Hər il sentyabrın 18-də Azərbaycanda Milli Musiqi Günü qeyd olunur. Bu bayram müasir peşəkar musiqi sənətimizin banisi Üzeyir Hacıbəylinin doğum günündə keçirilir. Əlamətdar gün münasibətilə Azərbaycanda Üzeyir Hacıbəyli Beynəlxalq Festivalı da açılır.
Bu əlamətdar gündə AZƏRTAC-ın müxbiri ölkəmizin mədəniyyət və incəsənət xadimləri, musiqiçilərlə söhbət edib.
Cavid İmamverdiyev – Azərbaycan Dövlət Akademik Musiqili Teatrının baş rejissoru:
-Hesab edirəm ki, Azərbaycanda musiqi mədəniyyəti həmişə yüksək səviyyədə olub. Ölkəmizdə musiqi həmişə çox yaxşı inkişaf edib və proses bu gün də davam edir. Azərbaycanlılar musiqini çox sevirlər, bu, bizim həyatımızın ayrılmaz hissəsidir. Çox şadam ki, gənclərimiz həm klassik Azərbaycan musiqisini, həm də dünya klassiklərinin əsərlərini dinləyirlər. Peşəkar musiqiyə gəlincə, bu gün bizim gözəl bəstəkarlarımız var: Eldar Mansurov, Cavanşir Quliyev, Faiq Sücəddinov, Elçin İmanov və bir çox başqaları. Caz musiqisi də inkişaf edir - Salman Qəmbərov, Emil Əfrasiyab kimi cazmenlərimiz və bir çox başqa istedadlı musiqiçilərimiz var, etnocaz yaxşı təmsil olunur. Mircavad Cəfərovun rəhbərlik etdiyi “Cəngi” qrupu var. Sərxan Sərxan həm bəstəkar, həm də müğənni-ifaçı kimi aktiv fəaliyyətini davam etdirir. Bizim əla orkestrimiz, həmçinin gənc istedadlı bəstəkarlarımız var.
Üzeyir Hacıbəylinin Azərbaycanın musiqi mədəniyyətində roluna gəlincə, bu, təkcə ölkəmiz üçün əhəmiyyətli deyil. Məsələ burasındadır ki, “Arşın mal alan” operettasını yazanda, Üzeyir bəy konservatoriyada oxuyurdu və onun müəllimi deyirdi: “Nəhayət, Rusiyada ilk operetta yazılıb”. Çünki ondan əvvəl yalnız vodevillər var idi. Məlum olur ki, “Arşın mal alan” Rusiya imperiyasında yaradılmış ilk operettadır. Onu da deyim ki, “Leyli və Məcnun” da Şərqdə ilk operadır. Üzeyir bəyin bütün musiqi əsərləri həyatımızın ayrılmaz hissəsidir, hətta mənə elə gəlir ki, biz bunu genlərimizlə övladlarımıza da ötürürük. Mənim üçün Milli Musiqi Günü böyük bayramdır”.
