Hər bir xalqın mədəniyyəti, təhsili və elminin inkişafı mahiyyət etibarilə dövlətin özünün inkişafıdır. Axı bilik və maarifçilik ictimai tərəqqinin möhkəm bünövrəsini təşkil edir. Kitablar bir xalqın təhsilinin inkişafına, nailiyyətlərinə, mənəvi yüksəlişinə töhfə verən əsas amillərdəndir. İnformasiya texnologiyalarının sürətlə inkişaf etməsinə baxmayaraq, kitab sevgisi və mütaliə vərdişi olmadan davamlı və harmonik inkişafı təsəvvür etmək mümkün deyil.
Bu sözləri Milli Məclisin deputatı Ziyad Səmədzadə XI Bakı Beynəlxalq Kitab Sərgisində AZƏRTAC-ın müxbirinə müsahibəsində deyib.
“Builki sərgi mənim üçün çox maraqlı oldu. Azərbaycan xalqının ən layiqli nümayəndələri ilə burada görüşmək məni həqiqətən də sevindirdi. Bir neçə gün sərgidə iştirak etdim, pavilyonları gəzdim, ziyarətçilərin üzündə əsl sevinc və ruh yüksəkliyi müşahidə etdim”, -deyə deputat təəssüratlarını bölüşüb.
Onun sözlərinə görə, sərginin yaratdığı əsas təəssürat ondan ibarətdir ki, Azərbaycan bu gün bütün dünyada öz milli dəyərlərini və adət-ənənələrini qoruyub saxlayan, elmə və təhsilə qayğı göstərən ölkə kimi tanınır.
“Azərbaycan mədəniyyətinin nə qədər zəngin və çoxşaxəli olduğuna bir daha əmin oldum. Nəşriyyatlarımız həqiqətən gözəl, qürur duya biləcəyimiz mənalı əsərlər təqdim ediblər”, -deyə Z.Səmədzadə qeyd edib.
Milli Məclisin deputatı vurğulayıb ki, bu cür sərgilər mütəmadi olaraq keçirilməlidir, çünki onlar insanların kitabların sehrli dünyasına qərq olmasına xüsusi ab-hava yaradır. O əlavə edib: “Çox şadam ki, nəşriyyatlarımızın əvvəllər üzləşdiyi çətinliklər tədricən aradan qaldırılır və kitabsevərlərin sayı ildən-ilə artır”.
AZƏRTAC-ın fəaliyyətindən danışan deputat Azərbaycan Dövlət İnformasiya Agentliyinin ölkəmizdə ən mühüm və etibarlı obyektiv informasiya mənbələrindən biri olduğunu vurğulayıb.
“Agentlik uzun illər ərzində üzərinə düşən nəcib missiyanı - dövlət siyasətinin mahiyyətini geniş auditoriyaya çatdırmaq, ictimai rəyi formalaşdırmaq, milli dəyərlərə inamı gücləndirmək kimi vəzifələri böyük peşəkarlıq və məsuliyyətlə yerinə yetirib. Agentliyin ən mühüm nailiyyətlərindən biri də 44 günlük Vətən müharibəsinin işıqlandırılmasında fədakarcasına iştirakı olub. AZƏRTAC ordumuzun yanında dayanaraq cəbhədən gələn xoş xəbərləri operativ və doğru şəkildə ictimaiyyətə çatdırırdı. Bu, təkcə yüksək peşəkarlığın nümayişi deyil, həm də səmimi vətənpərvərlik və vətəndaş məsuliyyətinin örnəyi idi”, - deyən parlament üzvü müsahibənin sonunda AZƏRTAC-ın fəaliyyətinin Azərbaycanın müstəqillik tarixi, ölkəmizin mədəni və mənəvi inkişafı, onun beynəlxalq imicinin möhkəmlənməsi ilə ayrılmaz şəkildə bağlı olduğunu vurğulayıb.
