmasının səbəbi isə Qərb havadarlarının göstərdiyi siyasi, hərbi dəstəkdir. Cənubi Qafqazda geopolitik maraqları olan müstəmləkəçi Fransanın başçılığı ilə Ermənistan sürətlə silahlandırılır. Bu silahlar isə onlara ya tamamilə pulsuz şəkildə, ya da kredit formasında verilir ki, həmin kreditlər də bir müddətdən sonra silinir. 

İrəvanın hazırda nümayiş etdirdiyi destruktiv davranışların arxasında da bu səbəblər yatır. Bölgədə dayanıqlı sülh üçün Azərbaycana qarşı ərazi iddiaları əks olunan konstitusiyasını dəyişmək, ATƏT-in tarixə qovuşmuş Minsk qrupunun de-yure ləğvi üçün ölkəmizlə birgə müraciət etmək əvəzinə Ermənistan silahlanmağa üstünlük verir.  Avropa İttifaqının (Aİ) qondarma müşahidə missiyasının müddətinin daha iki il uzadılması, hərbiləşdirilməsi də  bu çirkin niyyətə xidmət edir. Burada məqsəd Ermənistandan plasdarm kimi istifadə etməklə bölgədə Aİ-nin hərbi amil olaraq mövcudluğuna şərait yaratmaq, bölgədə yeni münaqişə ocağını alovlandırmaqdır. Ancaq Azərbaycan bu missiyanın varlığına heç bir lüzum olmadığını qətiyyətlə bildirib.

Ötən il aprelin 5-də Brüsseldə keçirilən ABŞ-Aİ-Ermənistan üçtərəfli görüşünün hərbi komponentlər ehtiva etməsi də Cənubi Qafqazla bağlı müharibə planlarının cızıldığını ortaya qoyur.  

Silahlar Ermənistana hədiyyə olunub 

"Ermənistanda gedən silahlanma prosesi əlbəttə ki, Cənubi Qafqaz üçün yeni təhdid amilidir". Bu ilin yanvarında yerli televiziya kanallarına müsahibəsində Prezident İlham Əliyev Ermənistanın sürətlə silahlandırılması məsələsinin ümumilikdə bölgəni təhlükəyə sürüklədiyini söylədi. 

Yeri gəlmişkən vurğulayaq ki, Ermənistanın pulsuz şəkildə silahlandırılması hələ Vətən müharibəsinə qədərki dövr ərzində də həyata keçirilib. Ölkəsinin uzun illər Azərbaycanla münaqişə fonunda xarici qüvvələr tərəfindən pulsuz silahlandırılmasını mətbuata açıqlamasında Ermənistanın baş naziri Nikol Paşinyan da açıq şəkildə etiraf edib. Onun sözlərinə görə, Ermənistanın silah arsenalının əhəmiyyətli hissəsi əvvəllər heç bir ödəniş edilmədən, faktiki olaraq hədiyyə kimi əldə olunub.

Elə bu hərbi dəstəyə görə də Ermənistan onilliklər boyu sülh danışıqlarından yayınıb, torpaqlarımızın işğalını davam etdirib. Ancaq nə arxalandığı Qərb, nə aldığı silahlar, nə də qurduğu sədlər Ermənistanı "dəmir yumruğ"un qəzəbindən qoruya bilmədi. Biabırçı məğlubiyyətə uğrayan Ermənistan ordusu on bir mindən çox fərarisi olan utancverici ad qazandı. Həmçinin işğalçıya və təcavüzkara dəstək verən ölkələr Ermənistanı meydanda tək qoydular, ona heç bir kömək edə bilmədilər.  

Ermənistan yenidən Azərbaycanla müharibəyə başlasa, eyni ssenari təkrar olunacaq, işğalçı və təcavüzkar  ölkə məğlubiyyət anında arxalandığı güclərin heç birini yanında görməyəcək. Çünki Azərbaycan buna qətiyyən imkan verməyəcək.

Azərbaycan gedən proseslərə müşahidəçi qalmayacaq

Yuxarıda sözügedən müsahibəsində dövlətimizin başçısı İlham Əliyev məhz bu məqama xüsusi vurğu etmişdi:  "Eyni zamanda bu gün sanki Ermənistanın arxasında duran kimi görünən və onları Azərbaycana qarşı yeni provokasiyalara, təxribatlara təhrik edənlər çox güman ki, axıra qədər onların arxasında durmayacaqlar. Necə ki, 2020-ci ildə və ondan sonrakı dövrdə dura bilməmişlər. Ona görə yox ki, durmaq istəmirlər, sadəcə olaraq Azərbaycan bu imkanları verməyəcək".

Faşizm siyasəti üzərində qurulmuş qondarma dövlət Ermənistan hazırda  revanşizm eyforiyasından çıxa bilmir və Azərbaycanla silahlanma yarışı aparır. Yəni sözün əsl mənasında hazırda Ermənistan odla oynamaqla məşğuldur. Azərbaycan isə İrəvanın təhlükəli addımlarına sadəcə müşahidəçi qalmayacaq. 

2020-ci ildə müasir döyüş üsulu ilə düşməni döyüş meydanında darmadağın edərək adını dünya hərb tarixinə yazdıran Azərbaycan Ordusu ötən dövrdə daha da inkişaf edərək gücünə güc qatıb və milli maraqlarımızı təhdid edən istənilən gücləri məhv etməyə qadirdir. Buna görə də Ermənistan silahlanmanı  dərhal dayandırmalıdır. Yoxsa sonra hər şey gec olacaq...

Yasəmən MUSAYEVA, 

"Azərbaycan"