Elm və Təhsil Nazirliyinin Elm və ali təhsil siyasəti şöbəsinin təşkilatçılığı ilə "Ali təhsildə elmi fəaliyyətin və tədrisin təşkili: cari vəziyyət və yeni çağırışlar" və "Orta ixtisas təhsili pilləsində tədrisin təşkili: normativlər və cari vəziyyət" adlı tədbirlər keçirilib.
İlk tədbirin açılışında çıxış edən Elm və Təhsil Nazirliyinin Aparat rəhbəri Mətin Kərimli "Azərbaycan Respublikasının sosial-iqtisadi inkişaf strategiyası"nda ali təhsilə əlçatanlığın artırılmasının əsas hədəflərdən biri olduğunu nəzərə çatdırıb. Aparat rəhbəri 2024-cü ildə ali təhsilin bakalavriat səviyyəsinə qəbul olanların sayının 74 min nəfər olmasının sevindirici hal olduğunu, 2025-ci ildə bu sayın 75 min nəfərə çatdırılmasının nəzərdə tutulduğunu söyləyib.
Birgə səylər nəticəsində bu hədəfə çatacaqlarına ümid edən Mətin Kərimli qeyd edib ki, artıq ali təhsilin bakalavriat və magistratura səviyyələrinə qəbul olan hər iki nəfərdən biri dövlət hesabına təhsil alır. Eyni zamanda cari tədris ilindən etibarən ali təhsil müəssisələrinə doktorantura səviyyəsi üzrə qəbul olan bütün şəxslər dövlət hesabına təhsil alacaqlar.
Azərbaycanın ali təhsil müəssisələrinin beynəlxalq reytinq cədvəllərində tutduğu yerlərin getdikcə yüksəldiyini nəzərə çatdıran Elm və Ali Təhsil üzrə Dövlət Agentliyinin direktor müavini Əminağa Sadıqov Azərbaycanda elmi araşdırmaların həyata keçirilməsi ilə bağlı yeni islahatların əhəmiyyətini xüsusi vurğulayıb: "Son illərin araşdırmalarının nəticələri, dünyada baş verən proseslər onu göstərir ki, elmi tədqiqatların universitetlərdə həyata keçirilməsi daha uğurlu nəticələr verir".
Elm və Təhsil Nazirliyinin Elm və ali təhsil siyasəti şöbəsinin müdiri Turxan Süleyman ali təhsildə elmi fəaliyyətin və tədrisin yeni çağırışlar əsasında təşkili məqsədilə keçirilən müzakirələrin bu istiqamət üzrə siyasətin müəyyənləşdirilməsində əhəmiyyətli rol oynadığını söyləyib. O, ali təhsil pilləsinə, xüsusilə də doktoranturaya tələbə qəbulunda effektiv planlaşdırılmanın aparılmasını zəruri sayıb.
Tədbirin davamında "Professor-müəllim heyətinin tədris işi vaxtı norması" ilə bağlı təqdimat edilib. Elm və ali təhsil siyasəti şöbəsinin əməkdaşı Emil Səlimov auditoriya və auditoriyadan kənar saatların bölgüsünə edilən əlavə və dəyişikliklər barədə tədbir iştirakçılarına məlumat verib.
Daha sonra Elm və ali təhsil siyasəti şöbəsinin böyük məsləhətçisi Nüşabə Məmmədbəyova "Ali təhsil müəssisələrində elmi tədqiqat və elmi-metodiki işlərin təşkili qaydaları"nı iştirakçıların diqqətinə çatdırıb. O bildirib ki, elmi-metodiki işi həyata keçirən şəxslər dərsliklərin, dərs vəsaitlərinin, fənn proqramlarının, elmi-metodiki məqalələrin hazırlanması ilə yanaşı, elmi-metodiki şuraların bölmələrində, ixtisaslaşdırılmış şuraların iclaslarında, yeni təhsil texnologiyalarının hazırlanmasında da iştirak edə bilərlər.
Tədbirin sonunda hər iki təqdimatla bağlı müzakirələr davam etdirilib, iştirakçıların sualları cavablandırılıb.
Günün ikinci yarısında isə "Orta ixtisas təhsili pilləsində tədrisin təşkili: normativlər və cari vəziyyət" adlı tədbir keçirilib.
Tədbirin açılışında çıxış edən Elm və Təhsil Nazirliyinin Elm və ali təhsil siyasəti şöbəsinin müdiri Turxan Süleyman hazırda orta ixtisas təhsili müəssisələrinin optimallaşdırılması istiqamətində tədbirlərin aparıldığını iştirakçıların diqqətinə çatdırıb, eyni zamanda subbakalavr dərəcəsi almış şəxslərin peşəkarlıq səviyyəsinin yüksəldilməsinin zəruriliyini vurğulayıb.
Daha sonra Elm və ali təhsil siyasəti şöbəsinin baş məsləhətçisi Vüsalə Qurbanova "Professor-müəllim heyətinin tədris işi vaxtı norması" haqqında təqdimatla çıxış edib. O, normalara edilən əlavə və dəyişiklikləri orta ixtisas təhsili müəssisələrinin məsul şəxslərinin diqqətinə çatdırıb. Saat bölgüsünün beynəlxalq və qabaqcıl təcrübələrə əsasən tərtib edildiyini bildirən V. Qurbanova yeni normaların tədrisin daha effektiv təşkilinə töhfə verəcəyini qeyd edib.
Tədbirin davamında orta ixtisas təhsili pilləsində tədrisin təşkili ilə bağlı müzakirələr aparılıb. Elm və ali təhsil siyasəti şöbəsinin əməkdaşları iştirakçıların suallarını cavablandırıblar.
Günün ikinci yarısında paralel olaraq pedaqoji ixtisaslar üzrə kadr hazırlığı aparan ali təhsil müəssisələrinin məsul şəxslərinin iştirakı ilə təcrübənin təşkilinə dair panel müzakirəsi aparılmışdır. Azərbaycan Dövlət Pedaqoji Universitetinin Tədris işləri üzrə prorektoru Eldar Aslanov pedaqoji ixtisaslar üzrə təcrübənin təşkili mövzusunda ADPU-nun yeni yanaşmasını panel iştirakçılarının diqqətinə çatdırmışdır. Mövzu ilə bağlı fikir mübadiləsi aparılıb, təklif olunan yeni təcrübə modelinə dair universitetlər təkliflərini bildiriblər.
