Onlar Bricit Makronun kişi doğulduğuna dair yalan məlumat yayıblar
Paris məhkəməsi 10 nəfəri - səkkiz kişi və iki qadını - Fransa Prezidenti Emmanuel Makronun həyat yoldaşı Bricit Makronu təqib etməkdə təqsirli bilib. Təqsirləndirilən şəxslərin əksəriyyəti səkkiz aya qədər müddətinə şərti həbs cəzası alıb. Bir nəfər məhkəməyə gəlmədiyinə görə tutulub və həbsxanaya göndərilib.
Cəza alanların hamısı Fransanın birinci xanımının cinsi və seksual oriyentasiyası haqqında yalan xəbərlər, eləcə də Makronlar arasındakı 24 yaş fərqi haqqında "zərərli ifadələr" yaymaqda təqsirli bilinib.
Hakim bildirib ki, bütün təqsirləndirilən şəxslər internetdə alçaldıcı və təhqiramiz şərhlər yazmaqla Bricit Makrona zərər vermək üçün açıq niyyətlə hərəkət ediblər.
Bricit Makrona qarşı feyk məlumatlar yayan 10 nəfərin arasında müxtəlif peşə sahibləri var. Təqsirləndirilən şəxslərin yaşları 41 ilə 65 arasındadır. Onlardan biri seçkili vəzifədə çalışan məmur, digəri qalereya sahibi, habelə müəllim və onlayn falçı, sosial şəbəkələrdə Amandin Rua kimi tanınan 51 yaşlı Delfin J. də var.
Amandin Rua, özünü müstəqil jurnalist adlandıran Nataşa Rey ilə birlikdə, keçən il Bricit Makrona qarşı böhtan atmaqda ittiham olunmuşdu.
2021-ci ildə Rua və Rey YouTube-da Bricit Makron adlı adamın heç vaxt mövcud olmadığını və əslində onun "cinsi dəyişdirilmiş" qardaşı Jan-Mişel Tronyo olduğunu iddia etdikləri bir söhbət yayımlayıblar.
Rey və Rua daha sonra apelyasiyalarını udublar və onların barəsində çıxarılmış ilkin hökmlər ləğv edilib. Lakin bəzi məlumatlara görə, Bricit Makron bu qərardan daha yüksək məhkəmə instansiyasına şikayət verib.
Fransa məhkəməsinin bazar ertəsi günü verdiyi qərar ABŞ-də daha böyük bir hüquqi mübarizənin - geniç məhkəmə araşdırmasının xəbərçisi oldu. Orada bir cütlük birinci xanımın gender mənsubiyyəti ilə bağlı konspiroloji nəzəriyyələr yayan daha bir şəxs - bloger Kendas Ouensə qarşı diffamasiya iddiası qaldırıb.
Ouens bu iddiaları müntəzəm olaraq podkastında və sosial mediada təkrarlayır və 2024-cü ilin mart ayında xanım Makronun "əslində kişi olduğunu" iddia etdiyi üçün "bütün peşəkar nüfuzunu" riskə atmağa hazır olduğunu bildirib.
Makronların iddiasında Ouensin "iddialarını təkzib edən bütün etibarlı dəlilləri görməzdən gəldiyi və tanınmış konspiroloqlara və sübut olunmuş böhtançılara platforma verməyi seçdiyi" iddia edilir.
Xatırladaq ki, Bricit Makronun transgender olduğuna dair konspiroloji nəzəriyyələr 2017-ci ildə əri Emmanuel Makron Fransa Prezidenti olandan bəri yayılır.
Bricit Makron gələcək əri ilə onun oxuduğu orta məktəbdə dərs deyərkən tanış olub.
Cütlük 2007-ci ildə, gələcək Fransa Prezidentinin 29 yaşı və xanımının 53 yaşı olduğu zaman evlənib.
Rizvan CƏFƏROV,
"Azərbaycan"
