Alimlər “Lunar Reconnaissance Orbiter” adlı orbital aparat tərəfindən əldə edilmiş məlumatları təhlil edərək təyin ediblər ki, Ay səthinin xüsusi yerlərində öncə düşünüldüyündən daha çox miqdarda buz şəklində su mövcuddur. Bu, gələcək Ay missiyaları üçün olduqca böyük əhəmiyyət daşıyır. Belə ki, buz halında suyu içməli suya çevirmək və onu hidrogen ilə oksigenə ayıraraq raket yanacağının istehsalında istifadə etmək olar.

Ehtimal edilir ki, Ayda su komet və asteroidlərin onunla toqquşmaları səbəbilə formalaşıb. Digər tərəfdən su buxar şəklində Ayın dərinliklərindən onun səthinə doğru çıxmış ola bilər. Daha öncəki araşdırmalara əsasən, buz şəklində su ehtiyatları, əsasən, Ayın Cənub qütbü sahəsindəki daimi şəkildə qaranlıqda qalan ərazilərdə mövcuddur. Buz şəklində su ehtiyatları kraterlərdə və çökəkliklərdə aşkar edilmişdi. Həmin ərazilərə heç zaman Günəş şüası düşmür. Buna görə də həmin ərazilərdə su buz şəklində milyardlarla il qala bilir.

Güman olunur ki, Ay səthindəki su ehtiyatı insanların Ayda uzunmüddətli mövcudluqları üçün kifayət edəcək səviyyədədir. İndi isə alimlər təyin ediblər ki, Ay səthində buz şəklində su ehtiyatı təkcə Cənub qütbündə deyil, həmçinin 77 dərəcə cənub eni üzrə də yayılıb. Alimlərin sözlərinə görə, həmin ərazilər də daimi şəkildə qaranlıq mühitdə olurlar. Mütəxəssislər buz şəklində su ehtiyatlarının mövcud olduqları ərazilərin ilkin xəritəsini tərtib ediblər. Alimlər qeyd ediblər ki, ən böyük su ehtiyatları Ay səthində mənfi 198 dərəcədən daha aşağı temperatura sahib ərazilərdə yerləşirlər.

Ülkər XASPOLADOVA,

“Azərbaycan”