Böyük Qayıdışın Ağdam salnaməsi davam etməkdədir. Sevinc, qürur, fəxr hissi ilə keçmiş məcburi köçkünlərimiz öz doğma yurdlarına, el-obalarına qayıdır.
Bu sözləri AZƏRTAC-a müsahibəsində mayın 27-də Bakıdan Ağdam rayonuna yola salınan keçmiş məcburi köçkün Çiçək Babayeva deyib.
"Allaha çox şükür ki, haqq-ədalət öz yerini tapdı, doğma yurd həsrətimiz sona yetdi. Bu hadisələri mən gənc yaşlarımda yaşamışam. İndi isə öz ailəmlə doğma ata ocağıma qayıdıram. Sevincimizin həddi-hüdudu yoxdur”, -deyə Ç.Babayeva vurğulayıb.
O qeyd edib ki, erməni barbarlığı nəticəsində 30 ilə yaxın müddətdə Azərbaycanın işğal olunmuş torpaqları ekoloji terrora məruz qalıb, zəngin yeraltı və yerüstü sərvətləri vəhşicəsinə istismar olunub. Regionun meşə örtüyü məqsədli şəkildə məhv edilib, münbit torpaqları, su ehtiyatları ekoloji və radioaktiv çirklənməyə məruz qoyulub.
Döyüş meydanında 44 günlük Qələbə sayəsindən sonra hazırda "Böyük Qayıdış" Dövlət Proqramı çərçivəsində işlər uğurla davam etdirilir. Bərpa və yenidənqurma prosesi sürətli, sistemli və planlı şəkildə həyata keçirilir.
O deyib ki, bu gün artıq yurduna qovuşmağın sevincini təkcə ağdamlılar yaşamır. Keçmiş məcburi köçkünlərin doğma yurdlarına qayıdışı uğurla davam etdirilir. Dövlətimizin tikib-qurduğu yaşayış məntəqələrimizdə həyat yenidən canlanır.
Vətən uğrunda canlarını fəda etmiş şəhidlərimizə Allahdan rəhmət, qazilərimizə şəfa diləyən Ağdam sakini doğma yurduna qayıtdığına görə Müzəffər Ali Baş Komandan İlham Əliyevə minnətdarlığını bildirib.
