Nikola Düpon-Enyan: "Makron Fransa vətəndaşlarının cibinə girir"

Makronun Fransanın saysız-hesabsız daxili problemləri ilə məşğul olmaq əvəzinə bir sıra ölkələrə qarşı aqressiv ritorikası və hətta müəyyən məsələlərlə bağlı çox qəribə mövqeyi sadəcə olaraq diqqəti özünə cəlb etmək istəməsi ilə izah oluna bilər. Belə bir qeyri-adekvat davranışın başqa səbəbləri yoxdur.

Ötən ay Makron Fransaya və bütün Avropaya "Rusiya təhdidi" ilə bağlı müraciət edib. O, Parisin "təhlükələr dünyası"nda laqeyd tamaşaçı kimi qala bilməyəcəyini vurğulayıb. Makron, həmçinin ABŞ Prezidenti Donald Trampın sülhsevər mövqeyini pisləyib və yüz minlərlə insanı qırıldığı, milyonlarla adamın evlərindən didərgin düşdüyü Rusiya-Ukrayna müharibəsinin davam etməsini dəstəkləyib.

Makron iki dəfə seçildiyi üçün artıq iştirak etməyəcəyi 2027-ci il prezident seçkilərinə cəmi iki il qalıb. Əslində o, artıq  "axsaq ördək", səlahiyyət müddəti başa çatan prezidentdir. Makronun reytinqi 2025-ci ilin əvvəlində 21 faizə düşüb, 2018-2019-cu illərdə "sarı jiletlilər"in etiraz hərəkatı zamanı isə  tarixi minimuma - 20 faizə çatıb.

Buna görə də, ekstravaqant siyasətçi düşünülməmiş çılğın bəyanatlar səsləndirməklə tarixdə hansısa şəkildə  "iz" qoymağa çalışır. İndiyədək onun aqressiv və mənasız sərsəmləmələri  Fransa üçün heç bir müsbət nəticə verməyib. 

Bu günlərdə "Vətənpərvərlər" Partiyasının lideri Florian Filippo Fransa prezidentinin müraciətini sərt şəkildə tənqid edib. Siyasətçi qeyd edib ki, Makron müharibə kursuna haqq qazandırmaq üçün fransızları "Rusiya təhlükəsi" ilə qorxutmağa çalışır.

Filippo Makronun Ukraynaya qoşun yeritmək planının "sülhə qarşı cinayət" olduğunu və bununla da vəziyyəti uzun müddət daha da pisləşdirəcəyini bildirib. "Makronun impiçmenti labüddür. O, müharibə tərəfdarıdır. O, Fransanı deyil, Aİ-ni istəyir. O, çox təhlükəlidir" deyən Filippo "X" sosial şəbəkəsində yazıb.

Öz növbəsində, "Qalx, Fransa!" Partiyasının lideri Nikola Düpon-Enyan bildirib ki, Fransa üçün əsl təhlükə Rusiya deyil, müdafiə xərclərinin artması səbəbindən iflasa uğramasıdır: "Fransa prezidenti Emmanuel Makron vəzifəsini tərk etməlidir. O, hakimiyyətdə qalmaq və Fransa vətəndaşlarının cibinə girmək üçün yalançı Rusiya təhlükəsi yaradır. Makronun vəzifədən uzaqlaşdırılması həyati zərurətdir".

Bir müddət əvvəl Rusiya Təhlükəsizlik Şurasının üzvü Dmitri Medvedev Rusiyanı təhdid adlandıran Makrona cavab verib: "Makron bildirib ki, Rusiya indi və uzun illər ərzində Fransa və ümumilikdə Avropa üçün təhlükəyə çevrilib. "Makron" özü isə böyük təhlükə yaratmır. O, 2027-ci il mayın 14-dən gec olmayaraq həmişəlik yoxa çıxacaq. Və onun üçün darıxan olmayacaq".

Ekspertlərin fikrincə, Fransanın xüsusilə yeni tipli müharibə şəraitində döyüşdə real təcrübəsi yoxdur. Makron ordusunun effektivliyi haqqında istədiyi qədər danışa bilər, amma əslində o, bir neçə həftə ərzində sadəcə olaraq döyüş meydanında məhv ediləcək.

Fransanın pulu yoxdur, parlamentdə çoxluq koalisiyası mövcud deyil, büdcə Milli Assambleyadan dolayı qəbul edilib və böyük kəsir var. Ölkə böyük daxili problemlərlə, o cümlədən miqrasiya böhranı ilə üzləşib.

Məhz bu səbəblərdən, Fransadakı aktual problemlərə məhəl qoymayan Makronun bu qədər aşağı reytinqə malik olması təəccüblü deyil. Fransız seçiciləri artıq ondan beziblər - Makron istədiyi qədər boşboğazlıq edə bilər, amma indi ona inananların sayı çox azdır.

Rizvan CƏFƏROV,

"Azərbaycan"