Yeni Azərbaycan Partiyası Quba rayon təşkilatının təşəbbüsü ilə Qubada fəaliyyət göstərən idarə, müəssisə və təşkilatların fəalları üçün Qarabağa tur təşkil olunduğunu eşidəndə sevindim. Çünki ziyarətçilərin sırasında mən də vardım.
Tur çərçivəsində biz Qarabağ torpağını ziyarət etdik. Qarabağ alındıqdan sonra buranı ziyarət etmək bir başqa hiss imiş. Bu hissi sözlə ifadə etmək çətindir, çünki o, 30 illik həsrətin, göz yaşının, ümidin bir anda gerçəkləşməsidir. Uzun illərin həsrətinin bir gün bitəcəyi nağıl kimi gəlirdi. Amma bu, şəhidlərimizin qanı, qazilərimizin şücaəti sayəsində gerçəyə çevrildi.
Buradakı hər bir daş, hər bir məkan tariximizdir, sərvətimizdir. Şuşanın qala divarları, Cıdır düzünün əsrarəngiz mənzərəsi, Ağdam Cümə məscidinin minarələri bizə babalarımızın kim olduğunu pıçıldayırdı. Xankəndinin küçələrində gəzərkən anlayırdıq ki, bu torpaq sadəcə coğrafiya deyil, millətin yaddaşıdır. İllərdir yuxularımızda gördüyümüz Xarıbülbül artıq azaddır, onun ətri doğma torpağın ətrinə qarışıb.
Bu yerlər düşmən tapdağı altında inləyirdi, indi isə Azərbaycan bayrağı altında nəfəs alır. Bir fəal gənc kimi burada olmaqdan qürur duydum. Çünki biz bu günü görmək üçün yaşayan, oxuyan, çalışan nəsilik. Bizə bu qüruru yaşadan isə Vətən uğrunda canından keçən oğullardır. Şəhid analarının əllərindən öpürük. Onların göz yaşları ilə suvarılan bu torpaq artıq azaddır. Bizim isə borcumuz Qarabağı yenidən qurmaq, çiçəkləndirmək, gələcək nəsillərə əmanət etməkdir.
Bu torpağa ayaq basanda başa düşürsən: Qarabağ sadəcə alınmadı, Qarabağ qayıtdı. O, yenidən bizim nəfəsimiz, səsimiz, ürək döyüntümüz oldu. Qarabağ, sənə qovuşmaq hər bir azərbaycanlının ən böyük xoşbəxtliyidir. Səni qorumaq isə bizim müqəddəs borcumuzdur.
Abutalib TURABOV,
Quba rayon sakini
jpg_1793052405.jpg)
