24 nəfər həlak olub, bəzi şəhərlərdə fövqəladə vəziyyət elan edilib
Mərkəzi və Şərqi Avropada tüğyan edən "Boris" qasırğası nəticəsində ən azı 24 nəfər həlak olub. Təbii fəlakət Polşa, Rumıniya, İtaliya, Çexiya, Slovakiya, Avstriya və Macarıstanda bir çox yaşayış məntəqəsinə ziyan vurub.
Polşanın cənub-qərbindəki Vroslav şəhərində əsgərlər və könüllülər evləri və iş yerlərini qorumaq üçün şəhər ətrafındakı məcrasından çıxmış çayların yaxınlığında qum torbaları yerləşdiriblər. Ölkənin cənubundakı sakinlərə kömək etmək üçün 5 mindən çox əsgər göndərilib. Təxminən 40 min insan Nısa şəhərindən təxliyə edilib. Polşanın Baş naziri Donald Tusk bir ay davam edəcək fövqəladə vəziyyət elan edib.
Rumıniyanın Qalats bölgəsində baş verən daşqınlar fəlakətlə nəticələnib. İnsanların illərlə qazandıqları hər şey indi torpaq altına düşüb. Özü də bu, təkrarlanan fəlakətdir: ərazi keçmişdə iki dəfə güclü daşqınlardan əziyyət çəkib.
Slobozia-Konaki kəndində su 750 evə, yəni kəndin təxminən 80 faizinə ziyan vurub. Hakimiyyət evsizlər üçün düşərgə qurub.
Kostace Neqri kəndində su yolun bir hissəsini aparıb. Ərazidə 2013-cü və 2016-cı illərdə də daşqınlar baş verib. Hakimiyyət o vaxtdan bəri burada təbii fəlakətlərdən qorunmaq üçün hansısa tədbirin görülüb-görülmədiyini deyə bilmir.
Çexiyada 15 min insan təxliyə edilib. Yerli qeyri-hökumət təşkilatı "Clovek v tisn"nin məlumatına görə, Çexiya son 27 ilin ən güclü daşqını ilə üzləşib.
Ən çox zərər çəkmiş şəhərlərdən biri də Ostrava olub.
Slovakiya və Macarıstanda Dunay çayında suyun səviyyəsi sürətlə yüksəlməkdə davam edir. Bu səbəbdən Bratislava və Budapeşt mümkün daşqınlara hazırlaşır. Leanifalou kəndində macar əsgərləri qum torbalarından istifadə edərək daşqına qarşı baryerlərin qurulmasına kömək edirlər.
Kütləvi informasiya vasitələrinin verdiyi məlumata görə, yüksək su səviyyəsinə görə Avstriya hakimiyyəti Dunay çayının bəzi hissələrini naviqasiya üçün bağlayıb.
Xorvatiya Meteorologiya və Hidroloji Xidməti çayda suyun "son dərəcə nadir" yüksəlməsi ilə bağlı xəbərdarlıq edib və zərurət yaranarsa daşqın baryerlərinin qurulmasının planlaşdırıldığını təsdiqləyib.
İtaliyanın şimalındakı Emilia-Romanya bölgəsində, Brizigella şəhərinin səlahiyyətliləri sosial şəbəkələr vasitəsilə zərər çəkmiş ərazilərdəki insanları evlərini tərk etməyə çağırır, çünki növbəti 24-36 saat ərzində şiddətli hava xəbərdarlığı hələ də qüvvədədir. Ölkənin mərkəzində yerləşən Peskara şəhərində artıq daşqınlar başlayıb.
Avropa Komissiyasının sədri Ursula fon der Lyayen Polşanın baş naziri Donald Tusk və daşqınlardan zərər çəkmiş ölkələrin digər hökumət başçıları ilə görüşmək üçün Vroslava yollanıb.
Meteoroloqların bildirdiyinə görə, Mərkəzi Avropada rekord miqdarda yağan yağışlara iqlim dəyişikliyi də daxil olmaqla bir sıra amillər səbəb olub.
Rizvan CƏFƏROV,
"Azərbaycan"
