Martın 12-dən paytaxtımız XIII Qlobal Bakı Forumuna evsahibliyi edir. Budəfəki forumun mövzusu "Keçid dövründə olan dünyada fikir ayrılıqlarının aradan qaldırılması"dır.
Qlobal Bakı Forumu beynəlxalq gündəlikdə olan əsas məsələlərin müzakirəsi üçün mükəmməl bir platformadır. Bu tədbirin təşkilatçısı olan Nizami Gəncəvi Beynəlxalq Mərkəzi dünyada mövcud olan qlobal problemlərin həlli yollarını araşdıran və bu mövzuda beynəlxalq ictimaiyyəti məlumatlandıran əhəmiyyətli təsisata çevrilib. Məhz buna görə də mərkəzin təşkil etdiyi tədbirlərə maraq hər il daha da artır.
Forumun builki mövzusu da çox aktualdır. Çünki hazırda dünya mühüm və mürəkkəb dəyişikliklər dövrünü yaşayır. Soyuq müharibədən sonra formalaşmış təkqütblü dünya sistemi tədricən zəifləyir və onun yerində yeni, çoxqütblü beynəlxalq nizam yaranmağa başlayır. Bu proses isə beynəlxalq münasibətlərdə müxtəlif gərginliklər və fikir ayrılıqları yaradır. Fərqli geosiyasi güclərin məsələlərə müxtəlif yanaşması qlobal idarəetmə mexanizmlərinin fəaliyyətini çətinləşdirir. Mübahisələrin sülh yolu ilə həlli üçün ortaq və təsirli platformaların az olması isə dünyada yeni qarşıdurma risklərini artırır. Dövlətlər arasında etimadın azalması həm siyasi dialoqa, həm də iqtisadi əməkdaşlığa mənfi təsir göstərir. Belə bir şəraitdə beynəlxalq dialoq və qarşılıqlı anlaşma xüsusilə vacib əhəmiyyət daşıyır. Məhz bu baxımdan Qlobal Bakı Forumu kimi beynəlxalq platformalar böyük rol oynayırlar. Belə tədbirlər rəsmi diplomatiyanın bəzən həll edə bilmədiyi məsələlərin daha açıq və çevik müzakirəsinə imkan yaradır.
Dünən XIII Qlobal Bakı Forumunun açılış mərasimi keçirildi. Prezident İlham Əliyev forumun açılış mərasimində Nizami Gəncəvi Beynəlxalq Mərkəzinin dünyanın müxtəlif ölkələrində tədbirlər keçirməsini təşkilatın artan nüfuzunun göstəricisi kimi dəyərləndirdi: "Nizami Gəncəvi Beynəlxalq Mərkəzi bu gün aparıcı beynəlxalq təsisatlardan biridir və burada bir çox məsələlər müzakirə olunur. Təşkilat yaxşı beynəlxalq nüfuza malikdir. Sistemli yanaşmaların, dəyişən beynəlxalq vəziyyətə aid olan məsələlərə mövqeyin formalaşmasında bu təşkilatın böyük rolu var". Bu fikirlər həm forumun əhəmiyyətini, həm də bu tədbirin beynəlxalq münasibətlər sistemində tutduğu yeri aydın şəkildə ifadə edir.
Dövlətimizin başçısının açılış mərasimindəki nitqində təhlükəsizlik məsələsinə xüsusi diqqət yetirməsi də təsadüfi deyil. Müasir dünyada təhlükəsizlik amili dövlətlərin siyasətində əsas prioritetlərdən biri hesab olunur. Azərbaycan da mürəkkəb geosiyasi bölgədə yerləşdiyi üçün bu məsələyə həmişə xüsusi həssaslıqla yanaşır. Bu baxımdan beynəlxalq forumların keçirilməsi və müxtəlif ölkələr arasında dialoqun təşviqi regionda sabitliyin qorunmasına müsbət təsir göstərir. "Təhlükəsizlik məsələsi Azərbaycan üçün hər zaman birmənalı olaraq birnömrəli məsələ olub. Eyni zamanda forumun əsas məqsədlərindən biri də dini, mədəni və etnik zəmində yaranan qarşıdurmaların azaldılmasına töhfə verməkdir. Azərbaycan isə belə mühüm tədbirlərə evsahibliyi etməklə fərqli maraqlara malik tərəfləri dialoq masası ətrafında toplamağa çalışır. Bu isə ölkəmizin sülhün, əməkdaşlığın və sabitliyin möhkəmlənməsinə verdiyi real töhfənin göstəricisidir", - deyə Prezident İlham Əliyev diqqətə çatdırıb.
Göründüyü kimi, forumun dini, mədəni və etnik zəmində yaranan qarşıdurmaların azaldılmasına xidmət etməsi mühüm əhəmiyyət daşıyır. Müxtəlif mədəniyyətlərin nümayəndələrinin eyni platformada fikir mübadiləsi aparması qarşılıqlı anlaşmanı gücləndirir və münaqişələrin sülh yolu ilə həlli üçün əlverişli şərait yaradır. Bu isə qloballaşan dünyada dialoq və tolerantlığın vacibliyini bir daha ön plana çıxarır.
Azərbaycan dünyada sabit və təhlükəsiz ölkələrdən biri kimi tanınır. Ölkəmizdə siyasi və ictimai sabitlik qorunur, iqtisadiyyat inkişaf edir və insanların sosial rifahı ildən-ilə yaxşılaşır. Azərbaycanın uğurlu xarici siyasəti ölkənin beynəlxalq nüfuzunun artmasına mühüm təsir göstərir. Bu gün Azərbaycan müxtəlif ölkələr və mədəniyyətlər arasında dialoq və əməkdaşlıq üçün vacib bir məkan kimi qəbul olunur. Forumun Bakıda keçirilməsi isə Azərbaycanın bu sahədəki rolunu və beynəlxalq səviyyədə artan əhəmiyyətini bir daha təsdiqləyir.
Xatırladaq ki, "Keçid dövründə olan dünyada fikir ayrılıqlarının aradan qaldırılması" mövzusuna həsr olunan XIII Qlobal Bakı Forumunda dünyanın fərqli regionlarından nüfuzlu siyasi xadimlər, beynəlxalq təşkilatların nümayəndələri, o cümlədən sabiq dövlət və hökumət başçıları, alimlər və ekspertlər iştirak edirlər. Azərbaycanın belə forumlara evsahibliyi və iştirakçıların sayının ildən-ilə çoxalması ölkəmizə olan diqqətin və etimadın artdığını göstərir, həmçinin Prezident İlham Əliyevin həyata keçirdiyi siyasətə verilən dəstəyin ifadəsi kimi dəyərləndirilir.
Təhminə VERDİYEVA,
"Azərbaycan"
jpg_1773348932.jpg)
