"Həkimlik fərqli sənətdir, ilahi peşədir… Ağ xalat mənim üçün ağ işıq deməkdir. Sənə dikilən gözlərdə ümid, təsəlli, öləzimiş baxışlarda işıq olmaq əsl həkim üçün bir stimuldur. Düşünürəm ki, özünə həkim deyən, əyninə ağ xalat geyən şəxsi "xəstədən nə alacağı" yox, xəstəni necə sağaldacağı düşündürməlidir.
Kiçik yaşlarımdan bu arzu ilə böyümüşəm: yetişim, həkim olum… İndi arzuma çatsam da, hər dəfə xalatımı geyəndə, bir cərrahi əməliyyata girəndə elə zənn edirəm ki, imtahana gedirəm. Əməliyyatdan çıxanda, xəstəmi gülümsər gözlə, minnətdar baxşlarla mənə baxan görəndə "imtahandan uğurlu" çıxdığıma sevinirəm. Həkimliyin fəlsəfəsi də elə budur: xəstələrin gözündə ümid çırağı yandırmaq, şəfa vermək, onların ömrünün uzanmasına səbəb olmaq… Bir həkim kimi məni düşündürən budur. İstəyimə nail olduğumu hiss edəndə həyatda çox şey qazandığımı anlayıram…"
Redaksiyamızın budəfəki qonağı gənc həkim Fərid Mikayılov oldu. Birlikdə onun ömür hekayəsini vərəqlədik.
Fərid 1990-ci il fevralın 23-də Ucar rayonunda anadan olub. 2007-ci ildə Ucar şəhər 1 saylı orta məktəbi bitirib, elə həmin ili də yüksək nəticə ilə Azərbaycan Tibb Universitetinin 1-ci Mualicə işi fakültəsinə qəbul olunub.
2013-cü ildə Tibb Universitetini bitirən Fərid Mikayılov həkimlik fəaliyyətinə M.Cavadzadə adına Respublika Klinik Uroloji Xəstəxanada həkim-rezident olaraq başlayıb.
2016-cı ildə tibbdə uzmanlıq imtahanından uğurlu nəticə əldə edən gənc uroloq Türkiyənin Çukurova Universiteti Tibb fakültəsinin Urologiya şöbəsində təhsilini davam etdirib.
Universiteti bitirən gənc həkim Fərid Mikayılov 2021-2022-ci illərdə Türkiyədə özəl klinikada uzman uroloq olaraq fəaliyyət gostərib.
Fərid deyir ki, hələ tələbə ikən dostlarının çoxunun arzusu və məqsədi xaricdə təhsil almaq, dünyada tanınan məşhur klinikalarda fəaliyyət göstərmək idi. Qeyd etdiyim kimi, uşaqlıqdan hədəfimdə həkim olmaq arzusu var idi. Məqsədim isə dogma respublikamızda, vətənimizdə çalışmaq, xalqımıza xidmət etmək olub. Türkiyə bizim üçün çox doğma yerdir. Amma təbii ki, Azərbaycan deyil. Orada uzmanlıq təhsili aldım və bir müddət əmək fəaliyyətimi Türkiyədə davam etdirdim. Məqsədim doğma Azərbaycana gəlmək, burada çalışmaq idi. Orada olanda ölkəmizdə gedən prosesləri də izləmək imkanımız olurdu. Burada işləyən tələbə yoldaşlarımız, dostlarımız dövlətimizin səhiyyə sahəsinə diqqətindən, əhalinin sağlamlığına göstərilən dövlət qayğısından, səhiyyə sisteminin ən müasir texnologiyanın tətbiq edildiyi avadanlıqlarla təmin olunmasından bəhs edirdilər. Ölkəmizin səhiyyə sistemində baş verən dəyişiklikləri bir seyrçi olaraq izləmək yox, iştirakçısı olmaq arzusu ilə vətənə qayıtdım.
2022-ci ildə doğma Azərbaycana qayıdan Fərid bir müddət fəaliyyətini Bakıda Ege hospitalda davam etdirib. Elə həmin il respublika Klinik Xəstəxananın Urologiya şöbəsində iş təklifi alıb. Hazırda Urologiya şöbəsinin müdiri kimi fəaliyyətini davam etdirir.
Fərid həkim deyir ki, ölkəmizdə tibbi sığortanın tətbiqi xəstə-həkim münasibətlərində, bütövlükdə səhiyyə sistemində yeni mərhələnin başlanğıcı deməkdir. Xəstələr müayinə olunmaq, ən ciddi əməliyyatlara girmək üçün artıq "imkan düşməyi" gözləmirlər. Dövlətimizin yaratdığı şəraitdən kifayət qədər səmərəli istifadə edirlər. Bu gün xəstəxanalarda həkim qəbullarında yaranmış növbələri insanların pulsuz xidmətdən faydalanmaq əmsalının göstəricisi hesab etmək olar. İnanıram ki, yaxın gələcəkdə müalicə almaq üçün xarici ölkələrə gedən xəstələrin sayı azalacaq. Bunu gəlişigözəl söz kimi demirəm. Səhiyyəyə dövlət qayğısını, daha yaxşı həkim yetişdirmək üçün çəkilən zəhməti, alınan müasir avadanlıqlarını görüb deyirəm.
Peşəsini məftunluqla sevən Fərid həkimi dinlədikcə düşünürsən ki, nə qədər bu vətəni, bu xalqı canı qədər sevən insanlar var, yaşamağına dəyər.
Elşən QƏNİYEV,
"Azərbaycan"
