Yaxın Şərqdə gərginliyin artması fonunda BMT-nin Baş katibi Antonio Quterreş qlobal ərzaq böhranının qarşısının alınması və gübrələrin dəniz yolu ilə ticarətinə dəstək məqsədilə xüsusi mexanizmin yaradılmasına təşəbbüs göstərib.
AZƏRTAC xəbər verir ki, Yaxın Şərqdə davam edən münaqişə və onun genişlənməsi riski qlobal logistikanı pozur. BMT-nin bəyanatında qeyd olunur ki, Hörmüz boğazında gəmiçiliyin pozulması yaxın aylarda “domino effekti” yaradaraq dünyada humanitar vəziyyətə və kənd təsərrüfatı istehsalının həcminə birbaşa təsir göstərə bilər.
Bu problemlərə operativ reaksiya vermək məqsədilə Antonio Quterreş ixtisaslaşmış Məqsədli qrup yaradıb. Quruma rəhbərlik BMT Baş katibinin müavini, BMT-nin Layihə Xidmətləri İdarəsinin (UNOPS) icraçı direktoru Jorje Moreyra da Silvaya həvalə olunub. Qrupa həmçinin BMT-nin Ticarət və İnkişaf Konfransı (UNCTAD), Beynəlxalq Dəniz Təşkilatı (IMO) və Beynəlxalq Ticarət Palatası (ICC) daxil edilib.
Qurumun əsas prioriteti Hörmüz boğazı zonasında humanitar problemlərin həllinə yönəlmiş texniki mexanizmlərin hazırlanması olacaq. Zərurət yaranarsa, əlavə ekspert qurumları da bu işə cəlb ediləcək.
BMT-dən bildirilib ki, yeni təşəbbüs təşkilatın təcrübəsinə əsaslanır. Bu çərçivədə Yəmən üçün Yoxlama və Monitorinq Mexanizmi, Qara dəniz taxıl təşəbbüsü və Qəzzaya humanitar yardım tədarükləri üzrə 2720 saylı mexanizm nümunə göstərilir. Qrupun əsas məqsədi gübrələrin və onların istehsalı üçün xammalın fasiləsiz ticarətinə dəstək verməkdir. Qeyd olunub ki, mexanizmin işə salınması üzv dövlətlərlə sıx əməkdaşlıq şəraitində, onların milli suverenliyinə tam hörmətlə və beynəlxalq hüquq çərçivəsində həyata keçiriləcək.
Baş katib problemin hərtərəfli və uzunmüddətli həllinin tapılmasına sadiq olduğunu təsdiqləyib, lakin vurğulayıb ki, regionda qeyri-sabitliyin iqtisadi və humanitar nəticələrini yumşaltmaq üçün dərhal tədbir görülməlidir. “Bu təşəbbüs uğurlu olarsa, münaqişənin həlli üzrə diplomatik proses çərçivəsində ölkələr arasında etimadı möhkəmləndirəcək və daha geniş siyasi nizamlanma üçün mühüm addım olacaq”, – deyə bəyanatda bildirilir.
Məqsədli qrupun texniki fəaliyyəti ilə paralel olaraq, üzv dövlətlərlə siyasi qarşılıqlı fəaliyyətə Yaxın Şərq münaqişəsi üzrə Baş katibin yeni təyin olunmuş şəxsi nümayəndəsi Jan Arno rəhbərlik edəcək.
