Biznes mühiti və Beynəlxalq Reytinqlər üzrə Komissiyanın təşəbbüsü ilə ““Biznesin yerləşdiyi yer (əmlakın qeydiyyatı və icarəsi)” indikatoruna dair 2024-cü il üzrə Yol Xəritəsi”nin və “Daşınmaz Əmlakın Elektron Reyestri və Kadastrı” informasiya sistemi üzrə görülmüş işlər barədə təqdimat keçirilib.

AZƏRTAC xəbər verir ki, dövlət və özəl sektor nümayəndələrinin iştirak etdiyi iclasda “Əlverişli Biznes Mühiti” layihəsinin “Biznesin yerləşdiyi yer (əmlakın qeydiyyatı və icarəsi)” indikatoru ilə bağlı təkmilləşmələrin və kommunikasiyanın həyata keçirilməsi, müvafiq tədbirlərin icra vəziyyəti barədə məlumat verilib və müzakirələr aparılıb.

İclası giriş sözü ilə açan Əmlak Məsələləri Dövlət Xidmətinin rəis müavini, işçi qrupunun rəhbəri Rüstəm Şahbazov iclas iştirakçılarına yol xəritəsində torpaq və əmlak idarəçiliyi, daşınmaz əmlakın qeydiyyatı və kadastrı ilə bağlı görüləcək tədbirlər, həyata keçiriləcək layihələr və “Business Ready” (B-READY) reytinqində ölkənin ilkin qiymətləndirilməsinə dair təqdimatda müəyyən edilmiş çatışmazlıqların aradan qaldırılması istiqamətində görüləcək tədbirlər barədə məlumat verib.

Biznes mühiti və beynəlxalq reytinqlər üzrə Komissiyanın Katibliyinin rəhbəri Vüsal Şıxəliyev “Əmlakın qeydiyyatı və icarəsi” İşçi qrupunun fəaliyyət istiqamətləri və qarşıda duran əsas hədəfləri iclas iştirakçılarının diqqətinə çatdırıb.

İqtisadiyyat Nazirliyi yanında Əmlak Məsələləri Dövlət Xidmətinin tabeliyində Daşınmaz Əmlakın Dövlət Kadastrı və Reyestri publik hüquqi şəxsin İdarə Heyətinin sədri Nigar Alimova “Əmlakın qeydiyyatı və icarəsi” İşçi qrupu tərəfindən 2024-cü il üzrə Yol Xəritəsinə dair cari ilin yanvar-iyun aylarında görülmüş işlər barədə məlumat verib. O, əmlak əməliyyatları üçün onlayn xidmətlərin və məlumatların mövcudluğu, qarşılıqlı fəaliyyəti və infrastrukturun etibarlılığının təmin edildiyini bildirib. Daha sonra biznes mühitinin yaxşılaşmasına mühüm töhfə verəcək “Daşınmaz Əmlakın Elektron Reyestri və Kadastrı” informasiya sisteminin yaradılması istiqamətində atılan addımlar barədə iştirakçıları məlumatlandırıb.

Sonda Yol Xəritəsi üzrə tədbirlərin icra vəziyyəti, 2024-cü il üçün hədəflər, prioritetlər barədə müzakirələr aparılıb və özəl sektor nümayəndələrinin, ekspertlərin, media təmsilçilərinin sualları cavablandırılıb.

Qeyd olunub ki, Dünya Bankı Qrupunun “Әlverişli biznes mühiti” layihәsinin ““Biznesin yerləşdiyi yer (əmlakın qeydiyyatı və icarəsi)” indikatoru ilə bağlı müvafiq sahədə təkmilləşmələrin həyata keçirilməsinə dair 2024-cü il üzrə Yol Xəritəsi” Nazirlər Kabineti tərəfindən təsdiq edilib.