Matçın gərgin mübarizə şəraitində keçəcəyi gözlənilən idi. Qarşılaşmanın təhlilinə keçməzdən öncə qeyd edək ki, hava şəraitinin dumanlı olması nəinki hər iki komandaya problem yaratdı, eyni zamanda ekranlar qarşısında matçı izləyənlərin də əsəbləri ilə oynadı. 
Dumanlı görüntülərdən matçı daha dəqiq təhlil etmək mümkün olmasa da, ən azından komandaların oyun planları üzrə fikirlərimizi diqqətinizə çatdırmaq istərdik. 
Dünənki matçda ilk dəqiqələrdən "Qarabağ" oyunu meydançanın rəqibə aid hissəsinə yıxmaqla erkən qola ümid edirdi. "Neftçi" isə meydan sahiblərinin hücumları zamanı itirilən topu tez bir zamanda uzun ötürmələrlə cinahlara yayaraq Saldanyana imkan yaratmağa çalışırdı. Belə epizodlardan birində "Neftçi"li Kilan Lebon hesabı açdı.
Buraxılan qoldan sonra hücumların daha çox cinahlardan qurulmasına önəm verən Qurban Qurbanovun komandasının oyun planı istədiyi kimi alınmadı. Daha çox ehtiyat oyunçulara üstünlük verən ağdamlılar qurulan hücumlarda topun sürətini artıra bilmədilər. "Neftçi"nin tətbiq etdiyi təzyiq "Qarabağ"ın meydançada 2-ci və 3-cü zonadakı oyunçuları arasında əlaqəni kəsdi. Nəticədə hücumda yer alan futbolçular məcbur olaraq həm müdafiə olunmada, həm də topu alaraq hücumların qurulmasında səy göstərdiklərinə görə meydançanın rəqibə aid hissəsində çoxala bilmədilər. Diqqətçəkən məqamlardan biri ondan ibarət idi ki, "Neftçi" top rəqibdə olarkən meydançada düzülüşdə xətlər arasında boş zonalar buraxırdı. 
Fasilədən sonra "Qarabağ"da əsas fiqurlar- Zubir, Veşoviç və Almeyda meydana daxil olduqdan sonra ağdamlılar daha fərqli oyun nümayiş etdirdilər. Xüsusilə 55-ci dəqiqədən etibarən qurulan hücumlardan sonra geri qayıdan topların hamısına "Qarabağ" futbolçuları yiyələndilər. Bir sözlə, Ağdam komandası meydançanın bütün zonalarında sona qədər mübarizə apardı. 
"Neftçi"nin mərkəz müdafiəçilərinin ağır qalması, mövqe sığortalarında zonalara düzgün düşə bilməmələri qonaqların qapısı qarşısında təhlükəli epizodlarla yadda qaldı. Xüsusilə "Qarabağ"ın cinahdan sürətli ötürmələri "Neftçi"yə çətin anlar yaşatdı. Belə epizodlardan birində "ağ-qaralar" qapılarında qol gördülər. Höccət Haqverdi avtoqolla yadda qaldı.
Görüşün qalan dəqiqələrində hər iki komanda meydançanın bütün zonalarında sona qədər mübarizə apardı. Qarşılıqlı yaradılan bütün imkanlara baxmayaraq, görüşdə başqa qol olmadı-1:1.

Elçin CƏFƏROV,
"Azərbaycan"