Fransada yenidən tətillər və nümayişlər başlayır

Fermerlərin ardınca indi də müəllimlər etiraza qalxırlar

Ölkədə 3 aya yaxın davam etmiş kütləvi fermer etirazlarından sonra Fransa yenidən tətillər və nümayişlər təhlükəsi ilə üzləşib. Fransa həmkarlar ittifaqları Parisdə keçiriləcək Yay Olimpiya Oyunları zamanı hakimiyyəti tətillərlə hədələyirlər. Təşkilatların nümayəndələri qeyd ediblər ki, bütün tədbirlərin rəvan keçməsi üçün hökumət pul ödəməli olacaq.
Xəstəxanalarda, ictimai nəqliyyatda və muzeylərdə çalışan işçilər tətillərə başlayacaqlarını bildirirlər. Onların narazılığı məzuniyyət zamanı işləmək perspektivindən qaynaqlanır. Əməkdaşlar həmçinin Olimpiya Oyunları zamanı işləmək üçün bonuslar, uşağa qulluq üçün müavinətlər və iş vaxtından artıq çalışmaq üçün ödəniş tələb edirlər. Xatırladaq ki, Olimpiya Oyunları iyulun 26-dan avqustun 11-dək Fransa paytaxtında keçiriləcək. Yarışları 16 milyona yaxın insanın canlı izləyəcəyi gözlənilir. Əgər həmkarlar ittifaqları öz planlarını həyata keçirmək qərarına gəlsələr, bu, Fransa hakimiyyətinin onsuz da aşağı düşmüş reputasiyasına böyük zərbə vuracaq.
Bu arada Fransada kollec və liseylər üzrə ilk həmkarlar ittifaqı (Snes-FSU) müəllimləri yenidən tətilə çağırıb. Bildirilir ki, Snes - FSU orta və ali məktəblərin müəllimlərini səfərbər olmağa səsləyib. Bundan sonra Snep-FSU, SUD Education, CGT Educ'action və FNEC-FP FO kimi bir neçə həmkarlar ittifaqları da tətil və nümayiş çağırışına qoşulublar. Tətilçilər dövlət məktəblərində "səviyyə qruplarının" ləğvini, məktəblərə daha çox resurs ayrılmasını tələb edirlər. Müəllimlər həmçinin lüzumsuz islahatların ləğv olunmasını, maaşlarının artırılmasını istəyirlər.
Paris bölgəsindəki Seine-Saint-Denis departamentində "səviyyə qruplarının" yaradılmasına qarşı çıxan müəllim heyətinin təhsil üçün fövqəladə plan tələbi diqqət mərkəzində olacaq. Ötən həftənin sonunda  təhsil naziri Nikol Bellube həmin departamentin 12 deputatından 9-nu qəbul edib. Deputatlar bildiriblər ki, nazir müəllimlərin etiraz hərəkatının miqyasını düzgün qiymətləndirmir.
Son bir həftə ərzində naməlum şəxslər 400-ə yaxın təhsil müəssisəsinə təhdid mesajları göndərib. Bunu Nikol Bellube BFMTV-nin efirində deyib: "20 təhsil bölgəsində 400-ə yaxın təhsil müəssisəsi təhdidlərə məruz qalıb. Bu, çox böyük rəqəmdir və qəbuledilməzdir".
O qeyd edib ki, təkcə ötən həftə Parisdə 150-dən çox məktəb təhdid edilib.
Nazir bundan əvvəl təhlükə altında olan təhsil müəssisələrinin mühafizəsi üçün göndəriləcək mobil təhlükəsizlik qüvvələrinin yaradılmasından danışıb. Eyni zamanda bu bölmənin işçiləri məktəblərdə "uzun müddət" qala biləcəklər.
Fransızların böyük əksəriyyəti ölkədə təhlükəsizliklə bağlı vəziyyətin getdikcə pisləşdiyi fikrindədir. Bu fikir "Le Figaro" qəzetinin sifarişi ilə Fiducial/Odoxa xidmətinin apardığı sosioloji tədqiqatın nəticələrində əksini tapıb. Sosioloji rəy sorğusunda iştirak edən vətəndaşların 92 faizi Fransada təhlükəsizliklə bağlı vəziyyətin getdikcə daha da pisləşdiyini bildirib.
Bundan başqa, fransızların 60 faizi evlərinin təhlükəsizliyini gücləndirmək qərarına gəlib. Onların 33 faizi binalarının giriş qapılarında kod olan mühafizə sistemləri quraşdırıb, 26 faizi evlərini siqnalizasiya ilə, 24 faizi videonəzarət kamerası ilə təchiz edib, 21 faizi isə gözətçi iti alıb. Eyni zamanda hər beşinci fransalıdan biri özü ilə bibər qazı balonu gəzdirir.
Respublikanın daxili işlər naziri Jerald Darmanen ölkənin misli görünməmiş terror təhlükəsi ilə üz-üzə olduğunu bildirib. Fransanın Baş naziri Qabriel Attal isə Milli Müdafiə Şurasının iclasından sonra ölkədə terror təhlükəsi səviyyəsinin ən yüksək dərəcəyə qalxdığını bəyan edib. 

Rizvan CƏFƏROV,
"Azərbaycan"