Ukraynalı qaçqınların çoxu 2022-ci ildə müharibə başlayandan sonra Ukraynanı tərk edib. Lakin bu ölkədən axın indi də davam edir.
AZƏRTAC xəbər verir ki, bu barədə “RBC-Ukrayna” İqtisadiyyat Nazirliyinin Ukrayna iqtisadiyyatında əsas hadisələrlə bağlı 2025-ci ilin mart ayı üzrə monitorinqinə istinadla məlumat yayıb.
İcmalda qeyd edildiyi kimi, BMT-nin Qaçqınlar üzrə Ali Komissarlığının məlumatına görə, 17 aprel 2025-ci il tarixinə Ukraynadan olan qaçqınların sayı dünya üzrə 6,918 milyon (Avropada 6,358 milyon, ondan kənarda isə 0,56 milyon qaçqın) qeydə alınıb.
2024-cü il dekabrın 16-na olan məlumatlarla müqayisədə Avropadakı qaçqınların sayı 104 min nəfər artıb.
BMT-nin məlumatına görə, ən çox ukraynalı Almaniyada - 1,443 milyon nəfər, Polşada - 999,7 min, Çexiyada - 401,4 min, Böyük Britaniyada - 254 min, İspaniyada - 235,7 min, İtaliyada - 171 min, Fransada - 70,1 min məskunlaşıb.
Bundan əlavə, 2022-ci il iyunun 30-na olan məlumata görə, Rusiyada 1,2 milyon, Belarusda isə 44 min qaçqın (31 mart 2025-ci il tarixinə) qeydə alınıb.
Ötən il ərzində Ukraynadan miqrant axını davam edib və ümumilikdə il ərzində təxminən 0,5 milyon nəfər təşkil edib. NBU-nun gözləntilərinə görə, bu il daha 200 min insan Ukraynanı tərk edəcək.
NBU onların geri dönüşünün 2026-cı ildə başlanacağını (təxminən 0,2 milyon nəfər) gözləyir ki, bu da 2027-ci ildə (təxminən 0,5 milyon nəfər) sürətlənəcək.
Avropa Komissiyasının məlumatına görə, bu ilin yanvarında Aİ-də müvəqqəti sığınacaq alanların sayı 4,3 milyon nəfərə yaxın olub. Bu rəqəmin bir il ərzində sabit qalacağı, daha sonra ilin sonuna qədər 4,1 milyona, 2026-cı ilin sonuna isə 3,8 milyona enəcəyi gözlənilir.
