Prezident İlham Əliyevin 2025-ci ilin yekunlarına dair müraciəti Azərbaycanın müasir inkişaf mərhələsinin əsas siyasi, iqtisadi, təhlükəsizlik və xarici siyasət prioritetlərini sistemli şəkildə əks etdirən mühüm tezis xarakteri daşıyır. Müraciətdə ötən il ərzində əldə olunmuş nailiyyətlərə diqqət çəkilməklə yanaşı, eyni zamanda ölkənin gələcək inkişaf istiqamətləri və strateji hədəfləri aydın şəkildə ifadə olunur.
Milli Məclisin deputatı Zaur Şükürov qəzetimizə açıqlamasında bildirib ki, dövlət başçısının müraciətində 2025-ci ilin Azərbaycan üçün ümumilikdə uğurlu il olduğu qeyd edilərək, xalqımızın sülh, təhlükəsizlik, əmin-amanlıq şəraitində yaşadığı vurğulanır. Həqiqətən də, bu qiymətləndirmə ölkədə daxili sabitliyin qorunmasını, ictimai-siyasi mühitin dayanıqlılığını və dövlət idarəçiliyinin effektivliyini əks etdirir. "2025-ci il Vətən müharibəsində qazanılmış tarixi zəfərin beşinci ildönümü ilə də əlamətdar olub. Prezidentimiz müraciətində bu məsələyə xüsusi yer ayıraraq, Vətən müharibəsi zamanı əldə etdiyimiz tarixi qələbəmizin bizimlə əbədi olacağını qeyd etdi. Otuz ilə yaxın davam etmiş işğala son qoyan, ərazi bütövlüyümüzün və suverenliyimizin tam şəkildə bərpası ilə nəticələnmiş bu zəfərin Azərbaycan xalqının milli ləyaqətinin və tarixi ədalətin bərpası baxımından mühüm əhəmiyyət daşıyır", - deyə o əlavə edib.
Deputat qeyd edib ki, Zəfərin beşinci ildönümü münasibətilə keçirilmiş hərbi parad Azərbaycan Silahlı Qüvvələrinin son illər ərzində keçdiyi inkişaf yolunu nümayiş etdirib. Prezident İlham Əliyevin qeyd etdiyi kimi, son beş il ərzində Azərbaycan Silahlı Qüvvələri öz gücünü böyük dərəcədə artırıb. Ordunun maddi-texniki bazasının möhkəmləndirilməsi, yeni silah və texnikanın istismara verilməsi, eləcə də şəxsi heyətin peşəkarlığının artırılması nəticəsində Azərbaycan Ordusu bu gün istənilən vəzifəni yerinə yetirmək iqtidarındadır. Xüsusi təyinatlı qüvvələrin sayının artırılması və komando qüvvələrinin formalaşdırılması ordunun döyüş qabiliyyətinin keyfiyyətcə yeni mərhələyə yüksəldiyini göstərir. Bununla yanaşı, Prezident İlham Əliyev Azərbaycanın hərbi siyasətinin müdafiə xarakteri daşıdığını xüsusi vurğuladı. Dövlət başçısının sözlərinə görə, biz yeni müharibəyə hazırlaşmırıq. Bizim üçün müharibələr arxada qaldı. Eyni zamanda müraciətdə qeyd olunur ki, müasir beynəlxalq münasibətlər sistemində beynəlxalq hüquq normalarının effektiv işləmədiyi, qlobal miqyasda silahlanma prosesinin genişləndiyi bir şəraitdə hər bir dövlət öz təhlükəsizliyini təmin etməlidir. Bu kontekstdə Azərbaycanın güclü orduya malik olması milli təhlükəsizliyin əsas təminatçısı kimi dəyərləndirilir.
Deputatın sözlərinə görə, Vətən müharibəsindən sonrakı dövrdə Azərbaycanın əsas prioritetlərindən biri əldə edilmiş zəfərin beynəlxalq-siyasi müstəvidə möhkəmləndirilməsi olub: "Bu istiqamətdə aparılan ardıcıl siyasət nəticəsində Azərbaycanın haqlı mövqeyi beynəlxalq ictimaiyyət tərəfindən qəbul edilib. Keçmiş Ermənistan-Azərbaycan münaqişəsinin həlli üçün mandat verilmiş, lakin səmərəli fəaliyyət göstərməmiş Minsk qrupu və əlaqəli orqanların ləğv edilməsi və Qarabağ məsələsinin beynəlxalq gündəlikdən çıxarılması məhz bu siyasətin məntiqi nəticəsidir. Azərbaycan qalib dövlət kimi regionda davamlı sülhün təmin olunmasında maraqlı olduğunu bəyan edib və Ermənistana sülh təşəbbüsü ilə çıxış edib. Prezident İlham Əliyev bu mövqeni belə ifadə edir: "Biz əbədi müharibə aparmaq fikrində deyilik. Bizim başqa ölkələrin torpaqlarında gözümüz yoxdur". Ermənistanla paraflanmış sülh müqaviləsi Cənubi Qafqazda uzunmüddətli sabitliyin yaradılması baxımından mühüm siyasi hadisə kimi dəyərləndirilir".
Z.Şükürov qeyd edib ki, müraciətdə Azərbaycanın xarici siyasət sahəsində əldə etdiyi nailiyyətlərə də toxunulur. 2025-ci ildə ölkəmizin D-8 beynəlxalq təşkilatına üzv qəbul edilməsi, həmçinin Orta Asiya ölkələrinin Məşvərət Şurasında tamhüquqlu üzv statusu qazanması Azərbaycanın beynəlxalq nüfuzunun artdığını göstərir. "Prezident İlham Əliyev də bildirdi ki, bu faktlar Azərbaycana dünyada böyük hörmətlə yanaşıldığını bir daha təsdiqləyir. Ölkədə keçirilmiş beynəlxalq tədbirlər də Azərbaycanın regional və qlobal əməkdaşlıq platformalarında fəal rol oynadığını nümayiş etdirir. Xankəndidə keçirilmiş İqtisadi Əməkdaşlıq Təşkilatının Zirvə Görüşü və Qəbələdə təşkil olunmuş Türk Dövlətləri Təşkilatının Zirvə Görüşü Azərbaycanın həm regional, həm də türk dünyası miqyasında əməkdaşlıq proseslərinə verdiyi töhfənin göstəricisidir", - deyə o əlavə edib.
İqtisadi sahədə əldə edilmiş nəticələrin müraciətdə xüsusi yer tutduğunu diqqətə çatdıran deputat deyib ki, Prezident İlham Əliyev Azərbaycanın valyuta ehtiyatlarının 80 milyard dolları ötərək tarixi maksimum səviyyəyə çatdığını bildirib: "Xarici borcun ÜDM-in 6,3 faizini təşkil etməsi ölkənin maliyyə dayanıqlılığını və iqtisadi müstəqilliyini nümayiş etdirir. Prezidentin qeyd etdiyi kimi, bizim valyuta ehtiyatlarımız xarici borcumuzu 16 dəfə üstələyir. Bu göstəricilər beynəlxalq reytinq agentlikləri tərəfindən də müsbət qiymətləndirilib və Azərbaycanın kredit reytinqi yüksəldilib. Nəticə etibarilə, Prezident İlham Əliyevin 2025-ci ilin yekunlarına dair müraciəti Azərbaycanın güclü dövlətçilik əsaslarına malik olduğunu, müstəqil və milli maraqlara əsaslanan siyasət yürütdüyünü və gələcəyə inamla baxdığını bir daha nümayiş etdirir".
Əsmər QARDAŞXANOVA,
"Azərbaycan"
jpeg_1769583202.jpeg)
