"Bir şuşalı kimi xoşbəxtəm ki, şəhərin yenidən qurulmasında iştirak edirəm"

Bu gün Qarabağın, Şərqi Zəngəzurun mənzərəsini göz önündən keçirəndə könlün qürurlanır, ürəyin fərəhlə döyünür. Otuz il düşmən işğalında inləyən doğma yurd yerlərimiz yazda təbiət canlanan  kimi dirçəlir, yenilənir. Hər addımda  ürək açan, xoş ovqat  yaradan bir həyat  tablosu. 
Bu qədim diyarın əsl sahibləri qanları, canları bahasına azad etdikləri əraziləri necə həvəslə, dağ selinə bənzəyən bir coşquyla tikib-qurur, ana torpağın yaralarına ürəklərinin odu, əllərinin hərarəti ilə  məlhəm olur, erməni barbarlarının  görünməmiş vəhşiliklə dağıdıb, odlara qalayıb viran qoyduqları  kəndlərin, şəhərlərin yerində gözəlliyi ilə göz qamaşdıran yeni yaşayış  evləri, məktəblər, xəstəxanalar inşa edir, yollar çəkir, körpülər salır, bu yerlərin  əzəli sahiblərinin rahatlığına hesablanan müasir infrastruktur  layihələrini həyata keçirirlər.
Şanlı ordumuzun, qəhrəman Azərbaycan əsgərinin şücaəti,  Müzəffər Ali Baş Komandan İlham  Əliyevin qüdrəti sayəsində erməni işğalından azad edilən Qarabağ və Şərqi Zəngəzur bu gün böyük bir inşaat meydanına çevrilib. Dünən  gücünü müharibəyə səfərbər edib onun bütün dünyanı heyrətə salan ən qısa müddətdə - cəmi 44 gün ərzində  şanlı qələbə ilə başa çatmasını  təmin edən Prezident, Silahlı Qüvvələrin Ali Baş Komandanı İlham Əliyev bu gün Qarabağı, Şərqi Zəngəzuru qarış-qarış gəzib dolanır, uğurla reallaşan möhtəşəm tikinti, bərpa, quruculuq  işləri ilə yerində tanış olur,  yeni layihələrə xeyir-dua verir, yeni  kəndlərin, şəhərlərin, fabriklərin, elektrik stansiyalarının təməlini qoyur. Dünən təşnəsi olduğumuz Qarabağ zəfərini qüdrətli sərkərdə  məharəti ilə gerçəkləşdirən İlham Əliyev bu gün vətən sevdalı bir memar kimi bütün enerjisini işğaldan azad olunmuş ərazilərin hər qarışını cənnətə  döndərməyə sərf edir. Bu alqışa  layiq rəhbər məqsədinin, əsl vətəndaş  mövqeyinin məntiqi nəticəsidir ki, Qarabağın, Şərqi Zəngəzurun yenidən qururlmasına, kəndlərin, şəhərlərin tikintisinə, yolların, tunellərin, infrastruktur layihələrinin inşasına dünyanın məşhur şirkətləri cəlb edilib. Yaradılan şərait, dövlət səviyyəsində davamlı dəstək və diqqət isə öz növbəsində genişmiqyaslı  quruculuq işlərinə zərbəçi ahəng verir.
Gündən-günə vüsət alan tikinti-quruculuq işlərinin meydanı nə qədər geniş olsa da, əsas diqqət mərkəzində başımızın tacı, Qafqazın mirvarisi olan Şuşadır. Çox qısa  bir zaman kəsimində bütün türk  dünyasına günəş kimi doğan Şuşanın yüksək  zövqlə tikilib-qurulmasına, hər daşın, hər naxışın zərgər dəqiqliyi ilə yerləşdirilməsinə böyük önəm verilir. Bu baxımdan Şuşada tikinti, quruculuq işlərinin aparılması seçilmiş, ən təcrübəli, ən bacarıqlı inşaatçılara etibar edilir. 
"Fərid-İnşaat"  şirkətinin seçilmişlər sırasında yer alması təsadüfi  deyil. Şirkət inşa etdiyi müasir tələblərə cavab verən yaraşıqlı məktəblərlə, xəstəxanalarla ölkəmizin müxtəlif rayonlarında hər zaman minnətdarlıqla xatırlanan silinməz izlər  qoyub. Bu gün isə "Fərid-İnşaat" yenə diqqət mərkəzində - Şuşadadır. Şirkətə ölkənin  sayılıb-seçilən mühəndisi Sübhan Həsənov rəhbərlik edir.  Sadə, səmimi və son dərəcə təvazökar insandır. Uşaqla uşaqdı, böyüklə böyük. Yaşadığı Bərdə şəhərində xeyirxahlığı ilə də məşhurdur. Çətinə, dara düşənə arxa durur, əl tutur və bunu da dilə gətirməz.  Bizimlə  söhbəti də yetərincə maraqlı alındı:
- Tikib-qurmaq, həyatda yaxşı iz qoymaq  könül rahatlığıdır. Tikdiyin məktəbi, xəstəxananı təhvil verəndə açılış mərasiminə toplaşan insanların alqışları, minnətdarlığı aylarla çəkdiyin zəhmətin  ağrı-acısını bir anda unutdurur. Özünü xoşbəxt sayırsan. Amma unutmayaq ki, tikinti-quruculuq  layihələrinin reallaşması dövlətin  iqtisadi qüdrətindən, bu dövlətə  rəhbərlik edənin niyyət və məramında çox asılıdır. Biz sadəcə icraçılarıq, əsas müəllif Prezident  İlham Əliyevdir. Mən əslən şuşalıyam. Amma uzun illərdir ki, Bərdədə yaşayıram. Şuşaya işləməyə dəvət olunanda uşaq kimi kövrəldim. Bunu həyatımın ən fərəhli xəbəri, bir möcüzə kimi qəbul etdim.  Atalarımın, babalarımın yaşadığı, hər daşında, hər cığırında uşaqlıq xatirələrim olan doğma Şuşanın  yaralarına məlhəm olmağa dəvət almağımı ömrümün ən şirin, ən xoşbəxt anı kimi heç zaman unutmayacağam. Özümü bir də ona görə xoşbəxt  sanıram ki,  bu gün həm də yenidən tikilib-dirçələn Qarabağın və Şərqi Zəngəzurun baş memarı İlham Əliyevin komandasında sıradan bir inşaatçı  kimi çalışıram. Bir şuşalı kimi xoşbəxtəm ki, şəhərin yenidən qurulmasında iştirak edirəm. Bu, ölçüyəgəlməz qürur mənbəyidir, qurub-yaratmağın stimuludur. Biz hazırda Şuşada 4 hektar ərazidə şəhər mərkəzi xəstəxanası tikirik. Bu, çox  möhtəşəm və müasir tələblərə cavab verəcək səhiyyə müəssisəsi olacaq. Tikinti işləri sürətlə gedir. Qrafiki qabaqlamaq, obyekti nəzərdə tutulan vaxtdan əvvəl təhvil verməyə çalışırıq. Əmək ehtiyatımız, işçi qüvvəmiz yetərincədir. Mal-material sarıdan da  korluğumuz yoxdur.
Doğma Şuşa səni düşmən caynağından alıb bizə qaytaranlara eşq olsun! Uğrunda şəhid olub əbədiyyətə  qovuşanlar heç vaxt unudulmayacaq. Nə qədər bu xalq var, Şuşanın xilaskarları könüllərdə əbədi  yaşayacaq. Sən yeni doğulan körpə kimisən, əziz Şuşa. Hər gün bir boy da ucalırsan. Övladların səni  sevə-sevə, başına pərvanə kimi dolana-dolana, hər kərpicinə hərarətli əlləriylə sığal çəkə-çəkə tikib qururlar. Biz xoşbəxtik! Nə xoş ki,  sənə qovuşduq. Nə xoş ki, qəhrəman oğulların azğın düşməni bu yerlərdən qovdu, həsrət, nisgilə son verdi.

Lazım QULİYEV,
"Azərbaycan"