Davos İqtisadi Forumu Azərbaycan üçün mühüm beynəlxalq platformalardan biridir və ölkəmizin qlobal gündəmdə fəal iştirakına geniş imkanlar yaradır. Bu platforma Azərbaycanın iqtisadi potensialının, enerji siyasətinin və inkişaf strategiyasının beynəlxalq səviyyədə təqdim edilməsi baxımından xüsusi əhəmiyyət daşıyır. Prezident İlham Əliyevin Davos Forumunda iştirakı ölkəmizin beynəlxalq iqtisadi layihələrdə və qlobal müzakirələrdə fəal tərəfdaş kimi mövqeyini gücləndirir.
İqtisadi xarakter daşımasına baxmayaraq, Davos Forumu beynəlxalq münasibətlər və dünya siyasəti baxımından da mühüm təsir imkanlarına malikdir. Burada təqdim olunan müasir texnologiyalar və irəli sürülən yeni ideyalar qlobal iqtisadiyyatın gələcək istiqamətlərini müəyyənləşdirir. Davos Forumu, eyni zamanda, iqtisadi güc mərkəzləri arasında dialoq və əməkdaşlıq üçün mühüm tribuna rolunu oynayır.
Bu fikirləri AZƏRTAC-a açıqlamasında Milli Məclisin deputatı Samir Vəliyev söyləyib.
O bildirib ki, Azərbaycanın Davos Dünya İqtisadi Forumunda iştirakı 1990-cı illərin ortalarına təsadüf edir və bu proses Ümummilli Lider Heydər Əliyevin adı ilə bağlıdır. 1995-ci ilin yanvarında Heydər Əliyevin Forumda iştirakı Azərbaycanın siyasi, iqtisadi və sosial-mədəni inkişafının beynəlxalq ictimaiyyətə təqdim olunmasına imkan verib. Bu addım Azərbaycanın beynəlxalq arenada tanınmasına və Davos Forumunda davamlı iştirakına möhkəm zəmin yaradıb.
Sonrakı illərdə Prezident İlham Əliyev Davos Forumunda fəal iştirak edərək Azərbaycanın maraqlarını yüksək səviyyədə təmsil edib.
"Dövlətimizin başçısı forum çərçivəsində müxtəlif ölkələrin liderləri və iri şirkət rəhbərləri ilə görüşlər keçirir, aktual qlobal məsələlər üzrə müzakirələrdə iştirak edir. Xüsusilə son illərdə Davos Forumu Azərbaycan üçün mühüm siyasi və iqtisadi dividendlər əldə etmək baxımından əhəmiyyətli olub. Forumda biznes və investisiya mühitinin yaxşılaşdırılması, enerji təhlükəsizliyi və dayanıqlı inkişaf məsələləri Azərbaycanın prioritetləri kimi təqdim olunub. Azərbaycanın balanslaşdırılmış xarici siyasəti və strateji coğrafi mövqeyi Davos platformasında ölkəmizin etibarlı tərəfdaş kimi qəbul edilməsini gücləndirir.
Davos Dünya İqtisadi Forumunun 56-cı iclasında geniş beynəlxalq təmsilçilik Azərbaycanın da qlobal proseslərin mərkəzində yer aldığını göstərib. Prezident İlham Əliyevin müsahibə və panel iclaslarında Azərbaycanın sülhə sadiqliyini, enerji və iqlim məsələlərində mövqeyini açıq şəkildə ifadə etməsi ölkəmizin beynəlxalq nüfuzunu artırıb", - deyə S.Vəliyev vurğulayıb.
Deputat əlavə edib ki, Azərbaycan-Ermənistan sülh prosesinin Davos kimi nüfuzlu platformada müzakirəsi ölkəmizin regional lider rolunu bir daha önə çıxarıb. Xarici dövlət rəhbərlərinin Prezident İlham Əliyevə verdiyi yüksək qiymətlər Azərbaycanın diplomatik nüfuzunun göstəricisi kimi dəyərləndirilir.
jpg_1769006371.jpg)
jpg_1769001505.jpg)
