Bu gün beynəlxalq münasibətlər sistemi sürətlə transformasiya olunur. Asiya, Afrika, Latın Amerikası və Sakit okean hövzəsinin inkişaf etməkdə olan ölkələrini əhatə edən Qlobal Cənub beynəlxalq idarəetmədə söz sahibi olmaq istəyən böyük siyasi platformadır.
Bunu AZƏRTAC-a açıqlamasında Milli Məclisin deputatı Könül Nurullayeva deyib.
O bildirib ki, Azərbaycan da son illərdə bu proseslərin fəal iştirakçılarından birinə çevrilib. Xüsusilə 2019-2023-cü illərdə Qoşulmama Hərəkatına uğurlu sədrlik ölkəmizin beynəlxalq nüfuzunu əhəmiyyətli dərəcədə artırıb: “Bakı inkişaf etməkdə olan ölkələrin siyasi dialoqunun mühüm mərkəzlərindən birinə çevrilib. Azərbaycanın 2011-ci ildən Qoşulmama Hərəkatının üzvü olması, 2019-cu ildə isə yekdil qərarla sədr seçilməsi ölkəmizə olan beynəlxalq etimadın göstəricisi idi. Belə ki, Azərbaycanın sədrliyi dövründə Qoşulmama Hərəkatının institusional inkişafı istiqamətində mühüm addımlar atılıb. Parlament Şəbəkəsi, Gənclər Təşkilatı və müxtəlif tematik platformaların yaradılması hərəkatın fəaliyyətini yalnız siyasi bəyanatlarla məhdudlaşdırmayıb, onu davamlı əməkdaşlıq mexanizmləri ilə zənginləşdirib”.
Deputat qeyd edib ki, COVID-19 pandemiyası dövründə Azərbaycanın təşəbbüsü ilə keçirilən Qoşulmama Hərəkatının Zirvə Görüşü və inkişaf etməkdə olan ölkələrin problemlərinin beynəlxalq gündəliyə çıxarılması ölkəmizin məsuliyyətli qlobal tərəfdaş kimi qəbul olunmasına mühüm töhfə verib. “Sədrlik müddəti başa çatdıqdan sonra da Azərbaycan bu istiqamətdə fəaliyyətini dayandırmayıb. Əksinə, Qlobal Cənub ölkələri ilə siyasi dialoqu daha geniş formatda davam etdirərək, yeni əməkdaşlıq platformalarının formalaşmasına təşəbbüs göstərib. COP29 çərçivəsində və ondan sonrakı dövrdə Qlobal Cənub ölkələrinin qeyri-hökumət təşkilatlarının bir araya gətirilməsi, Qlobal Cənub QHT Platformasının yaradılması Azərbaycanın bu istiqamətdə uzunmüddətli strateji baxışının göstəricisidir”, - deyə o vurğulayıb.
Könül Nurullayeva diqqətə çatdırıb ki, Azərbaycanın Qlobal Cənub ölkələri ilə qurduğu etibarlı tərəfdaşlıq beynəlxalq təşkilatlarda keçirilən səsvermələrdə də özünü göstərir. Azərbaycan, eyni zamanda, inkişaf etməkdə olan dövlətlərin beynəlxalq maliyyə institutlarında, iqlim danışıqlarında və BMT çərçivəsində daha ədalətli təmsil olunmanı dəstəkləyən mövqeyi ilə də Qlobal Cənub ölkələrinin marağını cəlb edir. Bu isə beynəlxalq səsvermələrdə qarşılıqlı siyasi həmrəyliyi gücləndirən əsas amillərdəndir.
