Paşinyan hərbi xidmətdən yayınma hallarının artdığını etiraf edib
Ermənistanda silahlı qüvvələrdə böyük problemlərin yaşanması davam edir. Ümumiyyətlə, ölkədəki durum erməni ordusunda qanunsuzluqların hökm sürdüyünü, korrupsiya və rüşvətxorluğun getdikcə daha geniş miqyas aldığını göstərir.
Bunu ölkənin baş naziri Nikol Paşinyan da etiraf edib. O bildirib ki, hərbi yaşda olan vətəndaşların yarısından az hissəsi orduya cəlb olunur: "Bu o deməkdir ki, ya bizim nəslin səhhətində ciddi problemlər var, ya da bu sahə korrupsiya üçün ən çiçəklənən mühit olaraq qalır".
Ermənistanın baş naziri Nikol Paşinyan yanvarın 15-də hökumətin iclasında çağırış yaşında olan gənclər arasında "qəfil" xəstəliklərin kütləvi şəkildə baş verməsi ilə bağlı narahatlığını ifadə edib. Paşinyan bu məsələni Müdafiə Nazirliyinin çağırışçıların tibbi məlumatlarının uçotu üçün nəzərdə tutulan elektron sistemin tətbiqi layihəsinin müzakirəsi zamanı qaldırıb. Yeni layihəyə əsasən, çağırış komissiyaları "Armed" adlı sistem vasitəsilə vətəndaşların tibbi məlumatlarına çıxış əldə edəcək. Bu sistem çağırış yaşına çatan şəxslərin uşaqlıqdan başlayaraq xəstəlik tarixçəsini izləməyə və hərbi xidmət dövründə "qəfil" aşkar edilən xəstəlik halları ilə bağlı manipulyasiyaları müəyyən etməyə imkan verəcək.
Ermənistanın baş naziri hərbi xidmətdən yayınmanın sosial və psixoloji təsirlərinə də toxunub. O qeyd edib ki, hərbi xidmətdən qanunsuz azad edilmə gənclərin psixoloji vəziyyətinə mənfi təsir göstərir və onların rəqabət qabiliyyətini azaldır. Maraqlıdır ki, Nikol Paşinyanın özü hərbi xidmətdə olmayıb.
Gənclər isə ordudan yayınmağın yeni metodlarını tapıblar. Belə ki, indi Ermənistan gəncləri cinsi azlıqlara mənsub olmaları barədə hərbi komissarlıqlara arayış təqdim edərək hərbi xidmətdən yayınır, sonra isə ölkəni tərk edirlər.
Ermənistan ordusu təkcə çağırışçıların sayının sürətlə azalmasına görə problem yaşamır, bu ölkənin silahlı qüvvələrinin maddi-texniki təchizatında da əvvəlki kimi böyük çətinliklər mövcuddur. Eyni zamanda orduda nizam-intizam pozuntularının, fərariliyin, ölüm hallarının, digər bu kimi mənfi tendensiyaların miqyası durmadan genişlənməkdə davam edir.
Sosial şəbəkələrin Ermənistan seqmentində silahlı qüvvələrin hərbi hissələrində zabitlərdən yuxarı vəzifəyə təyin olunmaq, tabor komandiri olmaq üçün 7000, bölük komandiri vəzifəsinə təyin olunmaq üçün 2500-4000, müqaviləli hərbi xidmət üçün isə 1000-2000 ABŞ dolları məbləğində rüşvət tələb edildiyi bildirilir. Yayılan məlumatlarda o da iddia edilir ki, yerindən asılı olaraq qiymətlər dəyişilə bilər. Yəni "yaxşı" yerə təyinat almaq üçün yüksək məbləğdə rüşvət tələb olunur. Maraqlısı odur ki, Ermənistan Müdafiə Nazirliyi bununla bağlı yayılan məlumatlara heç bir reaksiya vermir.
Ermənistanın ombudsmanı Anahit Manasyan isə deyib ki, orduda nizam-intizamdan kənar münasibətlər nəticəsində intihara və digər neqativ hallara səbəb olan mühitlə bağlı bir çox problemlər yaranıb. Onun sözlərinə görə, vətəndaşların vəzifələrindən danışmaq zəruridir, amma bu cür halları istisna etmək üçün mütləq dövlətin vəzifələrindən danışmaq lazımdır: "Ola bilsin ki, bu istiqamətdə irəliləyiş var, amma çox ciddi nöqsanlar qalmaqdadır və bu istiqamətdə işləmək lazımdır. Vətəndaşların hərbi xidmətdən yayınması bir çox hallarda silahlı qüvvələrdə hökm sürən davranışlarla bağlıdır. Buna görə də dövlət orduda qanundan kənar münasibətlərin, intiharların, hərbçilərin bir-birinə qarşı pis rəftarının istənilən təzahürlərinin aradan qaldırılması üçün hər şeyi etməlidir".
Qeyri-döyüş şəraitində ölən hərbçilərin valideynləri dəfələrlə etiraz aksiyası keçirərək övladlarının ölümü ilə bağlı cinayət işlərinin obyektiv araşdırılmamasına etiraz ediblər. Diqqətə çatdırılır ki, iqtidarın nəzarətində olan telekanallar, hakimiyyətyönlü media əsgərləri Müdafiə Nazirliyinin arzusuna uyğun olaraq özlərini öldürən intiharçılar kimi təqdim edirlər. Bu vəziyyətdə valideynlər üçün ən yaxşı çıxış yolu övladlarını orduda xidmətə göndərməkdən yayındırmaq, mümkün olduğu halda onları ölkə xaricinə qaçırmaqdır.
Elçin CƏFƏROV,
"Azərbaycan"
