Beynəlxalq əlaqələr siyasi münasibətlər əsasında
formalaşır. Siyasi münasibətlər qarşılıqlı ehtiramdır, inamdır, iqtisadi əməkdaşlıqdır.
Bu gün Azərbaycanın dünyanın bir çox dövlətləri
ilə ikitərəfli, çoxtərəfli əlaqələri var və bu əlaqələr müxtəlif müstəvilərdə
genişlənməkdədir. Qarşılıqlı əlaqələr rəsmi səfərlərlə daha da inkişaf
etdirilir.
Azərbaycanın sıx əlaqələri olan dövlətlərdən
biri də İtaliyadır. İtaliya Respublikası Nazirlər Şurasının sədri Ciorcia
Meloninin mayın 4-də Azərbaycana səfəri iki dövlət arasında münasibətlərin
genişləndirilməsi baxımından dəyərləndirilməlidir. Səfər zamanı Azərbaycan
Respublikasının Prezidenti cənab İlham Əliyev bəyanatında bu səfərin əhəmiyyətini
vurğulayaraq və Azərbaycanla İtaliyanın strateji tərəfdaş olduğunu, 2014-cü və
2020-ci illərdə strateji tərəfdaşlığa dair iki bəyannamə imzalandığını bildirərək
dedi: “Bizim münasibətlərimizin əsasını təşkil edən bu iki sənəd və sənədlərdə
təsbit edilmiş məsələlər bu gün həyatda da öz əksini tapır. Sizin bu gün Azərbaycanda
olmağınız bir daha Azərbaycan-İtaliya əlaqələrinin nə qədər dərin məzmunlu
olmasından xəbər verir. Hər kəs bilir ki, Siz bu gün Ermənistanda idiniz. Ermənistanda
öz proqramınızı bitirib Azərbaycana gəlmək bizim üçün xüsusi məna daşıyır, çox
böyük rəmzi məna daşıyır, eyni zamanda, Azərbaycana göstərilən hörmətin və xoş
münasibətin bariz təzahürüdür. Bizim siyasi əlaqələrimiz ən yüksək səviyyədədir...”.
Tərəfdaşlıq geniş anlayışdır. İtaliya ilə Azərbaycan
arasında tərəfdaşlıq da geniş sahələri əhatə edir. Bu baxımdan dövlət başçımız
İtaliya ilə Azərbaycan arasında ticarət əlaqələrinin yaxşı olduğunu, keçən il
ticarət dövriyyəmizin 12 milyard dolları haqladığını, tərəfdaşlığın əsas
istiqamətlərindən birinin energetika sahəsini əhatələdiyini, Azərbaycanın
İtaliyanın həm neft, həm də qaz təchizatında ikinci yerdə olduğunu da bildirərək
dedi: “Keçən il Azərbaycan 25 milyard kubmetr təbii qaz ixrac edib, onun 9,5
milyardı İtaliya bazarına ixrac olunmuşdur. Bu gün söhbətlər və danışıqlar əsnasında
biz bu həcmi artırmaq üçün müzakirələr aparmışıq. Bunun üçün təbii ki, Cənub
Qaz Dəhlizinin tərkib hissəsi olan TAP layihəsinin genişləndirilməsi lazımdır.
Artıq müəyyən dərəcədə genişləndirilib, amma bu proses davam etdirilməlidir”.
Son illərdə dünyada baş verən hadisələr, müxtəlif regionlarda
sülhə qarşı təhdidlər, anlaşılmazlığın böyüyüb müharibəyə çevrilməsi və s. beynəlxalq
ictimaiyyəti dərindən düşündürür. Heç bir dövlət belə hadisələrdən
sığortalanmayıb. Bu səbəbdən hər dövlət özünün təhlükəsizliyinin təmin olunması
üçün gərəkli, zəruri tədbirlər görür. Belə tədbirlərdən biri də hərbi-texniki əməkdaşlıqdır.
İtaliya Respublikası Nazirlər Şurasının sədri Ciocia Meloninin Azərbaycan səfəri
zamanı Prezident İlham Əliyev iki dövlət
arasındakı hərbi-texniki əməkdaşlıq barədə məlumat verərək qeyd etdi ki, birgə
layihələr həyata keçiriləcək.
İtaliya ilə Azərbaycan arasında təhsil sahəsində
də əməkdaşlığın genişləndiyini vurğulayan dövlət başçımız dedi: “Keçən il
Bakıda böyük təntənə ilə İtaliya-Azərbaycan Universiteti açılmışdır. Azərbaycanda
təhsilin inkişafına bu universitetin çox böyük təsiri və töhfəsi olacaq. Bizə
verilən məlumata görə, artıq 500-dən çox tələbə orada təhsil alır və gələcəkdə
onlar həm peşəkar mütəxəssislər, həm də ki, Azərbaycanın İtaliyada və
İtaliyanın Azərbaycanda təbii elçiləri olacaqlar...”.
Azərbaycan - İtaliya münasibətləri qarşıdakı
dövrdə daha da genişlənəcək və Prezident İlham Əliyevin dediyi kimi, bizim
dostluğumuz bundan sonra inamla davam etdiriləcəkdir.
Səbinə XASAYEVA,
Milli Məclisin deputatı
