İyul ayında Neft İxrac Edən Ölkələr Təşkilatı (OPEC) və bəzi qeyri-OPEC istehsalçılarından ibarət OPEC+ qrupu üzrə neft hasilatı əvvəlki aya nisbətən təxminən 1 milyon 780 min barel artaraq gündəlik 40 milyon 750 min barelə çatıb.
AZƏRTAC xəbər verir ki, bu barədə Beynəlxalq Enerji Agentliyinin (IEA) neft bazarına dair aylıq hesabatında deyilir.
Hesabata görə, bu dövrdə Səudiyyə Ərəbistanının istehsalı təxminən 900 min barel artaraq 8 milyon 240 min barelə, Rusiyanın istehsalı isə təqribən 100 min barel artaraq 8 milyon 760 min barelə yüksəlib. OPEC+ qrupuna daxil olmayan ölkələrdən tədarük isə təxminən 590 min barel artaraq 60 milyon 750 min barelə çatıb.
Bildirilir ki, Qara dəniz hücumlarının Qazaxıstanın neft istehsalı və ixracını pozmasına baxmayaraq, bu dövrdə OPEC+ qrupunun istehsalı artıb. OPEC+ olmayan ölkələrindən hasilat artımı ABŞ və İran arasında gərginliyin qısa müddətə azalmasından sonra Qətərin neft tədarükünün bərpası ilə bağlıdır. Lakin, İran və ABŞ arasında anlaşma memorandumunun pozulması, ardınca ayın sonuna doğru yenidən gərginliyin artması və Səudiyyə Ərəbistanının tankerlərini və enerji infrastrukturunu hədəf alan husilərlə əlaqəli hücumlar Körfəz istehsalçılarının hasilatı bərpa etmək səylərini təhlükə altına alır.
Hörmüz boğazından ticarət axınının bərpası ilə bağlı danışıqların irəliləyəcəyini fərz etsək, qlobal neft tədarükünün bu il gündəlik orta hesabla 102 milyon barel olacağı gözlənilir ki, bu da ötən illə müqayisədə 4,3 milyon barel azalma deməkdir. Lakin qlobal neft tədarükünün artmasına baxmayaraq, Körfəz bölgəsində 8,3 milyon barel istehsalın dayandırılmasının davam etməsi səbəbindən ümumi təklif ötən ilin eyni dövrü ilə müqayisədə gündəlik 6,3 milyon barel aşağı olaraq qalır. İyul və avqust aylarının əvvəllərində münaqişələrin yenidən şiddətlənməsi və dəniz nəqliyyatında yaranan fasilələr istehsalın bərpasına mane oldu və ilin üçüncü rübü üçün qlobal neft tədarükü proqnozu ötən ayın hesabatı ilə müqayisədə gündəlik 1,7 milyon barel aşağıya doğru yenidən nəzərdən keçirilib.
jpg_1789895854.jpg)
