Fransada sərbəst fəaliyyət göstərən 5 minə yaxın həkim və estetik tibb mütəxəssisi səhiyyə naziri Stefani Ristə müraciət edərək, qeyri-qanuni estetik inyeksiyalara qarşı mübarizənin sərtləşdirilməsini tələb edib.
AZƏRTAC xəbər verir ki, həkimlər son dörd ayda bu cür prosedurlar nəticəsində iki gənc qadının həyatını itirməsinin narahatlıq doğurduğunu bildiriblər.
“Le Parisien” qəzetində dərc olunan müraciətdə müəlliflər nazirə “Daha neçə insan həyatını itirməlidir, xanım nazir?” sualı ilə üz tutaraq, tibbi ixtisası olmayan şəxslərin estetik prosedurlar həyata keçirməsinin geniş yayılmasını kəskin tənqid ediblər.
Təşəbbüsə Fransanın Sərbəst Həkimlər Həmkarlar İttifaqı və Estetik Tibdə Yaxşı Təcrübələr Dərnəyi də dəstək verib.
Müraciətdə qeyd olunub ki, Fransada estetik inyeksiya etdirən insanların təxminən 40 faizi artıq həkim olmayan şəxslərə müraciət edirlər. Həkimlərin fikrincə, bu müdaxilələr tibbi bilik və diaqnoz olmadan həyata keçirilir ki, bu da ciddi sağlamlıq riskləri yaradır.
Onlar hökumətdən qeyri-qanuni fəaliyyət göstərən şəxslərə qarşı cəzaların sərtləşdirilməsini, həmçinin xüsusilə sosial şəbəkələr vasitəsilə rəsmi satış kanallarından kənarda satılan inyeksiya məhsullarına nəzarətin gücləndirilməsini tələb edirlər.
Fransanın Dərman və Səhiyyə Məhsullarının Təhlükəsizliyi üzrə Milli Agentliyi də estetik inyeksiyaların səlahiyyəti olmayan şəxslər tərəfindən aparılmasının qanunsuz olduğunu və sağlamlıq üçün ciddi təhlükə yaratdığını mütəmadi olaraq xatırladır.
Agentliyin məlumatına görə, belə prosedurlar infeksiyalar, toxuma nekrozu və hətta ölümlə nəticələnə bilən ağır fəsadlara səbəb ola bilər. Qurum vətəndaşları bu cür müdaxilələr üçün yalnız lisenziyalı səhiyyə mütəxəssislərinə müraciət etməyə çağırır.
