Milli Məclisin sədri Sahibə Qafarova Almaniya Federativ Respublikası Bundestaqının sədri Barbel Bas ilə görüşüb.

Parlamentin Mətbuat və ictimaiyyətlə əlaqələr şöbəsindən AZƏRTAC-a verilən məlumata görə, Bundestaqın sədri ölkələrimiz və parlamentlərimiz arasında münasibətlərin inkişaf etdirilməsi ilə bağlı fikirlərini bildirib. O, bu səfərin ikitərəfli əlaqələrin daha da genişlənməsinə müsbət təsir göstərəcəyinə inamını ifadə edib.

Ötən il ölkələrimiz arasında diplomatik münasibətlərin qurulmasının 30 illiyinin qeyd edildiyi diqqətə çatdırılıb, bu dövrdə ikitərəfli münasibətlərin müxtəlif sahələrdə uğurla inkişaf etdiyi, əlaqələrin daha da genişləndirilməsi üçün yaxşı imkanların olduğu bildirilib.

Bundestaqın spikeri hazırda ölkəsinin enerji təchizatında yaranmış problemlərlə bağlı fikirlərini bölüşüb. O, bu çərçivədə Almaniyanın bərpaolunan enerjiyə göstərdiyi diqqət, bu sahədə çalışan şirkətlər, Bundestaqın bu mövzu ilə məşğul olan parlamentariləri haqqında danışıb. Barbel Bas Azərbaycanın da bərpaolunan enerji sahəsində müvafiq qurumları ilə əlaqələrin yaradılması barədə fikirlərini diqqətə çatdırıb.

Azərbaycan və Almaniyanın dost və tərəfdaş ölkələr olduğunu qeyd edən Sahibə Qafarova ölkəmizin Almaniya ilə qarşılıqlı faydalı əməkdaşlığın inkişafında maraqlı olduğunu bildirib.

Söhbət zamanı Azərbaycanda əlverişli investisiya mühiti, işğaldan azad edilmiş ərazilərdə aparılan genişmiqyaslı yenidənqurma işləri, ölkəmizin müasir nəqliyyat infrastrukturu və tranzit ölkə kimi mühüm rolu, bərpaolunan enerji üzrə icra olunan layihələr haqqında məlumat verilib. Qeyd olunub ki, Almaniya Azərbaycanın əsas ticarət tərəfdaşlarından biridir.

Humanitar sahədə də əlaqələrin önəminə diqqət çəkilib, Azərbaycanda mövcud olan tolerantlıq mühiti vurğulanıb, ölkəmizdə alman mühacirlərin tarixi irsinin dövlət səviyyəsində qorunduğu bildirilib.

Qanunverici orqanlar arasında əməkdaşlıq məsələlərinə də toxunan Milli Məclisin sədri ölkələrimizin əməkdaşlığının inkişafında parlamentlərin birgə işinin gücləndirilməsi vacibliyini diqqətə çatdırıb, bu istiqamətdə təmasların və qarşılıqlı səfərlərin önəmi qeyd edilib.

Sahibə Qafarova görüşdə regiondakı mövcud vəziyyət, Ermənistanın Azərbaycan torpaqlarının 30 illik işğalının doğurduğu nəticələr barədə geniş məlumat verib.

Azərbaycanla Ermənistan arasında sülh sazişinin imzalanmasına heç bir maneə olmadığını diqqətə çatdıran Milli Məclisin sədri ölkəmizin sülh sazişinin imzalanması üzrə danışıqları davam etdirməyə hazır olduğunu bildirib.

Bundestaqın sədri Almaniyanın hər zaman Azərbaycanın ərazi bütövlüyünü dəstəklədiyini, regionda sülhün təmin olunmasının, sülh müqaviləsinin imzalanması üzrə danışıqların davam etdirilməsinin önəmini vurğulayıb.

Söhbət zamanı qarşılıqlı maraq doğuran digər məsələlər haqqında da fikir mübadiləsi aparılıb.

Görüşün sonunda S.Qafarova Almaniya Bundestaqının sədrinə “Qarabağ işğaldan əvvəl və sonra” adlı kitabı təqdim edib.

Sonra Azərbaycanın parlament nümayəndə heyətinin üzvləri Almaniya Bundestaqının binası ilə tanış olublar.