Rayonda 7 mindən çox arı ailəsi bəslənilir
Azərbaycanda arıçılığa maraq həmişə olub. Bu, təsadüfi deyil. Xüsusilə əlverişli iqlim şəraiti və zəngin faunası olan bölgələrdə arıçılıqdan həmişə yaxşı qazanc götürüblər. Belə rayonlardan biri də Ağstafadır.
Hazırda rayonda 347 nəfər 7,1 min arı ailəsinə baxır. Keçən il hər arı ailəsindən 10 kiloqram bal götürən təsərrüfat sahibləri bu il havaların əlverişsiz keçməsinə baxmayaraq, həmin rəqəmin bir qədər də artacağını söyləyirlər. Zarafat deyil, hazırda təmiz balın pərakəndə satış qiymətinin orta hesabla 25-30 manat arasında olması onu deməyə əsas verir ki, arıçılar bir arı ailəsindən orta hesabla 250-300 manat gəlir götürə bilirlər.
Ağstafa balının dadı və rəngi fərqli olur. Bunu uzun illərdən bəri arıçılıqla məşğul olan və bu işdə zəngin təcrübə toplayan Sadıqlı kənd sakini Nizami İsgəndərov deyir. Keçənilki qazancından razılıq edən arıçı baxdığı arı ailələrinin sayını artıraraq 120-yə çatdırmışdır.
Əsas işlərindən başqa, arıçılıqla da məşğul olan Sadıqlı kənd sakini Asəf Sadıqov da baldan götürdüyü qazancından razıdır. Deyir ki, hazırda 145 arı ailəsinə qulluq edir. Keçən il hər arı ailəsindən 15 kiloqrama yaxın bal götürüb. Təsərrüfat sahibi etiraf edir ki, arıçılıq ən gəlirli sahədir, bir şərtlə ki, gərək dilini biləsən: "Ona tələb olunan səviyyədə qulluq göstərəsən. Xüsusilə qış aylarında gərək arı ailələrini soyuqdan qoruyasan".
Düz Qışlaq kəndinin sakini Adil Mehdiyev də 20 ilə yaxındır arıçılıqla məşğul olur. Təcrübəli arıçının yeni mövsümlə bağlı xüsusi planları var. O, ana arı yetişdirmək üçün fikirləşdiyi yeni üsulu sınaqdan keçirəcək. Məqsədi yerli iqlimə uyğunlaşan məhsuldar arılar yetişdirməkdir.
Ümumiyyətlə, Ağstafada elə bir kənd yoxdur ki, orada arı saxlamasınlar. Sadıqlı, Muğanlı, Köçəsgər, Dağ Kəsəmən və digər kəndlərdə daha çox arı ailəsi var. Muradxanlı kəndində də arıçıların sayı çoxdur. Kənd sakini Murad Vəliyev bu gəlirli sahə ilə uzun illərdir məşğul olur. Balın satışında da problemlə üzləşmir. Keçən il 100 kiloqram balı Bakıda təşkil olunan yarmarkada satıb. Yarmarkanın təşkilatçılarına minnətdarlıq edən Murad kişi bildirir ki, belə yarmarkaların tez-tez təşkil edilməsi arıçıların işini yüngülləşdirir və istehsal olunan balın satışında problem yaşanmır. Ümumiyyətlə, rayon arıçıları belə hesab edirlər ki, hava şəraitindən asılı olmayaraq bu zəhmətkeş canlılardan istədikləri miqdarda bal və arı məhsulları götürə bilərlər, amma gərək hava imkan verə.
Sabir ƏLİYEV,
"Azərbaycan"
