Bakı Slavyan Universitetində 2025–2026-cı tədris ili üzrə “Məzun günü” təntənəli şəkildə qeyd olunub. Universitetdə təşkil olunan mərasimdə dövlət və hökumət nümayəndələri, ali təhsil müəssisələrinin rəhbərləri, professor-müəllim heyəti, tələbələr, məzunlar, onların valideynləri və digər qonaqlar iştirak ediblər.
AZƏRTAC xəbər verir ki, tədbir Vətən uğrunda canından keçmiş şəhidlərin əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.
Mərasimdə Bakı Slavyan Universitetinin rektoru Anar Nağıyev çıxış edərək bildirib ki, məzunların ali təhsil illərində qazandıqları bilik və bacarıqlar onların gələcək fəaliyyətində mühüm rol oynayacaq. O qeyd edib ki, Ümummilli Lider Heydər Əliyevin "Təhsil millətin gələcəyidir" fikri bu gün də ölkəmizdə həyata keçirilən dövlət təhsil siyasətinin əsas istiqamətlərindən biridir.
Tədbirdə çıxış edən gənclər və idman naziri Fərid Qayıbov vurğulayıb ki, dövlət gənclər siyasətinin mərkəzində hər zaman innovativ, vətənpərvər və dünyaya açıq gənclərin yetişdirilməsi dayanır. O qeyd edib ki, müxtəlif dillərdə sərbəst ünsiyyət quran Bakı Slavyan Universitetinin tələbələri bu siyasətin uğurlu nəticələrinin bariz nümunəsidir. Nazir vurğulayıb ki, əsas məqsəd gənclərin ölkəsinə və dünyaya faydalı vətəndaş kimi formalaşmasıdır.
Mərasimdə, həmçinin Yeni Azərbaycan Partiyası Sədrinin müavini – Mərkəzi Aparatın rəhbəri Tahir Budaqov, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycan Dövlət Pedaqoji Universitetinin beynəlxalq əlaqələr üzrə prorektoru Mahirə Hüseynova, Qərbi Azərbaycan İcmasının İdarə Heyətinin sədri Əziz Ələkbərli və digər qonaqlar iştirak ediblər.
Tədbir çərçivəsində universitetin ictimai, elmi və mədəni həyatında fəal iştirak edən tələbələrə təşəkkürnamələr təqdim olunub.
“Məzun günü”nün xüsusi qonaqları əməkdar artist Ədalət Şükürov və Murad Arif çıxış edərək tədbirə bayram ab-havası bəxş ediblər.
Sonda məzunlar ənənəvi papaqatma mərasimində iştirak edərək tələbəlik illəri ilə vidalaşıblar.
jpg_1782805967.jpg)
