Salyan qəzasında ilk qəzet 21 fevral 1924-cü ildə çap edilməyə başlamışdır. Qəza Partiya Komitəsinin və İcraiyyə Komitəsinin orqanı kimi "Qırmızı Muğan"- "Krasnaya Muqan" adı ilə  Azərbaycan və rus dillərində nəşrə başlayan qəzet sonrakı dövrlərdə  ayrı-ayrı adlarla fəaliyyətini davam etdirmişdir. İndiyədək qəzetin 8700-dən çox sayı işıq üzü görmüşdür.
Salyan rayonunun, bütövlükdə Muğan bölgəsinin mədəni -ictimai həyatında mühüm rol oynamış "Qələbə" qəzeti uzun illər həm də ətraf ərazilərdə yeganə informasiya mənbəyi olmaqla bərabər, bölgənin ictimai-siyasi salnaməsini yarada bilmişdir. Yüz il əvvəl qəza mərkəzi olan Salyanda gedən proseslər haqqında məlumatları  öz saralmış səhifələrində bu gün də yaşadan qəzet regionun tarixini yazmışdır.
İlk nömrəsi tarixi sənəd kimi Əli bəy Hüseynzadə adına Salyan Rayon Tarix-Diyarşünaslıq Muzeyində qorunan qəzetin ilk redaktoru Andrey Novaxatski olmuşdur. Ondan sonra qəzetə 9 redaktor rəhbərlik etmişdir. Tağı Məmmədov, Şirinbala Süleymanov, Əfsərağa Məmmədov, Sahib Səfərov, Səfər Səfərov, Mahmud Ağalarov, Məhəmməd Xəlilbəyli, Akif Quliyev, Fərqanə Cəbrayılova qəzetin  redaktoru olduqları dövrlərdə regionda mətbuat orqanının dövrün tələbləri səviyyəsində fəaliyyəti üçün böyük əmək sərf etmişlər. 20 ilə yaxındır ki, "Qələbə"yə bu sətirlərin müəllifi  redaktorluq edir.
Qəzetimiz bütün dövrlərdə zamanın aynasına cevrilmiş, cəmiyyətin həyatında baş verən yenilikləri, mütərəqqi hadisələri işıqlandırmış, nöqsanlara prinsipial münasibət bildirmiş, qabaqcıl təcrübələrin təbliğatçısı olmuşdur. Bölgəmizin tanınmış elm və sənət adamları, ziyalıları, şair və nasirləri ilk qələm məhsullarını "Qələbə" qəzetində  çap etdirmişlər. Bu gün adı xüsusi hörmətlə çəkilən, respublikamızın ictimai-siyasi həyatında xidmətləri olmuş Xalq şairi, "İstiqlal" ordenli  Xəlil Rza, Əməkdar incəsənət xadimi Əliağa Kürçaylı, Əməkdar müəllim, şair Oqtay Rza, aşıq-şair, Əməkdar mədəniyyət işçisi Pənah Pənahov, Əməkdar mədəniyyət işçisi Əliqismət Lalayev, Azərbaycan Yazıçılar Birliyinin üzvləri Ağacavad Əlizadə, İmamverdi Əbilov və onlarca  ziyalımızın ictimai mühitə, ədəbiyyat və poeziyaya gedən yolu məhz bizim rayon qəzetindən başlamışdır.
Qəzetin fəaliyyətinin 35 ili Ümummilli Lider Heydər Əliyev kimi nəhəng şəxsiyyətin  fəaliyyəti, onun qurub-yaratdığı Azərbaycanın tərəqqisinin təbliği, doğma respublikamızın bir parçası Salyanın mədəni-ictimai və siyasi həyatının salnaməsinin yaradılması ilə bağlı olmuşdur. Ona görə də "Qələbə" qəzetinin həyatında yaddaqalan  hadisələr, tarixi günlər çoxdur. Sözsüz ki, onların ən şərəflisi Ulu Öndər Heydər Əliyevin Salyan rayonuna səfərlərini işıqlandırmaq, bu mühüm tarixi hadisələrin salnaməsini yaratmaq olmuşdur.  
Ulu Öndər Heydər Əliyevin siyasi varisi, Prezident İlham Əliyevin də Salyana  səfərləri, ictimaiyyət nümayəndələri ilə görüşləri, rayonun sosial-iqtisadi inkişafı barədə sərəncamları salyanlılarda həmişə yüksək əhvali-ruhiyyə, qurub-yaratmaq əzmi  yaratmışdır. Son illər rayonda aparılan genişmiqyaslı abadlıq və quruculuq işləri, həyata keçirilən dövlət layihələri qəzet əməkdaşları üçün maraqlı və rəngarəng mövzular vermişdir.
Prezident, Ali Baş Komandan İlham Əliyevin  rəhbərliyi ilə Vətən müharibəsində Milli Ordumuzun qələbə qazanması, şəhidlərimizin qəhrəmanlığı, qazilərimizin hünəri qəzetimizin son dövr fəaliyyətində əsas yer tutur. Azərbaycanın ərazi bütövlüyünün təmin edilməsində 70-ə yaxın şəhidi, onlarla qazisi olan Salyanın dörd oğlunun Vətən Müharibəsi Qəhrəmanı adına,  yüzlərlə hərbi qulluqçusunun yüksək orden və medallara layiq görülməsi vətənpərvərlik ruhunda yazılar hazırlayan əməkdaşlarımız üçün  daimi mövzudur. 

Rüstəm MƏLİKOV,
"Qələbə" qəzetinin redaktoru